بۇگىن قاراعاندى وبلىسىنا قاراستى «سپاسسك» وقۋ-جاتتىعۋ ورتالىعىندا «ايبىن» ەكىنشى رەسپۋبليكالىق ءاسكەري-پاتريوتتىق جاستار جيىنى باستالادى. وعان اسكەري-پاتريوتتىق كلۋبتاردىڭ, رەسپۋبليكالىق (وبلىستىق) مەكتەپ-ينتەرناتتاردىڭ تاربيەلەنۋشىلەرى, جوعارى وقۋ ورىندارىنداعى اسكەري كافەدرالاردىڭ ستۋدەنتتەرى قاتىسادى.
بيىلعى جىلى وسى ءىس-شاراعا العاش رەت جوعارى وقۋ ورىندارىنىڭ اسكەري كافەدرالارىنان 52 قىز بالا قاتىسادى. قازاقستاننىڭ بارلىق ايماعىنان شاراعا 800-دەن اسا ادام قاتىسادى دەپ جوسپارلانىپ وتىر.
اتالعان جيىن بارىسىندا اسكەري-قولدانبالى سپورت ءتۇرى جانە جاۋىنگەرلىك دايارلىق, اسكەريلەندىرىلگەن ويىندار, سونداي-اق, ينتەللەكتۋالدىق بايقاۋلار مەن باسقا دا جارىستار وتەدى.
بيىلعى جىلى اسكەري-پاتريوتتىق جيىننىڭ باعدارلاماسىنا جاڭا وزگەرىستەر ەنگىزىلدى. وتكەن جىلمەن سالىستىرعاندا, اسكەري-سپورت ءتۇرى بويىنشا جارىستار سانى ەكى ەسەگە ازايدى. سونداي-اق, جاس بۋىننىڭ زياتكەرلىك جانە ينتەللەكتۋالدىق قابىلەتىنە ەرەكشە نازار اۋدارىلاتىن بولادى.
سونىمەن قاتار, قاتىسۋشىلار وزدەرىنىڭ دەنە ماشىقتارىن 100% كورسەتۋى قاجەت. اسكەري-پاتريوتتىق جيىندا «مەنىڭ روبوتىم» بايقاۋى بويىنشا ءار توپ روبوت ۇلگىلەرى مەن روبوتتالعان جۇيەنىڭ ۇلگىلەرىن, سونداي-اق, ۇشۋ اپپاراتتارىنىڭ جوبالارىن كورسەتەدى. «ايبىن» جيىنىنا قاتىسۋشىلار ەلىمىزدەگى تانىمال تۇلعالارمەن تانىسا وتىرىپ, ەلىمىزدىڭ قالىپتاسۋى تۋرالى قىسقا مەتراجدى فيلمدەر فەستيۆالىندە ءوز تالاناتتارىن كورسەتە الادى.
بۇدان وزگە, كورسەتىلىم ساباقتارىندا قارۋ-جاراق, اسكەري تەحنيكا مەن جابدىقتار, «ارلان», «نوماد» بروندى ترانسپورتەرلەرى, كوماندالىق-شتابتىق ماشينالاردىڭ جاڭا ۇلگىلەرى كورسەتىلەدى.
«ەگەمەن-اقپارات»