يادرولىق فيزيكا ينستيتۋتىنىڭ باسشىسى ورال قالاسىنا كەلدى

ورال. 12 مامىر. الماتى قالاسىندا ەنەرگەتيكا مينيسترلىگىنە قاراستى يادرولىق فيزيكا ينستيتۋتى جۇمىس جاسايدى. بۇل ينستيتۋت 1957 جىلى حالقىمىزدىڭ ءبىرتۋار ۇلى, اكادەميك قانىش ساتباەۆتىڭ باستاماسىمەن قۇرىلعان بولاتىن. رەسپۋبليكا اۋماعىندا ونىڭ ءۇش بولىمشەسى بار بولسا, سونىڭ ءبىرى باتىس قازاقستان وبلىسىنىڭ اقساي قالاسىندا ورنالاسقان. بۇل نىسان ليرا دەگەن اتاۋعا يە. بۇعان دەيىن جەرگىلىكتى تۇرعىندار بۇل نىساننان رادياتسيالىق ساۋلە تاراتادى, دەپ قاۋىپتەنىپ كەلگەن ەدى. ەكىنشىدەن, ولار كەزىندە اسا قاۋىپتى دەپ سانالاتىن, ءارى اتقاراتىن قىزمەتى كوپشىلىككە تۇسىنىكسىز نىساننىڭ قانداي قاجەتتىلىگى بار دەگەن ۇسىنىس-پىكىرلەرىن دە قوسا بىلدىرگەن بولاتىن. كوپشىلىكتى تولعاندىرىپ كەلگەن وسىنداي ساۋالدارعا ورال وڭىرىنە ساپارى كەزىندە اتالعان يادرولىق فيزيكا ينستيتۋتىنىڭ باس ديرەكتورى سايابەك ساحيەۆ تولىققاندى جاۋاپ بەردى. بۇل تۋرالى ەgemen.kz ءتىلشىسى حابارلادى. ونىڭ ايتۋىنشا, ينستيتۋتتىڭ باستى ماقساتى – رادياتسيالىق قاۋىپسىزدىكتى قامتاماسىز ەتۋگە جانە رەاكتورلىق زەرتتەۋلەر جۇرگىزۋگە باعىتتالعان. «سونىمەن قاتار, ينستيتۋت جانىندا كەشەندى ەكولوگيالىق زەرتتەۋلەر ورتالىعى جۇمىس ىستەيدى. بار بولعانى وسى عانا. مۇندا تۇرعان ەشقانداي قۇپيا جوق. ءتىپتى, «كەلەمىن, كورەمىن» دەگەن ازاماتتار ءۇشىن ءبىزدىڭ ينستيتۋتتىڭ دا, «ليرا» نىسانىنىڭ دا ەسىگى قاشاندا اشىق», – دەيدى ول. يادرولىق فيزيكا ينستيتۋتى باس ديرەكتورىنىڭ سوزىنەن تاعى ءبىر ۇققانىمىز, بيىل ليرا-نىڭ قۇرىلعانىنا 18 جىل تولىپ وتىر ەكەن. وسى ۋاقىت ارالىعىندا مۇندا ادام ومىرىنە قاۋىپ تۋعىزاتىنداي تەرىس ەكولوگيالىق كورىنىستەر تىركەلمەپتى. ينستيتۋت باسشىسى الداعى ۋاقىتتا دا مۇنداي جاعداي ورىن المايتىنىنا سەنىم ارتا الادى. تەمىر قۇسايىن. دەرەك: egemen.kz. فوتو: inform.kz.