وقىرمان
...جاڭالىعىن جەتكىزەدى
جاڭا زاۋىت اشىلدى
سارىاعاش اۋدانىندا ايىنا 50 مىڭ دانا بولكە مەن باتون ناندارىن شىعاراتىن جاڭا زاۋىت اشىلدى. مۇندا ساپالى ءارى تاڭداۋلى نان ونىمدەرىنىڭ 30 ءتۇرى پىسىرىلەدى. جاڭا نىساننىڭ اشىلۋ سالتاناتىنا قاتىسقان ءوڭىر باسشىسى حالىقتى جوعارى ساپالى نان ونىمدەرىمەن قامتاماسىز ەتۋ باستى ماقسات ەكەنىن اتاپ ءوتتى. سونىمەن قاتار, ەل تاۋەلسىزدىگىنىڭ 25 جىلدىعى قارساڭىندا پايدالانۋعا بەرىلىپ وتىرعان نان زاۋىتىنىڭ جۇمىسىنا ساتتىلىك تىلەدى.
اۋداننىڭ ورتالىعىندا ورنالاسقان «ياسسى-نان» جشس جوباسىنىڭ جالپى قۇنى 300 ملن. تەڭگە. سەرىكتەستىك ديرەكتورى ناسيبا اتاەۆانىڭ ايتۋىنشا, اۋدانداعى ازىق-ت ۇلىك دۇكەندەرىندە اتالعان نان زاۋىتىنىڭ ونىمدەرى ساتىلۋدا. زاۋىتتاعى «ۆوسحود» نان ءپىسىرەتىن پەش قۇرىلعىسى كورشى رەسەيدەن الىنعان. بۇگىندە وندا 30 ادام جۇمىسپەن قامتىلعان. الداعى ۋاقىتتا كاسىپكەر كونديتەر ونىمدەرىن شىعاراتىن تسەح اشۋدى كوزدەپ وتىر.
كەنجە ەركىن
وڭتۇستىك قازاقستان
وبلىسى,
سارىاعاش اۋدانى
...ريزاشىلىق بىلدىرەدى
قولداۋ كوردى
اققۇل وزبەكوۆتىڭ شىن تەگى – مولدامۇحامەدوۆ. ول ەجەلدەن قۇران ۇستاپ, بالا وقىتقان ءدىندارلار اۋلەتىنىڭ ۇرپاعى. كەڭەس وكىمەتى سولاقاي ساياساتىنىڭ سالدارىنان اتالارى قۋعان-سۇرگىنگە ۇشىراپ, ەل اۋماعىنان كەتكەن. ارىپ-اشىپ ءجۇرىپ, وزبەكستانعا قونىستانعان. ءتىپتى, اتاتەگىن اۋىستىرۋعا دا ءماجبۇر بولعان. اللانىڭ اق جولىن ۇستانعان اتاسى مەن اكەسى ۇرپاعىنىڭ تۋعان توپىراققا ورالۋىن ءوسيەتتەگەن. سول سەبەپتەن, اققۇل سابىربەك ۇلى تاۋەلسىزدىكتەن كەيىن اتا, اكە اماناتىن ورىنداۋ ءۇشىن ەلگە ورالىپتى.
ازىرگە قازاقستاندا ۋاقىتشا تۇرۋعا رۇقسات الىپ, ەڭبەك ەتىپ جۇرگەن ازامات مەكتەپ جاسىنداعى بالالارىنا قۇجات راسىمدەۋ بارىسىندا كوپتەگەن قيىندىقتارعا تاپ بولعان. بالالارىن وقۋدان قالدىرماۋعا تىرىسقان اكە امالى تاۋسىلىپ, «نۇر وتان» پارتياسىنىڭ اتىراۋ وبلىستىق فيليالىنان كومەك سۇراۋعا ءماجبۇر بولدى. «ءۇمىتىم الدامادى. پارتيانىڭ ارالاسۋىمەن بالالارىمنىڭ قۇجاتتارىن رەتتەدىم. قازىر ەكەۋى دە ورتا مەكتەپتە وقىپ ءجۇر. ەلدىڭ باس پارتياسىنا العىسىم شەكسىز. بالالارىمنىڭ قازاق تىلىنەن ۇزدىك تانىلۋى انالارىنىڭ ارقاسى. ۇلتى وزبەك بولعانمەن قازاقتىڭ سالت-ءداستۇرىن قاتاڭ ۇستانىپ, 30 جىل قازاق تىلىنەن ءدارىس بەرگەن ۇلاعاتتى ۇستاز» – دەيدى اققۇل سابىربەك ۇلى.
