مەنىڭ اتام حاميت كوشەرباەۆ 1943 جىلى 17 جاسىندا ءوز ەركىمەن وتاندى قورعاۋعا اتتانعان. وسى جىلداردىڭ قايعى-قاسىرەتى مەن جەڭىستىڭ ءتاتتى ءدامىن قازىرگى ۇرپاق تەك كينودان, ادەبي كىتاپتاردان وقىپ قانا بىلەدى. مەن, سونىمەن قاتار, ءوز اتامنىڭ اۋزىنان دا ەستىگەن ەدىم.
اتام 1926 جىلى 1 جەلتوقساندا ورال وبلىسىنىڭ تايپاق اۋدانىنداعى سارىتوعاي اۋىلىندا دۇنيەگە كەلگەن. اكەسى تاۋداي, اعالارى كوبدىك, تاكەن, شاباي, سالاحادين 1941 جىلى سوعىس باستالىسىمەن اسكەرگە شاقىرتىلادى. 1943 جىلى 17 جاستاعى اتام حاميت تە ءوز ەركىمەن وتاندى قورعاۋعا اتتانادى.
1943 جىلى كۇزدە اتاسى كوشەرباي سۇيىكتى نەمەرەسىن سوعىسقا اتتاندىرىپ تۇرىپ: «اينالايىن, حاميتجان, سەنى ءسابي كۇنىڭنەن باۋىرىما باسىپ ءوسىرىپ ەدىم. ساداعاڭ كەتەيىن, امان ورال», دەپ ەسكىەسىم اۋىلىنىڭ سىرتىندا ات ۇستىندەگى نەمەرەسىن ءۇش رەت اينالىپ شىعىپ, اق باتاسىن بەرىپ, شىعارىپ سالادى. سوڭعى رەت اتاسىن كورۋى سول ەكەن, اتام سوعىستان ورالعاندا ول كىسى قايتىس بولىپتى. «بالاڭدى وسكەنشە, نەمەرەڭدى ولگەنشە باعاسىڭ» دەگەن وسى ەكەن عوي دەپ وتىراتىن.
اتام سوعىسقا 1943 جىلى كۇزدە تايپاق اۋداندىق اسكەري كوميسسارياتىنان اتتانىپ, №52311 توتسك اسكەري ۋچيليششەسىندە كومانديرلىك كۋرستا وقيدى. سول كەزدە چكالوۆ اتىنداعى اسكەري ۋچيليششەدە ۇشقىشتار دايىنداۋعا ارنالعان ىرىكتەۋ سىناعى وتكىزىلەدى. سوڭعى سىناقتا كرەسلوعا شىركوبەلەك اينالدىرىپتى. كرەسلودان تۇسىسىمەن اتام قۇلاماي, ەسىكتەن تۋرا دالىزگە شىعىپتى. بارلىق سىناقتان مۇدىرمەي وتەدى, ايتسە دە, نەگە ەكەنى بەلگىسىز, كەلەسى كۇنى ونى ۇشقىشتار توبىنا جىبەرمەي, كومانديرلىك توپقا اۋىستىرادى. كومانديرلىك وقۋىن بىتىرىسىمەن كالينين مايدانىندا, سوڭىنان 130-اتقىشتار ديۆيزياسىنىڭ 528-پولكىندە, ياعني ءىىى بەلارۋس مايدانىنىڭ قولباسشىسى, ارميا گەنەرالى ي.د.چەرنياحوۆسكيدىڭ قاراماعىندا بولادى.
ءىىى بەلارۋس مايدانىندا نەمىس-فاشيست باسقىنشىلارىنا قارسى جان اياماي سوعىسىپ, بالتىق بويىنداعى ۆيلنيۋس, كاۋناس, گۋمبينين, ينستەنبۋرگ, ت.ب. قالالاردى ازات ەتۋگە قاتىسادى. شىعىس پرۋسسياداعى ستراتەگيالىق ماڭىزى زور ەجەلگى كەنيگسبەرگ قامال-قالاسىندا كۇشتى قارۋلانعان نەمىس اسكەرلەرىنە قارسى جويقىن سوققى بەرۋگە اتسالىسادى.
