ەلباسى نۇرسۇلتان نازارباەۆ اقپارات جانە كوممۋنيكاتسيا ءمينيسترى داۋرەن اباەۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
د.اباەۆ تاياۋدا قۇرىلعان مينيسترلىك قىزمەتىنىڭ بۇگىنگە دەيىنگى ناتيجەلەرى مەن الداعى كەزەڭگە ارنالعان جوسپارلارى تۋرالى باياندادى.
مەملەكەت باسشىسى وتاندىق بۇقارالىق اقپارات قۇرالدارى قىزمەتىنىڭ ساپاسىن ارتتىرۋ قاجەتتىگىنە نازار اۋداردى.
– مينيسترلىك ءدال وسى ماقساتپەن قۇرىلدى. بارلىق الەمدىك, سونىڭ ىشىندە رەسەيلىك باق-تار ءوز ەلىنىڭ ازاماتتارىنىڭ پاتريوتتىق سەزىمىن ارتتىرۋعا, دەر كەزىندە اقپارات ۇسىنۋ جانە بارلىق ماسەلەگە ۋاقتىلى ءۇن قاتۋ ارقىلى سىرتتان كەلەتىن اقپاراتتىق شابۋىلدارعا قالقان بولا وتىرىپ, ءىشكى ساياسي تىنىشتىقتى ساقتاۋعا كومەكتەسەدى. قاجەت بولعان جاعدايدا حالىقارالىق تاجىريبەنى ەنگىزىپ, وسىنداي جۇمىستار اتقارۋ كەرەك. بۇقارالىق اقپارات قۇرالدارى – وراسان كۇش, بۇل, ءاسىرەسە, كوپتەگەن قاتەرى بار ينتەرنەت كەڭىستىككە قاتىستى, – دەدى نۇرسۇلتان نازارباەۆ.
قازاقستان پرەزيدەنتى قازىرگى كەزدە مەملەكەت ەلدىڭ ورنىقتى دامۋىن قامتاماسىز ەتۋ ءۇشىن جۇيەلى شارالار قابىلداپ جاتقانىن, ونى حالىققا ءتيىستى تۇردە جەتكىزۋ قاجەتتىگىن ايتتى.
– بارلىق باق مەنشىك فورماسىنا قاراماستان, ءوز حالقىنىڭ مۇددەسى ءۇشىن جۇمىس ىستەۋگە ءتيىس. بۇل رەتتە مەملەكەتتىك تاپسىرىس اياسىندا بەرىلەتىن قاراجاتتىڭ قاتاڭ ەسەبىن جۇرگىزۋ قاجەت. بۇل ءماسەلەنى زاڭ دەڭگەيىندە رەتتەۋ قاجەت بولسا, سولاي ىستەۋ كەرەك, – دەدى مەملەكەت باسشىسى.
د.اباەۆ ۇيىمداستىرۋشىلىق جۇمىستارى تۇرعىسىنان مينيسترلىكتىڭ قالىپتاسۋ كەزەڭى اياقتالعانىن, جۇكتەلگەن مىندەتتەردى ورىنداۋعا دايىن ەكەنىن مالىمدەدى. بۇل مىندەتتەر باسەكەگە قابىلەتتى اقپاراتتىق كەڭىستىكتى دامىتۋعا جانە ءتۇرلى سالاداعى مەملەكەتتىك ساياساتتى اقپاراتتىق قولداۋدىڭ تيىمدىلىگىن جاقسارتۋعا, تەلەكوممۋنيكاتسيا سالاسىنداعى قىزمەت ساپاسى ستاندارتتارىن جەتەكشى ەلدەر دەڭگەيىنە جەتكىزۋگە, ەلەكتروندىق ۇكىمەتتى اشىق ءارى ەسەپ بەرۋشى مەملەكەت قالىپتاستىرۋ اياسىندا ودان ءارى ىلگەرىلەتۋگە باعىتتالاتىن بولادى.
نۇرسۇلتان نازارباەۆ كەزدەسۋ قورىتىندىسى بويىنشا مەملەكەتتىك اقپاراتتىق ساياساتتى ودان ءارى ىلگەرىلەتۋ, مەملەكەتتىك قىزمەت كورسەتۋدىڭ ءتيىمدى تەتىكتەرىن ەنگىزۋ جانە تەلەكوممۋنيكاتسيالىق ينفراقۇرىلىمدى جەتىلدىرۋ جونىندە بىرقاتار ناقتى تاپسىرما بەردى.