ەلباسى نۇرسۇلتان نازارباەۆ ۋكراينا پرەزيدەنتى پەتر پوروشەنكومەن تەلەفون ارقىلى سويلەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
اڭگىمە بارىسىندا ۋكراينا پرەزيدەنتى نۇرسۇلتان نازارباەۆتى قازاقستاننىڭ بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگى سايلاۋىنداعى جەڭىسىمەن قۇتتىقتادى.
ەكى ەل كوشباسشىلارى ەكىجاقتى ىنتىماقتاستىقتىڭ وزەكتى ءماسەلەلەرى مەن پەرسپەكتيۆالارىن تالقىلاپ, قازاقستان مەن ۋكراينانىڭ ەكونوميكالىق ىنتىماقتاستىق جونىندەگى مەملەكەتارالىق كوميسسياسىنىڭ وتىرىسىن بيىل وتكىزۋگە ۋاعدالاستى.
پ.پوروشەنكو قازاقستان پرەزيدەنتىن ۋكرايناعا مەملەكەتتىك ساپارمەن كەلۋگە شاقىردى.
مەملەكەتتەر باسشىلارى ۋكراينانىڭ وڭتۇستىك-شىعىسىنداعى احۋال تۋرالى پىكىر الماستى. پ.پوروشەنكو نۇرسۇلتان نازارباەۆقا داعدارىستى شەشۋ ىسىندەگى ارااعايىندىق قىزمەتىن جالعاستىرا بەرۋ جونىندەگى ءوتىنىشىن جەتكىزدى.
تەلەفون ارقىلى سويلەسۋگە ۋكراينا جاعى باستاماشىلىق ەتتى.