ەلميرا تۇڭعاتاروۆا,
«نۇر وتان» پارتياسى اتىراۋ وبلىستىق
فيليالىنىڭ ءباسپاسوز
حاتشىسى
اتىراۋ
...قاۋىپ ەتەدى
تۇسىنىكسىز جارنامادان تۇڭىلدىك
بەلگىلى جازۋشى-جۋرناليست اعامىزدىڭ: «الماتىدا جۇرسەم دە شەتەلدە جۇرگەن سياقتىمىن. قالا تولى جارناما. بۇرىن ورىسشاسى كوپ جازىلعاندا ەپتەپ ءتۇسىنۋشى ەدىم, ەندى نە جازۋ ەكەنىن مۇلدە ءتۇسىنبەيمىن», – دەپ الەۋمەتتىك جەلىدە كەيىس بىلدىرگەنىندەي, قالامىزداعى عيمارات اتاۋلىنىڭ ماڭدايشاسىنداعى شەتەل تىلىندەگى يقى-جيقى قۇلاقتاندىرۋلاردان كوز سۇرىنەدى. سوندا دەيمىز-اۋ, بۇنىمىز جارناما جونىندەگى قابىلدانعان زاڭدى بەلدەن باسقانىمىز با؟! ءبىز بىلەتىن كەز كەلگەن جارناما مەملەكەتتىك ءتىلدە بەرىلىپ بارىپ, سودان سوڭ وزگە ءتىل قوسارلاناتىنى ۇمىت قالىپ وتىر. وسىنى قاداعالايتىن قۇزىرلى ورىندار نە دەيدى؟
ەرسۇلتان ماعجان
الماتى
...تىلەگىن ايتادى
ەل ىقىلاسىنا بولەنگەن جاندار
مەن ءبىراز بۇرىن ناۋقاستانىپ «وبلىستىق تۋبەركۋلەزگە قارسى ديسپانسەرلىك اۋرۋحانا» مەملەكەتتىك مەكەمەسىندە ءتورت اي ەمدەلدىم. وسى مەرزىمدە اۋرۋحانا دارىگەرلەرى مەن مەدبيكەلەرى ەم-دومىن ۋاقتىلى جاساپ, تىكەسىنەن تىك تۇرىپ قىزمەت ەتتى. ءبولىم مەڭگەرۋشىسى ەرلان يلياسوۆ پەن اعا مەدبيكە جەڭىسكۇل ساتىبالديەۆا سياقتى اق حالاتتى ابزال جانداردىڭ ءوز ىستەرىنە اسقان جاۋاپكەرشىلىكپەن قاراپ, ناۋقاستىڭ كوڭىلىنەن شىعۋعا بارلىق كۇش-جىگەرىن سالاتىنى كورىنىپ-اق تۇردى. تەك جالعىز مەنىڭ عانا ەمەس, بارلىق ناۋقاستىڭ بابىن تاۋىپ, ەمىن بەرۋگە, دەنساۋلىعىن ساۋىقتىرۋعا كىرشىكسىز قىزمەت كورسەتۋى ۇنادى. اۋرۋحانادان شىققاننان كەيىن ۇستىمىزدەگى جىلدىڭ ناۋرىز ايىنا دەيىن ەسەپتە تۇرىپ, امبۋلاتوريالىق ەم قابىلدادىم. وسى كەزدە دە ۇنەمى بايلانىس جاساپ, ەمنىڭ دۇرىس جاسالۋىن قاداعالاپ وتىردى. ناۋقاستارعا تۋىسىنداي قاراپ, ءار ناۋقاستىڭ كوڭىلىن اۋلاپ جۇرگەن وسى ۇجىم ءدارىگەرلەرى مەن مەدبيكەلەرىنىڭ ەڭبەكتەرى جەمىستى بولۋىنا انالىق تىلەكتەستىگىمدى ءبىلدىرەمىن.
اقپاتىش قالمەن,
ارداقتى انا
اقتوبە وبلىسى,
مارتوك اۋدانى,
قاراتوعاي اۋىلى
...وي بولىسەدى
تىيىم سالعانى دۇرىس
مەكتەپ وقۋشىلارى ءۇشىن حيدجاب پەن قىسقا بالاقتى شالبارعا تىيىم سالىنۋى دۇرىس دەپ ويلايمىن. الەۋمەتتىك جەلىدەگى ءبىر وقىرمان مەكتەپكە ورامال تاعىپ بارۋ كەرەك, ول اللانىڭ بۇيرىعى دەپتى. اللانىڭ حاق دىنىنە ەشكىم دە ءشۇبا كەلتىرمەيدى, بىراق, مەكتەپ ورانىپ, حيدجاب تاعىپ باراتىن ورىن ەمەس! اركىم ءوز ءدىني سەنىمدەرىنە ساي كيىنىپ بارىپ, بىرەۋ قىزىل ورامال, بىرەۋ سارى حيدجاب تاعىپ بارسا ناعىز الا-قۇلاعا اينالماي ما؟ مەكتەپتىڭ ساليقالى وقۋ ورداسى ەكەنىن ەستەن شىعارىپ الماۋ كەرەك. ۇكىمەت شوتلانديالىق بەلدەمشە (كيلت) كيگىزىپ قويمايتىنى انىق قوي, دەمەك بىركەلكى فورماعا, سالىنعان تىيىمعا تۇسىنىستىكپەن قاراۋ كەرەك. كەيبىر ەلىمىزدەگى ءدىني ءتۇسىنىكتەرمەن بالانىڭ ميىن قازبالاماعان ءجون.
اباي ايماعامبەتوۆ
الماتى وبلىسى