قاۋىپسىزدىك كەڭەسىنىڭ جاڭا تۇراقتى ەمەس وكىلى
بەلارۋستىڭ باستى اقپارات اگەنتتىگى قازاقستاننىڭ بىرىككەن ۇلتتار ۇيىمىنىڭ قاۋىپسىزدىك كەڭەسىنىڭ تۇراقتى ەمەس مۇشەلىگىنە ازيا-تىنىق مۇحيتى ايماعى ەلدەرىنىڭ اتىنان 2017-2018 جىلدارعا سايلانعانىن جەتكىزدى. بۇل تۋرالى 28 ماۋسىم كۇنى نيۋ-يوركتە بۇۇ-نىڭ باس اسسامبلەياسىندا وتكەن داۋىس بەرۋ كەزىندە بەلگىلى بولدى.
قازاقستان – ورتالىق ازيادان ءبىرىنشى بولىپ بۇۇ-نىڭ ماڭىزدى ساياسي ورگانى قۇرامىنا سايلانعان العاشقى مەملەكەت. وعان ۇيىمنىڭ جارعىسى, جاھاندىق بەيبىتشىلىك پەن قاۋىپسىزدىكتى قولداۋ جونىندە وكىلەتتىك جۇكتەلدى.
قازاقستاننىڭ حالىقارالىق ۇيىمدارعا بەلسەنە قاتىسۋى ەلدىڭ ۇلتتىق مۇددەلەرىن قورعاۋدىڭ جانە بارىنشا تانىمالدىعىن قامتاماسىز ەتۋدىڭ ماڭىزدى قۇرالى, سونىمەن قاتار, ايماقتىق جانە جاھاندىق سىرتقى ساياساتىنىڭ قوزعاۋشى كۇشى بولىپ تابىلادى.
قازاقستان قىزمەتىن رەسمي تۇردە 2017 جىلدىڭ 1 قاڭتارىنان باستاپ, 2018 جىلدىڭ 31 جەلتوقسانىنا دەيىن جالعاستىراتىن بولادى.
تايلاندپەن باسەكەگە تۇسكەن ەدى
«روسبالت» اقپارات اگەنتتىنىڭ مالىمەتىنشە, ازيا-تىنىق مۇحيتى ەلدەرىنىڭ اتىنان قازاقستان مەن تايلاند سىنعا تۇسكەن. قازاقستان وسىعان دەيىن قاۋىپسىزدىك كەڭەستىڭ تۇراقتى ەمەس مۇشەسى بولىپ سايلانباعان. ال تايلاند 1985-1986 جىلدارى قۇرامىنا كىرگەن.
مالىمەتتەر بويىنشا, باتىس ەۋروپادان جانە وزگە دە ەلدەردەن ەكى ورىنعا يتاليا, نيدەرلاند, شۆەتسيا تالاسقان. لاتىن امەريكاسىنان جالعىز ورىنعا بوليۆيا ءتۇسىپتى. سونىمەن قاتار, افريكادان ەفيوپيا سايلاۋعا قاتىستى.
جەڭىسكە جەتۋ ءۇشىن بۇۇ-عا مۇشە مەملەكەتتەردىڭ ۇشتەن ەكىسىنىڭ داۋىسىن جيناۋى كەرەك. 1979 جىلى 155 راۋندتىق داۋىس بەرۋدەن كەيىن ءوزارا كەلىسىممەن كۋبا مەن كولۋمبيانىڭ ورنىنا مەكسيكا سايلانعان. ال 1956 جىلى 52 راۋندتىق داۋىس بەرۋدەن كەيىن پولشا مەن تۇركيا ەكى جىلدىق مەرزىمدى تەڭبە-تەڭ ءبولىپ العان.
ۇيىم قاتارى جاڭارادى
بۇۇ-نىڭ باس اسسامبلەياسى وتكەن سەيسەنبى كۇنى ەفيوپيانى, بوليۆيانى, شۆەتسيانى جانە قازاقستاندى قاۋىپسىزدىك كەڭەسىنىڭ 2017-2018 جىلدارعا تۇراقتى ەمەس مۇشەسى رەتىندە سايلادى.
