مەكتەپ تۇلەكتەرى سپورت سارايى مەن ستاديون سالىپ بەردى
ورداباسى اۋدانى تورتكۇل اۋىلدىق وكرۋگىنە قاراستى قىزىلجار اۋىلىنداعى جالپى ورتا مەكتەپتىڭ تۇلەكتەرى 20 جىلدىقتارىنا وراي سپورت زال سالىپ بەرىپتى.
مىڭعىرعان مالدى ايداپ جۇرگەن كاسىپكەر سالسا جارار, ال, مەكتەپ تۇلەكتەرىنىڭ ءجونى باسقا عوي.
«قىزىلجار» اۋىلىنا تارتىپ كەتتىك. ەسكەرتپەي كەلگەنبىز. ءبىز بارعاندا ەل تاۋەلسىزدىگىنىڭ 25 جىلدىعىنا وراي جاسوسپىرىمدەر اراسىندا وبلىستىق تۋرنير ءوتىپ جاتىر ەكەن.
كەرىسكەدەي كەڭ زال. شارشى الاڭدا 2005-2008 جىلى جانە 2003-2004 جىلى دۇنيەگە كەلگەن بارماقتاي بالالار سويقان ۇرىس سالىپ جاتىر. قازاقستان الەمگە بوكس سپورتىمەن دە اتى شىققان مەملەكەت, دۇنيەجۇزىندە ۇزدىك ۇشتىككە سان رەت كىرگەن. سونى مىنا بارماقتاي بالالار اقتاپ جاتىر. باس-كوزگە توپەلەپ, جابايى ۇرىس سالىپ جۇرگەن جوق, وزدەرىنە ءتان ماشىقتارى بار, سوعان سالعىسى كەلەدى.
جارىستىڭ باس تورەشىسى وسى سارايدى سالۋعا مۇرىندىق بولعان ازاماتتاردىڭ ءبىرى ەرحان داۋەتايمەن تانىستىرعان. ەكى يىعىنا ەكى كىسى مىنگەندەي دەنەلى, مىعىم سويلەيتىن ەرحانىمىزدىڭ ءوزى بوكسشى ەكەن. 1979 جىلى دۇنيەگە كەلگەن 20 جىگىت قىزىلجار جالپى ورتا مەكتەبىن بىتىرگەندەرىنە 20 جىل تولۋ قۇرمەتىنە نە سىي جاساۋ كەرەكتىگىنە كەلگەندە اقىلداسىپ, سپورت سارايىن سالىپ بەرۋگە ۋاعدالاسىپتى.
قىزىق بولعاندا, سىرتتان ەشقانداي جۇمىسشى تارتپاعان, ىرگەتاستى وزدەرى قۇيعان, قابىرعانى وزدەرى ورگەن, شاتىردى وزدەرى جاپقان. سىلاقشى دا, اعاش, تەمىر شەبەرى دە وزدەرى.
– ىشىمىزدە ارتىق دۇنيەسىمەن ەرەكشەلەنەتىن ەشكىم جوق, سوندىقتان جالدامالى قۇرىلىسشىلارعا اقشا تولەۋدى ءجون كورمەدىك, – دەيدى ەرحان. – قاراجات ۇنەمدەۋ كەرەك بولدى. ارينە, ءبىز جۇمىس باستاعاندا تاس, قۇم تاعى باسقا كەرەك قۇرىلىس ماتەريالدارىنان كومەكتەسكەن باۋىرلارىمىز بولدى, ولارعا اللا رازى بولسىن.
ەرحاننىڭ بوكسشى ەكەندىگىن ايتتىق. كورشىلەس وبلىستاردا جاتتىقتىرۋشى بولىپ جۇمىس جاساعان ول اۋىلىنا كەلگەندە كىشكەنتاي ىنىلەرىنىڭ بوكسقا قۇمارتاتىندىعىن, مۇمكىندىكتەرى جوقتىعىن بايقايدى. سودان سوڭ ءبىر قورا بالانى ۇيىرمەگە جازدىرىپ, ءوزى بوكس ونەرىنە دايىنداي باستاعان. شاعىن مەكتەپتىڭ زالى دا شاعىن. ءتۇرلى ۇيىرمەلەردەن بوسامايدى. ەرتە كوكتەمنەن قوڭىر كۇزگە دەيىن بالالاردى ءوز ءۇيىنىڭ اۋلاسىندا جاتتىقتىرعان ەرحان قاباعى قاتۋ قىس كەلگەندە امالسىز ءوز ءۇيىنىڭ زالىنا كىرگىزەدى. شاكىرتتەرى سەنىمىن اقتاعان. اراسىندا وبلىستىق جارىستا وزا شاۋىپ بايگە العانى بار.