كەنيگسبەرگ قامال-قالاسىنا شابۋىل جاساعاندا جاۋدىڭ بوراپ تۇرعان وعىنىڭ استىندا جاۋىنگەرلەر كوپ شىعىنعا ۇشىرايدى. اتامنىڭ الدىنداعى ت-34 تانكى ورتەنىپ, ونداعى ءبىر قازاق, ءبىر ورىس تانكيسىن ورتتەن قۇتقارىپ الادى. قارسى شابۋىل كەزىندە جاۋدىڭ ترانشەياسىنا گراناتا لاقتىرىپ, بىرنەشە ءفاشيستى جەر جاستاندىرادى. ءسويتىپ, كەڭەس جاۋىنگەرلەرى ساپىندا كەنيگسبەرگ قالاسىنا باسىپ كىرەدى. ايتسە دە, وسى كەسكىلەسكەن شايقاستا اياعىنا وق ءتيىپ, گوسپيتالعا تۇسەدى. قازان قالاسىنداعى №5868 گوسپيتالدا سول جاق اياعىنا وپەراتسيا ءساتتى جاسالىپ, امان قالادى. ەمدەلىپ جاتىپ, بۋحگالتەرلىك كۋرستى بىتىرەدى.
وتان ءۇشىن بولعان شايقاستا اتامنىڭ قارۋلاس جولداستارى كوپۇلتتى بولعانىمەن, ءبارىنىڭ ماقساتى بىرەۋ – جاۋدى تالقانداپ جەڭىسپەن ەلگە قايتۋ ەدى. ال سوعىستا كورسەتكەن ەرلىگى ءۇشىن اتام ءى دارەجەلى «وتان سوعىسى», ءىى جانە ءىىى دارەجەلى «داڭق» وردەندەرىمەن, «ەرلىگى ءۇشىن», «كەنيگسبەرگ قالاسىن ازات ەتكەنى ءۇشىن», «گەرمانيانى جەڭگەنى ءۇشىن», ت.ب. 17 مەدالمەن ماراپاتتالادى. جالپى, كوشەرباي اۋلەتىنەن 6 ادام سوعىسقا قاتىسقان. تاۋداي اتام روستوۆ جەرىندە قازا تاپقان. كوبدىك اعامىزدان قارا قاعاز كەلگەن. تاكەن كوكەمىز سوعىستا العان جاراقاتىنىڭ سالدارىنان ەلگە ورالعان سوڭ قايتقان. شاباي مەن سالاحادين جارالانسا دا ەلگە امان-ەسەن كەلگەن.
ال اتام مۇگەدەك بولىپ 1946 جىلى ەلگە ورالعاننان كەيىن بازارتوبە سوۆحوزىندا 35 جىلدان استام بۋحگالتەر بولىپ ىستەپ, ءىى-توپتاعى ۇوس مۇگەدەكتىگىمەن قۇرمەتتى ەڭبەك دەمالىسىنا شىعادى. ءومىر جولىندا ءوز جەرلەستەرىنىڭ لايىقتى سىي-قۇرمەتىنە بولەنگەن حاميت كوشەرباەۆتىڭ اتىنا بازارتوبە اۋىلىنداعى كورىكتى كوشەلەردىڭ ءبىرى بەرىلگەن. زايىبى كاليما قۇسانقىزى ەكەۋى 10 بالا تاربيەلەپ وسىرگەن. ارتىندا قالعان ۇرپاقتارى ونىڭ ەرلىگى مەن ەسىمىن ەشقاشان ۇمىتپايمىز.
رينات كوشەرباەۆ,
نەمەرەسى
ورال