وقىرمان
...قولداۋ كورسەتەدى
بۇل – رۋحانياتىمىزعا دەگەن جاناشىرلىق
كاسىپكەرلىككە ەرەكشە قولداۋ مەن قامقورلىق جاسالىپ جاتقان قازىرگى كەزەڭدە ءبىز دە ماقساتتى شارۋانى قولعا العان جايىمىز بار. ەلىمىزدىڭ الەۋمەتتىك-ەكونوميكالىق ءال-اۋقاتىنىڭ دامۋىنا, ءوسىپ-ءوركەندەۋىنە ءوز ۇلەسىمىزدى قوسۋدى ازاماتتىق پارىزىمىز سانايمىز. كۇنى كەشە عانا «دامۋترانسسەرۆيس» جاۋاپكەرشىلىگى شەكتەۋلى سەرىكتەستىگىن قۇردىق. مەكەمەمىز ءتاي-ءتاي باسىپ اياقتان تۇرىپ كەلەدى. باستى مىندەت – حالىقتى اۋىل شارۋاشىلىعى ونىمدەرىمەن قامتاماسىز ەتۋ. بيىل سەرىكتەستىگىمىزدە ازىرگە ونشاقتى ادام جۇمىس ىستەيدى. بارلىعى دەرلىك ۇلتتىق رۋحانياتىمىزدىڭ جاناشىرلارى.
ەلىمىز ومىرىندەگى ايتۋلى وقيعا – تاۋەلسىزدىگىمىزدىڭ 25 جىلدىعىن اتاپ وتەر كۇن دە جاقىن قالدى. وسىناۋ ۇلىق مەرەيتويىمىزعا ارناپ ءبىز دە ءوزىمىزدىڭ قولىمىزدان كەلگەنشە تارتۋىمىزدى ازىرلەدىك. قازاقستان مۇسىلماندارى ءدىني باسقارماسى جانىنداعى «زەكەت» كورپوراتيۆتىك قورى ارقىلى تالعار اۋدانىنىڭ نۇرا اۋىلىندا تۇراتىن جاعدايى ناشار كوپ بالالى وتباسىعا باسپانا سالۋ شاراسىنا ماتەريالدىق كومەك كورسەتتىك. باسپاسوزگە جازىلۋ ناۋقانى جىل بويى جۇرگىزىلەتىنى بەلگىلى. وسى رەتتە ءوزىمىز ەرەكشە قادىر تۇتاتىن ۇلتتىق باسىلىمىمىز, ماقتانىشىمىز, رۋحاني ازىعىمىز «ەگەمەن قازاقستان» گازەتىنە قولداۋ جاساعىمىز كەلدى. مەكەمەمىز ورنالاسقان الماتى وبلىسىنىڭ قاراساي اۋدانىنا قاراستى جامبىل اۋىلدىق وكرۋگىندە تۇراتىن 10 زەينەتكەر مەن جاعدايى تومەن وتباسىلاردى «ەگەمەن قازاقستانعا» ءوز ەسەبىمىزدەن جازدىرۋدى ۇيعاردىق. ەندى ولار 2016 جىلدىڭ ەكىنشى جارتى جىلىندا – التى اي بويى «ەگەمەن قازاقستان» گازەتىن تۇراقتى الىپ تۇراتىن بولدى. ۇلتتىق باسىلىمدار اراسىندا ءبىز ءۇشىن ءوزىمىزدىڭ بايسالدى دا بايىپتى «ەگەمەنىمىزدىڭ» ورنى قاشان دا بولەك, قاشان دا بيىك.
مۇراتجان شايىق,
«دامۋترانسسەرۆيس» جشس ديرەكتورى
الماتى وبلىسى
...جاڭالىعىن جەتكىزەدى
جاڭا پوليگون اشىلدى
بەيبەرەكەتسىز لاقتىرىلعان كۇل-قوقىستار مەن تۇرمىستىق قالدىقتار ءارى بۇلاردىڭ جاعىمسىز يىستەرى اۋاعا تاراپ, قولقانى قاباتىنى راس. وسىنداي جايتتاردى جويۋ ءۇشىن اۋىل تۇرعىندارىمەن اقىلداسا وتىرىپ, كۇل-قوقىس توگەتىن پوليگون اشۋدى ءجون كوردىك. ءسويتىپ, داريان اۋىلىنان جۇرەتىن تاس جول بويىنان ەكى شاقىرىم قاشىقتىقتا ورنالاسقان بۇرىنعى ەسكى كۇل-قوقىس ورنىن بىتەپ جاپتىق. مۇنىڭ ورنىنا جاڭا پوليگوندى وزەرنىي اۋىلىنداعى بۇرىلىستىڭ ارعى جاعىنداعى جەتى شاقىرىم جەردەن جاساقتادىق.
ەلىمىزدەگى كەز كەلگەن اۋىلدىڭ ءىشى-سىرتى مۇنتازداي تازا بولعانىنا نە جەتسىن؟! وسى ورايدا اۋىل توڭىرەگىنەن الىستاۋ جەردەن كۇل-قوقىسقا ارنالعان جاڭا ورىندى اشۋ ۇيعارىلىپ, ونىڭ ويداعىداي اياقتالعانىنا تۇرعىنداردىڭ ءبارى دە تۇسىنىستىكپەن قاراپ وتىر. ەندى حالىق قوقىس تاستاۋدىڭ مادەنيەتىنە داعدىلانىپ, مۇنىڭ قاجەتتىلىگىن تەرەڭىرەك ۇعىنا تۇسەدى دەپ ويلايمىز. ءسوزدىڭ رەتى كەلگەندە ايتا كەتەيىك, زاڭسىز تۇردە تۇرمىستىق قالدىقتار تاستاعان تۇرعىندارعا ايىپپۇل سالىنادى.