بىراق, جاعداي كەلىسپەگەن جەردە تۇپكىلىكتى ناتيجەگە جەتۋ قيىن.
جۇمىسى ونبەگەنىنە نارازى بولعان ەرحان قولىن ءبىر سىلتەپ, استاناعا كەتەدى.
مەكتەپ تۇلەكتەرىنىڭ تالانتتى ىنىلەرىنىڭ سپورت ۇيىرمەلەرىنە قاتىسا الماي جۇرگەندىگى قابىرعالارىنا ايازداي باتسا كەرەك, سپورت سارايىن سالۋعا ءبارى قۇلشىنادى.
ماۋىزداي 20 جىگىت جان-جاقتان كىرىسىپ بەرگەندە نار جولىندا جۇك قالا ما؟!
ەرحان, ماقسات, ابسەيىت, داۋلەت, قۋاندىق, نۇربول, مۇحان, قايرات, ەرجان, كارىم, ەرعالي, بەكزات, قانات, ءبىرجان سياقتى جىگىتتەردىڭ ەندىگى ماقساتى سپورت سارايىن كەڭەيتىپ, قوسالقى بولمەلەر سالۋ. كۇش-جىگەر, ۇيىمشىلدىق بار, قارجى تابىلادى.
ەرحان استانادان اۋىلعا ورالماقشى. قىزىلجاردىڭ بوكس دەسە ىشكەن اسىن جەرگە قوياتىن كوگەنكوزدەرىن ءوزى باۋلىماق.
جالپى, بۇل اۋىل جىگىتتەرىنىڭ ءبىر ءۇيدىڭ بالاسى, ءبىر قولدىڭ سالاسىنداي ۇيىمشىلدىعى بىزگە ۇنادى.
بۇدان بۇرىن 1977 جىلى دۇنيەگە كەلگەن تۇلەكتەر اۋىل جاستارىنا سىي رەتىندە اشىق ستاديون سالىپ بەرىپتى. جان-جاعىنا ساياسى مول تەرەك ەگىلگەن ستاديون فۋتبول ويىنىنا لايىقتالعان. جۇگىرۋ, جاتتىعۋ جاساۋ الاڭدارى بار. بەرگى جاعىنداعى بوس الاڭقايعا 1979 جىلعى ورەندەر ءجۇز ءتۇپ الما اعاشىن ەككەن. وزدەرى قۇدىق قازىپ, سۋ شىعارعان. «بولاشاقتا بۇل جەرگە بالالار ساياباعىن سالامىز» دەيدى.
شىنىن ايتساق, قىزىلجاردان قاتتى قۋانىپ قايتتىق. وي, مىنالار ناعىز ازامات قوي. قارجى تاپشىلىعى قىسىپ, ەكى قولدى ءبىر ەتە الماي تۇرعاندا اۋىل تۇلەكتەرى ستاديون سالعان. سپورت سارايىن سالعان.
الما باۋى بار. ەندى بالالار ساياباعىن سالماق.
ەكى جۇزدەي عانا ءتۇتىنى بار شاعىن اۋىل وبلىس بىرىنشىلىگىن وتكىزىپ جاتىر. 200-ءدىڭ ۇستىندە بوكسشى كەلگەن. وعان باپكەرلەردى, تورەشىلەردى قوسىڭىز. شاعىن اۋىلدا قوناقۇي دەگەن اتىمەن جوق. ەرحان باستاعان جىگىتتەر ءۇي-ۇيگە ءبولىپ الدىق دەيدى. نامىسقا تىرىسىپ كۇنىنە ەكى قوي سويىپ كۇتىپ جاتىر.
بۇلار «مەملەكەت ماعان نە بەرەدى» دەمەيدى, ءوزىنىڭ وتانىنىڭ كوركەيۋىنە وسىلايشا ۇلەس قوسىپ جاتىر.
ازاماتتار-اي. قازاقتىڭ مىقتىلىعى بىرلىگىندە عوي.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى,
ورداباسى اۋدانى