تۋ تۋرالى كۋالىك... 117 جاسىندا
مەكسيكانىڭ ەڭ جاسى ۇلكەن تۇرعىنى – 117-دەگى ترينيداد الۆارەس ومىرىندەگى ءبىرىنشى تۋ تۋرالى كۋالىگىن مەحيكونىڭ الەۋمەتتىك دامۋ ءمينيسترىنىڭ قولىنان الدى.
الۆارەس 1898 جىلى تۋعان. ول ەشقاشان تۇرمىس قۇرماعان, ءوزىنىڭ وگەي شەشەسىنەن تۋعان جەتى بالانى تاربيەلەپ, ءۇي شارۋاسىمەن عانا اينالىسىپتى. سونىمەن قاتار, ەشقاشان ونىڭ جاسى مەن ازاماتتىعىن ايعاقتايتىن قۇجاتى بولماپتى. بۇدان مالىمەت العان شەنەۋنىكتەر كەيۋاناعا دەرەۋ قۇجات تاپسىرا قويىپتى. بىراق ايەل ەرتەڭىنە جۇرەك تالماسىنان قايتىس بولىپ كەتكەن.
«جەرار دەپاردەگە...» – 600 رۋبل ايىپپۇل!
رەسەيدىڭ ارحانگەلسك قالاسىندا ءتيىستى سالىقتارىن تولەمەگەنى ءۇشىن... جەرار دەپاردە سوتقا ءماجبۇر ەتۋ جولىمەن اكەلىندى.
بىراق بۇل جەراردىڭ فرانتسۋز اكتەرىنە ەشقانداي قاتىسى جوق بولىپ شىقتى. تۋعان كەزىندەگى اتى-ءجونى اندرەي ۆالەنتينوۆيچ حريستوفوروۆ بولىپ تابىلاتىن ازامات ونى وسى كەزگە دەيىن 4 رەت وزگەرتىپتى. سوڭعىسىندا جەرار كساۆەمارسەلەۆيچ دەپاردە اتانعان ساباز بيۋدجەتتەن تىس قورلار ورگانىنا قۇجات تاپسىرماعانى ءۇشىن 600 رۋبل ايىپپۇل تولەيتىن بولىپ جازا العان ەكەن.
«ايەلىمنىڭ جۇزىگى – 300 مىڭ دوللار!»
ميللياردەر دونالد ترامپتىڭ ەكىنشى ايەلى – اكتريسا مارلا مەيپلزدىڭ نەكە ساقيناسى نيۋ-يوركتىڭ اۋكتسيونىندا 300 مىڭ دوللارعا ساتىلدى.
مەيپلز بۇل جۇزىكتى 1999 جىلى ترامپتان اجىراسقاننان كەيىن ساتىپ جىبەرگەن ەكەن. سول جولى ونى ءبىر ەرلى-زايىپتىلار 110 مىڭ دوللارعا الىپتى. ال قازىر ءىنجۋ جالاتىلعان 7,45 كاراتتى جۇزىكتىڭ جاڭا يەسى اشىپ ايتىلماي وتىر. مۇنى باسىندا ساتىپ العان اقش پرەزيدەنتتىگىنە قازىرگى ۇمىتكەر ءوز ومىرىندە ءۇش رەت ۇيلەنگەن. ونىڭ بۇلاردان بەس بالاسى, سەگىز نەمەرەسى بار.
جاپون ازاماتى ۇرلەمەلى ايەلگە عاشىق
جاپونيادا تۇراتىن 61 جاستاعى سەندزي ناكاياما نىسپىلى ازامات ساوري دەگەن قۋىرشاققا عاشىق بولىپ قالىپتى.
ۇزاق جىلدار ءبىر ايەلمەن ءبىر شاڭىراق استىندا ءومىر ءسۇرىپ, ەكى بالالى بولعان جىگىت اعاسى سوڭعى 10 جىلدا ۇيىنەن جىراقتا تۇرعان. ول جالعىزدىقتان جابىرقاپ جۇرگەن كەزىندە ۇرلەمەلى رەزىڭكە ايەل ساتىپ الادى. سودان باستاپ ونىڭ تۇرمىس سالتى كۇرت وزگەرەدى. ول قۋىرشاعىن كۇندەلىكتى دالاعا الىپ شىعىپ, ادام سياقتى سەرۋەندەتىپ تۇرۋدى دا داعدىعا اينالدىرىپتى.