بولات ەربولاتوۆ,
داريان اۋىلدىق وكرۋگىنىڭ اكىمى
باتىس قازاقستان وبلىسى,
زەلەنوۆ اۋدانى
...ۇلگى تۇتادى
كىتاپ وقيتىن اۋىل
سوڭعى كەزدەرى كىتاپ وقۋ قالىپ بارادى دەگەندى ءجيى ەستيمىز. بىراق بۇل موڭكە بي اۋىلىنىڭ تۇرعىندارى تۋرالى ەمەس. ويتكەنى, اۋىلداعى جاڭا مودەلدى كىتاپحانا تۇرعىنداردىڭ رۋحاني سەرىگى بولىپ وتىر. كىتاپحانا مەڭگەرۋشىسى بالحيا جۇماباەۆانىڭ ايتۋىنشا, 1400-گە جۋىق كىتاپ قورى بار. ءتورت ءجۇزدىڭ ۇستىندەگى تۇراقتى وقىرماننان باسقا مەكتەپ وقۋشىلارى دا قاجەتتى كوركەم شىعارمالاردى ىزدەپ كەلەدى ەكەن.
«رۋحاني الەمنىڭ كوشباسشىسى – كىتاپ», «الەم تانىعان قازاقستان», « ۇلىلار ۇلاعاتى», «وقيتىن ولكە» جانە باسقا ءتۇرلى اكتسيالار, كورمەلەر ۇيىمداستىرىلادى. اقىن-جازۋشىلاردىڭ شىعارمالارىنا ارنالعان ءىس-شارالارعا وقىرماندار شىن نيەتتەرىمەن قاتىسادى. ال كىتاپحانا مەڭگەرۋشىسى, كوپ بالالى انا بالحيا جۇماباەۆا 2010 جىلى اۋداننىڭ «جىل ادامى» اتاعىن العان. اۋدان اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ بەلسەندى مۇشەسى.
بەردىباي كەمال
اقتوبە وبلىسى
...ءسۇيسىنىسىن بىلدىرەدى
الاكولدە دەمالعانعا نە جەتسىن!
ءار ولكەنىڭ جاقۇتتاي ءمولدىرەگەن وزەن, كولدەرى, تابيعات انا سىيلاعان قاسيەتتى جەرلەرى كوپ-اق. سونىڭ ءبىرى – شىعىس قازاقستان وبلىسى قابانباي اۋىلىندا ورنالاسقان تۇزدى كولدىڭ ءبىرى – الاكول. كەزىندە اتا-بابالارىمىز جاۋ قولىنان جارالانعاندا سول كولدىڭ شيپاسى تيگەن ەكەن. ويتكەنى, تۇزدى سۋ بارلىق جارانى جازاتىن قاسيەتى بار, ال بالشىعى اياق قاقساۋ, تەرى اۋرۋلارىنا پايدالى دەسەدى. كوگىلدىر كول دەمالۋعا بارعان جاننىڭ جانىن جادىراتاتىنى ءسوزسىز. قازىر ەلىمىزدە تۋريستىك سالاعا باسىم باعىت بەرىپ وتىر. حالىقتىڭ ءال-اۋقاتىن جاقسارتۋ, ەلىمىزدىڭ وركەندەپ ءوسۋ جولىندا بيزنەستىڭ «جول كارتاسى-2020», «نۇرلى جول» باعدارلامالارى شاعىن جانە ورتا كاسىپكەرلىكتى دامىتۋعا ارنالعان. وسى شيپاجايدىڭ جول جاعدايى ازداپ قيىندىق تۋعىزىپ وتىرعانى راس. شالعاي جاتقان اۋىلعا جۇرەتىن پويىزدىڭ, تىكەلەي ۇشاقتىڭ جوقتىعى قولبايلاۋ بولىپ وتىر. اۆتوبۋسپەن قاتىنايتىن جولداردىڭ جاعدايى بۇرىنعىعا قاراعاندا ەداۋىر جاقسارعان, جوندەۋ جۇمىستارى جۇرگىزىلىپ كەلەدى.
الاكولگە 100 شاقىرىم جەردە «بارلىق اراسان» اتتى دەمالىس ايماعى بار. دەمالۋعا كەلگەن تۋريستەردى ول ولكەنىڭ تابيعاتى باۋراپ الارى انىق. وندا كوزدى ايناداي اشاتىن بۇلاق سۋى, اسقازان اۋرۋىن جازاتىن شيپالى سۋ دا بار جانە كەلۋشىلەر جەردىڭ استىندا قايناپ شىعىپ جاتقان ىستىق سۋمەن دە ەمدەلە الادى. تابيعات انا بەرگەن وسىنداي ماقتان تۇتار كيەلى جەرلەر قازاقستاننىڭ ءار وڭىرىندە بار. شەتەل اسىپ ەلدىڭ قاڭسىعىن كورگەنشە, ءوز ەلىمىزدىڭ تاڭسىعىنا بارعانعا نە جەتسىن!
ايمان مۇقىشوۆا
شىعىس قازاقستان وبلىسى