*4 ماۋسىم – قازاقستان رەسپۋبليكاسىنىڭ مەملەكەتتىك رامىزدەر كۇنى
ءسوز جوق, جانىڭا قۋات بەرەدى. استانانىڭ قاق ورتاسىنداعى تۋتوبەگە كوز تىكسەڭ, كادىمگىدەي بويىڭدى ءبىر كەرەمەت سەزىم بيلەيدى. رۋحتانىپ قالاسىڭ. ازاتتىق تۋرالى ۇعىم-تۇسىنىكتىڭ ارقاۋى تۋتوبە ىسپەتتى.
بايراعى بار, ەلتاڭباسى بار, ءانۇرانى بار ەلدەردىڭ قاتارىن تولىقتىرعانىمىزعا بيىل, قۇداي قالاسا, شيرەك عاسىر تولادى. تاۋبە ەتەتىنىمىز, تورتكۇل دۇنيەدە سانى قازاقتى ەكى-ءۇش وراپ الاتىن قانشاما حالىق ازاتتىعىنا ءالى كۇنگە دەيىن قول جەتكىزە الماي وتىر. سوعان قاراپ, شۇكىرشىلىك ەتەمىز. قايراتتانا تۇسەتىنىمىز – شەكارامىزدى شەگەندەپ, تاۋەلسىزدىكتىڭ تولىق نىشاندارىن تۇگەندەپ العانىمىزبەن, قاۋىپسىزدىك بۇلتى ءالى سەيىلە قويعان جوق. سول سەبەپتى, بۇرىنعىدان دا پاتريوت, بۇرىنعىدان دا ۇلتجاندى بولۋىمىز كەرەك.
پاتريوتتىق دەمەكشى, وتانعا دەگەن سۇيىسپەنشىلىك مەملەكەتتىك رامىزدەردى ارداقتاۋدان باستالادى ەمەس پە؟! ايتپاقشى, بىلتىر «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭعا ەنگىزىلگەن وزگەرىستەر مەن تولىقتىرۋلار ءپاتريوتيزمدى ۇلىقتاۋ شارالارىمەن استاسىپ جاتىر. سونداي-اق, زاڭدا مەملەكەتتىك رامىزدەردى قولدانۋ ءتارتىبىن كەڭەيتۋ, ناسيحاتتاۋ جانە ولاردى قولدانۋ جونىندە ۇكىمەتتىڭ جانە ۋاكىلەتتى ورگاننىڭ قۇزىرىن ناقتىلاۋ, قازاقستان رەسپۋبليكاسىنىڭ مەملەكەتتىك رامىزدەرى كۇنىن اتاپ ءوتۋدىڭ ەرەجەسىن ازىرلەۋ قاراستىرىلدى.
– ەلدىكتىڭ بەلگىسى عوي, جىل سايىن 4 ماۋسىمدا ەلىمىزدە مەملەكەتتىك رامىزدەر كۇنى مەرەكەلەنەدى. وسى كۇنى سالتاناتتى تۇردە قازاقستان رەسپۋبليكاسىنىڭ تۋى كوتەرىلىپ, قازاقستان رەسپۋبليكاسىنىڭ مەملەكەتتىك گيمنى ورىندالادى. ايتپاقشى, بۇگىن وتانىمىزدىڭ تۇكپىر-تۇكپىرىندە ءبىر مەزەتتە ساعات 12.00-دە ءانۇران شىرقالاتىن بولادى.
سونداي-اق, مەملەكەتتىك ءرامىزدەر كۇنىن مەرەكەلەۋ شەڭبەرىندە جاڭا نىسانداردىڭ اشىلۋى, اكىمشىلىك مەملەكەتتىك قىزمەتشىلەردىڭ انت قابىلداۋى, مەدالداردى, توسبەلگىلەردى, ۆەدومستۆولىق ناگرادالاردى, قۇرمەت گراموتالارى مەن العىس حاتتاردى تابىستاۋ جۇزەگە اسىرىلادى. كىتاپحانالار مەن مۋزەيلەردە مەملەكەتتىك رامىزدەرگە ارنالعان تاقىرىپتىق كورمەلەر مەن ەكسپوزيتسيالار وتكىزىلەدى. مەملەكەتتىك رامىزدەردى ءدارىپتەۋگە, ءوز ەلىنە دەگەن ماقتانىش جانە وتانىنا دەگەن ءسۇيىسپەنشىلىكتى قالىپتاستىرۋعا, تاربيەلەۋگە باعىتتالعان بۇدان دا باسقا كونكۋرستار, ۆيكتورينالار ۇيىمداستىرىلادى. وسىنىڭ بارلىعى قازاقستان رەسپۋبليكاسى ۇكىمەتىنىڭ ارنايى قاۋلىسىمەن بەكىتىلگەن, – دەيدى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ باس ساراپشىسى جومارتبەك ايمەنوۆ.
