كەشە ءماجىلىس دەپۋتاتتارى سايلاۋشىلارمەن كەزدەسۋ ءۇشىن وڭىرلەرگە اتتاندى. بارلىق ءۇش پارتيا مەن قازاقستان حالقى اسسامبلەياسىنان سايلانعان ماجىلىسمەندەر تەك وبلىس پەن اۋدان ورتالىقتارىندا عانا ەمەس, شاعىن قالالار مەن الىس اۋىلدارعا دا شىعاتىن بولادى.
دەپۋتاتتار ەڭبەك ۇجىمدارى مەن ءوندىرىس جانە الەۋمەتتىك سالادا جۇمىس ىستەيتىندەرمەن جۇزدەسىپ, قوعامدىق قابىلداۋ جاسايتىنى جوسپارلانعان. ءماجىلىسمەندەر بارىنەن بۇرىن پارلامەنتتىڭ التىنشى شاقىرىلىمىنىڭ ءبىرىنشى سەسسياسىنداعى زاڭ شىعارۋ جۇمىسىنان حاباردار ەتەدى. «ماڭگىلىك ەل» پاتريوتتىق اكتىسى مەن «100 ناقتى قادام» ۇلت جوسپارىنىڭ جۇزەگە اسىرىلۋ بارىسى تۋرالى دا حالىققا ايتىپ بەرەدى.
سونىمەن قاتار, دەپۋتاتتار بيۋدجەت قارجىسى ەسەبىنەن ءجۇزەگە اسىرىلاتىن 2015-2019 جىلدارعا ارنالعان «نۇرلى جول» مەملەكەتتىك باعدارلاماسى نىساندارىنىڭ جاعدايىن بىلەتىن بولادى.
ءماجىلىس دەپۋتاتتارىنىڭ حالىقپەن جۇزدەسۋلەرى 2-شىلدە مەن 26 تامىز ارالىعىندا كەزەڭ-كەزەڭمەن وتەتىن بولادى, دەپ حابارلادى پارلامەنت ءماجىلىسىنىڭ ءباسپاسوز قىزمەتى.