ۇندىلەر سيىر دارەتىنەن التىن تاپتى
ءۇندىستاننىڭ دجۋناگادح اۋىل شارۋاشىلىعى ۋنيۆەرسيتەتىنىڭ عالىمدارى گۋدجارات شتاتىندا جۇرگىزگەن زەرتتەۋ جۇمىستارىنىڭ ناتيجەسىندە گير سيىرلارىنىڭ كىشى دارەتىنەن التىن تاپقان كورىنەدى.
وقىمىستىلار زەرتتەۋدى حراموتت-ماسس-سپەكترومەتريا گازدى ءتاسىلىن قولدانۋ ارقىلى جۇرگىزگەن. ايتۋلارىنشا, ءمۇيىزدى ءىرى قارانىڭ كىشى دارەتىنىڭ ءار ليترىنەن ۇشتەن ون ميلليگرامعا دەيىن حيميالىق قوسپالار تۇرىندەگى التىن بولاتىنى انىقتالعان. ماماندار ءتىپتى وسى التىنداردى الىپ شىعارىپ, كريستالعا اينالدىرۋ ۇدەرىسىن دە جاساپ كورىپتى.
iPhone-عا ۇيلەنگەن ازامات تا شىقتى
ەستىمەگەن ەلدە كوپ. بۇرىن ءوزىنىڭ تاعدىرىن ءتۇرلى جان-جانۋارلارعا «قوساتىن» ەرلەر مەن ايەلدەردىڭ اتتارى ەستىلىپ جاتۋشى ەدى. بۇل جولعى سونداي «ماحاببات يەسى» جانسىز زات - iPhone سمارتفونىنا ۇيلەنگەنىن جاريالاپتى.
امەريكادا تۇراتىن اارون چەرۆەناك ەسىمدى جىگىت اتالمىش شارانى وتكىزۋگە لاس-ۆەگاستاعى شىركەۋ قىزمەتكەرلەرىن قويماي ءجۇرىپ كوندىرىپتى. ول بۇل ەرسىلەۋ قادامىن ءوزىنىڭ سمارتفونعا قانشالىقتى تاۋەلدى ەكەنىن, سونىمەن تاڭ اتىرىپ, كۇن باتىراتىنىن, ۇيىقتاعاندا دا قاسىنا الىپ جاتاتىنىن جۇرتشىلىققا جەتكىزۋ ءۇشىن جاسايتىنىن ايتقان.
كۇيەۋىنىڭ اعزالارىن التى ادامعا ساتقان
قىتايدا ءبىر ايەل قايتىس بولعان بريتانيالىق كۇيەۋىنىڭ اعزالارىن بەرۋ ارقىلى التى ادامنىڭ ءومىرىن ساقتاپ قالىپتى.
چجەتسزيان پروۆينتسياسىنداعى حانچجوۋ قالاسىندا تۇراتىن 49 جاستاعى مارك تەرەنس وسبورن دەگەن وقىتۋشى كىسى بيىلعى ناۋرىز ايىندا كوماعا ءتۇسىپ, ءۇش ايدان سوڭ قايتىس بولادى. وسىدان كەيىن ۆان ەسىمدى قىتايلىق ايەلى مارقۇمنىڭ بريتانيادا تۇراتىن ءبىرىنشى ايەلىنەن تۋعان قىزىنىڭ كەلىسىمىن الىپ, ونىڭ جۇرەگىن, باۋىرىن, ەكى بۇيرەگىن, ەكى كوزىنىڭ قاراشىعىن ترانسپلانتاتسياعا ءزارۋ قىتايلىق ازاماتتارعا بەرۋ جونىندەگى قۇجاتقا قول قويادى.
شەتەلدىك اقپارات اگەنتتىكتەرىنىڭ ماتەريالدارى
نەگىزىندە دايىندالدى