[caption id="attachment_49895" align="aligncenter" width="560"] فوتو: kazmkpu.kz[/caption]
الماتىداعى قازاق مەملەكەتتىك قىزدار پەداگوگيكالىق ۋنيۆەرسيتەتى QS StarsUniversityRatings حالىقارالىق رەيتينگىسى بويىنشا «3 جۇلدىز» يەلەنگەن تۇڭعىش پەداگوگيكالىق جوعارعى وقۋ ورنىنا اينالدى.
بۇعان دەيىن قازاق مەملەكەتتىك قىزدار پەداگوگيكالىق ۋنيۆەرسيتەتى تاۋەلسىز رەيتينگ اگەنتتىگىنىڭ قورىتىندىسى بويىنشا ۇزدىك پەداگوگيكالىق ۋنيۆەرسيتەت اتانعان. ماماندار دايىنداۋ باعىتتارى جانە دەڭگەيلەرى بويىنشا رەسپۋبليكامىزدىڭ بارلىق جوعارى وقۋ ورىندارى اراسىنداعى 7 ورىندا تۇرعان ۋنيۆەرسيتەت.
«قىزدار ۋنيۆەرسيتەتى» مەديا ورتالىعىنىڭ حابارلاۋىنشا, QS Stars – ۋنيۆەرسيتەت قىزمەتىنە سەگىز ولشەمى بويىنشا كوپاسپەكتىلى باعا بەرەتىن QS Quacquarelli Symonds قۇراستىرعان رەيتينگتىك جۇيە. ءبىلىم بەرۋدى ۇيىمداستىرۋدىڭ 50 ينديكاتورى بويىنشا جۇرگىزىلگەن اۋديتتىك كەشەندى تەكسەرۋدىڭ قورىتىندىسى بويىنشا ۋنيۆەرسيتەتكە رەيتينگتىڭ 0-دەن 5+-كە دەيىنگى QS «جۇلدىزى» بەرىلەدى. ۋنيۆەرسيتەت جۇمىسى تاۋەلسىز دەرەككوزدەرى ارقىلى كەشەندى ساراپتاما نەگىزىندە باعالانادى. ونىڭ ىشىندە اكادەميالىق جانە كاسىبي ورتا وكىلدەرىنىڭ (ونىڭ ىشىندە – جۇمىس بەرۋشىلەردىڭ) ساۋالناماسىنىڭ قورىتىندىسىن, ءبىلىم بەرۋ مەكەمەسىنە دەگەن ستۋدەنتتەر مەن تۇلەكتەردىڭ كوزقاراسىن دا ەسكەرە وتىرىپ جالپى بالدان قورىتىندى رەيتينگ باعاسىن انىقتايدى.
QS Stars تالابىندا كورسەتىلگەندەي QS Intelligence توبى وتە قاتال ءارى تاۋەلسىز ساراپتاما كورسەتكىشتەرى مەن تيىمدىلىك قورىتىندىسىن شىعارا وتىرىپ, رەيتينگ ءادىسناماسى بويىنشا قازاق مەملەكەتتىك قىزدار پەداگوگيكالىق ۋنيۆەرسيتەتىنە «3 جۇلدىزدى» بەرۋگە ۇيعارىم شىعارعان.
QS ە Stars ™ رەيتينگ جۇيەسىن 2004 جىلدان باستاپ QS World University Rankings® تاۋەلسىز قۇراۋشىسى QS Intelligence Unit ارقىلى ەلەكتروندى جۇيە بويىنشا باسقارىلادى. QS ە Stars رەيتينگىسى ۋنيۆەرسيتەتتەردى حالىقارالىق ستاندارتتار بويىنشا الدىن الا بەلگىلەنگەن ماڭىزدى كورسەتكىشتەر ارقىلى باعالايدى. وسى ارقىلى ءبىلىم بەرۋ مەكەمەلەرىن ۇزدىك كورسەتكىشتەرگە تالپىندىرا وتىرىپ, ولاردىڭ دەڭگەيلەرىن ارتتىرۋعا سەپتىگىن تيگىزەدى.
قازاقستاننىڭ جوعارعى وقۋ ورىندارى اراسىنان بۇل «3 جۇلدىزدى»وسىعان دەيىن ءال-فارابي اتىنداعى قازاق ۇلتتىق ۋنيۆەرسيتەتى العان. ال قازاق مەملەكەتتىك قىزدار پەداگوگيكالىق ۋنيۆەرسيتەتى «3 جۇلدىزدى» العان تۇڭعىش قازاقستاندىق پەداگوگيكالىق ۋنيۆەرسيتەت.
ايناش ەسالي