قىتايدىڭ «سينحۋا» اگەنتتىگى اتالعان مەملەكەتتەردىڭ داۋىس بەرۋدىڭ العاشقى تۋرىندا قاجەتتى داۋىس جيناعانىن حابارلادى. قالعان ورىندارعا نيدەرلاند جانە يتاليا تالاسىپ وتىر. ولار 5-تۋردان كەيىن بىردەي داۋىس جينادى. نيدەرلاندتىڭ سىرتقى ىستەر ءمينيسترى بەرت كۋندەرس ەكى ەلدىڭ بۇل ورىنداردى بىردەي ەتىپ ءبولىپ الۋى تۋرالى ۇسىنىس جاساعان.
بىرىككەن ۇلتتار ۇيىمىنىڭ قاۋىپسىزدىك كەڭەسى 15 مەملەكەتتەن تۇرادى. ولاردىڭ بەسەۋى تۇراقتى مۇشەسى دەگەن ءمارتەبەگە يە (رەسەي, قىتاي, ۇلىبريتانيا, اقش جانە فرانتسيا), ال قالعان 10 مەملەكەت ەكى جىل سايىن سايلانادى. قازاقستان ازيا-تىنىق مۇحيتى ەلدەرىنىڭ اتىنان مالايزيانى الماستىرادى.
استانانىڭ ايقىن جەڭىسى
مالىمەتتەرگە سايكەس, سايلاۋعا قاتىسقان 193 مەملەكەتتىڭ ىشىنەن 138 مەملەكەت قازاقستاننىڭ كانديداتۋراسىن قولداعان.
قازاقستان سىرتقى ىستەر مينيسترلىگى حابارلاعانداي, رەسپۋبليكا بۇۇ-نىڭ ەڭ ماڭىزدى ساياسي ورگانى قۇرامىنا سايلانعان ورتالىق ازياداعى العاشقى مەملەكەت بولدى, وعان ۇيىمنىڭ جارعىسىن, جاھاندىق بەيبىتشىلىكتى جانە قاۋىپسىزدىكتى ۇستاۋ وكىلەتتىگى جۇكتەلدى.
2015 جىلدىڭ 27 قىركۇيەك كۇنى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ نيۋ-يوركتە بۇۇ-نىڭ مەرەيلى 70-ءشى باس اسسامبلەياسىنا قاتىسىپ, بىرقاتار ۇسىنىستار ۇسىنعان: جاھاندىق ستراتەگيالىق باستاما – 2045, ۇيىمنىڭ ەكونوميكالىق جانە الەۋمەتتىك كەڭەسىن جاھاندىق دامۋ كەڭەسىنە اينالدىرۋ, سول سياقتى شتاب-پاتەرىن نيۋ-يوركتەن ازياعا كوشىرۋ, ت.ب.
2017 جىلدان باستاپ قىزمەتىنە كىرىسەتىن بولدى
قازاقستان بۇۇ-نىڭ قاۋىپسىزدىك كەڭەسىنە العاش رەت تۇراقتى ەمەس ءمۇشەسى بولىپ سايلاندى. ونىڭ باستى باسەكەلەسى سانالعان تايلاند 55 ەلدىڭ عانا قولداۋىنا يە بولدى.
تۇراقتى ەمەس مۇشە ەلدەردىڭ اراسىندا وزگەرىستەر بولىپ تۇرادى. جاڭا جىلدان باستاپ قاۋىپسىزدىك كەڭەستەگى انگولا, ۆەنەسۋەلا, يسپانيا, مالايزيا جانە جاڭا زەلانديا ءوز ورىندارىنان كەتەدى.
قارسىلاسىنان باسىم ءتۇستى
قازاقستان جىلدار بويى الەمدىك دەڭگەيدە مويىندالعان ەلدەردىڭ بىرىنە اينالۋ ءۇشىن تىنباي ەڭبەكتەندى. ونىڭ باستى ينيتسياتورى – مەملەكەت باسشىسى نۇرسۇلتان نازارباەۆ.
ول ەلدىڭ ساياسي جانە ەكونوميكالىق تۇراقتىلىعىن قامتاماسىز ەتۋ ءۇشىن كوپتەگەن باستامالاردىڭ يەسى اتاندى. بۇل رەتتە «ۇلت جوسپارى – 100 ناقتى قادام», «بەس ينستيتۋتتىق رەفورما» جانە «نۇرلى جول» باعدارلامالارى دامىعان 30 مەملەكەتتىڭ قاتارىنا كىرۋ ءۇشىن ماڭىزدى ءرول اتقارادى.