ەل تاريحىنىڭ ەڭ شەشۋشى ءساتتەرىندە ايەلدەر قاۋىمى بولاشاق ۇرپاق ءۇشىن دانالىق تانىتىپ, وتاننىڭ تىنىشتىعىن, وتباسىنىڭ ءبىرلىگىن ساقتاپ كەلگەنى بەلگىلى. مىنە, تاراز ءتورىندە وتكەن «ايەلدەر سىبايلاس جەمقورلىققا «جوق» دەيدى» اتتى رەسپۋبليكالىق كونفەرەنتسيا بۇكىل الەم ءۇشىن وزەكتى ماسەلە, ورتاق پروبلەمانىڭ ءبىرىنە اينالىپ وتىرعان سىبايلاس جەمقورلىقپەن كۇرەستە ايەلدەر قاۋىمىنىڭ دا اتقارار ءرولى وتە زور ەكەنىن بايقاتتى.
كونفەرەنتسيا جۇمىسىنا قاتىسقان قازاقستان رەسپۋبليكاسىنىڭ مەملەكەتتىك حاتشىسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا ەلىمىزدەگى ايەلدەر قاۋىمىن سىبايلاس جەمقورلىققا قارسى مادەنيەتتى قالىپتاستىرۋعا, ازاماتتاردىڭ قۇقىقتىق مادەنيەتىن ارتتىرۋعا بەلسەندى تۇردە اتسالىسۋعا شاقىردى.
– سىبايلاس جەمقورلىقپەن پارمەندى كۇرەسۋ ءۇشىن قۇقىقتىق ءتۇسىندىرۋ جۇمىسىنىڭ دەڭگەيى مەن ساپاسىن ارتتىرۋدىڭ ماڭىزى زور, – دەدى گۇلشارا ناۋشاقىزى. – ەلباسى نۇرسۇلتان نازارباەۆتىڭ كونستيتۋتسيالىق ءتارتىپتى قورعاۋ, وسى سالادا ءتيىمدى جۇمىس جۇرگىزۋ, قوعامنىڭ مەملەكەتكە جانە ونىڭ ينستيتۋتتارىنا سەنىمىن نىعايتۋ جونىندەگى تاپسىرماسىن ورىنداۋ بۇگىنگى كۇننىڭ باستى مىندەتى بولىپ تابىلادى. جەمقورلىقپەن كۇرەستە ەڭ الدىمەن بالا تاربيەسى مەن ءبىلىم بەرۋ جۇيەسىنە ءمان بەرۋ قاجەت. «ءبىلىم – الەمدى وزگەرتۋگە كۇشى جەتەتىن ەڭ قۋاتتى قارۋ» دەگەن ەكەن ءبىر كەزدەرى نوبەل سىيلىعىنىڭ لاۋرەاتى نەلسون ماندەلا. بۇگىندە ەلىمىزدەگى ءبىلىم سالاسى قىزمەتكەرلەرىنىڭ 74,4 پايىزىن, مەملەكەتتىك قىزمەتكەرلەردىڭ 55 پايىزىن ايەلدەر قۇرايدى. ياعني, بۇل ماسەلەدە وتباسىنىڭ بەرەكەسى مەن تىنىشتىعىن ساقتاۋشى ايەل قاۋىمىنا جۇكتەلەر مىندەت وتە زور.
سىيبايلاس جەمقورلىق جۇرتتىڭ ادال ەڭبەك پەن تەرەڭ ءبىلىم الۋعا دەگەن قۇشتارلىعىن تومەندەتەدى. پاتروناجدىق قارىم-قاتىناس بۇل جەگىقۇرتتىڭ دامۋىنا قولايلى ورتا جاساپ, باسقارۋ جۇيەسى مەن مەملەكەتتىك اپپاراتتىڭ كورپوراتيۆتى مادەنيەت ساپاسىن كۇرت تومەندەتەدى.
– سىبايلاس جەمقورلىقتىڭ تاعى ءبىر تەرىس سالدارى – قوعامدا كيكىلجىڭ, شيەلەنىس وشاقتارىن تۋىنداتۋى, – دەدى بۇل جونىندە مەملەكەتتىك قىزمەت سالاسىنداعى ايماقتىق حاب باسقارۋ كوميتەتىنىڭ توراعاسى ءاليحان بايمەنوۆ. – ەگەر مەملەكەتتىك ساتىپ الۋلاردا جانە ينۆەستيتسيالار, قوعامدىق يگىلىكتەر, مىسالى, جەر تەلىمدەرى, پاتەرلەر, بالاباقشا مەن مەكتەپتەردەگى جاريالىلىق, ءادىل جانە ادال جولمەن بولىنبەي, «بارماق باستى, كوز قىستى» ارقىلى شەشىلەتىن بولسا بۇل الەۋمەتتىك شيەلەنىستەرگە نەگىز بولاتىنىن بىلەمىز. جەمقورلىق ايەلدەردىڭ شىنايى تابيعاتىنا جات.
شىنىندا ايەلدەر ىقىلىم زاماننان بەرى ءوز ۇيلەرىن, وشاقتارىن تارتىپتە, تازالىقتا, ادالدىقتا ۇستاۋعا ۇيىتقى بولعان. قاي زاماندا بولماسىن ايەلدەر ادىلدىك پەن تۇراقتىلىققا ۇمتىلىپ, ۇرپاعىنىڭ دامۋىنا جاعداي جاسايدى. كونفەرەنتسيادا, سونداي-اق, گرۋزيا مەملەكەتتىك قىزمەت بيۋروسى ديرەكتورىنىڭ ورىنباسارى مايا دۆاليشۆيلي, حالىقارالىق سىبايلاس جەمقورلىققا قارسى اكادەمياداعى سىرتقى بايلانىستار باسقارماسىنىڭ باسشىسى سيمونا ماري بايانداما جاساپ, سىبايلاس جەمقورلىققا قارسى كۇرەس جۇيەسى جانە بۇل ماسەلەدەگى ايەلدەردىڭ ءرولى مەن ماڭىزىنا كەڭىنەن توقتالدى.
ورالحان ءداۋىت,
«ەگەمەن قازاقستان»
جامبىل وبلىسى