وسىلايشا قۇزىرلى ورىندار تاراپىنان وسكەلەڭ ۇرپاقتىڭ ساناسىنا ۇلتجاندىلىق رۋحىن, پاتريوتيزم ءنارىن سىڭىرۋدە ۇلكەن شارالار اتقارىلىپ جاتىر. جاستارىمىزدىڭ وزدەرىنىڭ دە مەملەكەتتىك رامىزدەردى ەرەكشە باعالايتىنىنا كۋا بولىپ ءجۇرمىز عوي. اسىرەسە, تۋعان ەلدەن جىراقتا جۇرگەن قازاقستاندىق ستۋدەنتتەردىڭ كوك بايراقتى كوتەرىپ تۇسكەن سۋرەتتەرى وسىنىڭ دالەلى.
بيىلعى وتكەن پارلامەنت ءماجىلىسىنىڭ سايلاۋىنا بايقاۋشى رەتىندە قاتىسقان رەسەي مەملەكەتتىك دۋماسىنىڭ ۆيتسە-سپيكەرى ۆلاديمير ۆاسيلەۆ قازاقستاندىقتاردىڭ مەملەكەتتىك رامىزدەرىن جوعارى باعالايتىندىعىنا ريزا بولدى. «سايلاۋ ۋچاسكەلەرى اشىلار تۇستا, تاڭعى ساعات 7-دە مەملەكەتتىك گيمننىڭ ورىندالۋى وتە قاتتى ۇنادى. بارلىعى قولىن جۇرەك تۇسىنا قويىپ, اقىرىن شىرقادى. ماعان قاتتى اسەر ەتتى», – دەدى ول.
مەملەكەتتىك رامىزدەردى كۇللى دۇنيەگە تانىتۋدىڭ, وسكەلەڭ ۇرپاققا ۇلتجاندىلىق رۋحىن دارىتۋدىڭ ەڭ ءبىر وزىق ءداستۇرى سپورتشىلاردىڭ جەتىستىكتەرى بولىپ تابىلادى. ال ونىڭ ىشىندە وليمپيادانىڭ ورنى بولەك. مەملەكەتتىڭ مارتەبەسىن كوتەرىپ, رامىزدەرىن اسقاقتاتاتىن ويىندار. ەلىمىز تاۋەلسىزدىك العالى بەرى جازعى وليمپيا ويىندارىنا ەكى مارتە تۋ ۇستاپ شىققان (اتلانتا, سيدنەي) ەرماحان ىبرايىموۆ قانا. افينا وليمپياداسىندا بۇل قۇرمەتكە اسحات جىتكەەۆ يە بولسا, بەيجىڭدە باقىت احمەتوۆ الىپ شىقتى. لوندوندا نۇرماحان تىناليەۆ كوك تۋدى جەلبىرەتكەن وليمپيادادا قازاق سپورتشىلارىنىڭ مەرەيى ۇستەم بولدى.
ال الداعى ريودا كوك تۋدى ۇستاۋعا لايىقتى وعىلاندارىمىز جەتكىلىكتى. ەندەشە, برازيليا تورىندە كوك تۋىمىز جەلبىرەپ, ءانۇرانىمىز سان رەت شىرقالادى دەپ سەنەمىز. «كوك تۋدىڭ جەلبىرەگەنى, قازاقتىڭ اسقاق بەدەلى» ەمەس پە!
عابيت ىسكەندەر ۇلى,
«ەگەمەن قازاقستان»