وڭتۇستىكتە ءماجىلىس دەپۋتاتتارى جۋرناليستەرمەن جۇزدەستى

شىمكەنت. 12 مامىر. وڭتۇستىك قازاقستان وبلىستىق ايماقتىق كوممۋنيكاتسيالار قىزمەتىندە پارلامەنت ءماجىلىسىنىڭ دەپۋتاتتارى قۇدايبەرگەن ەرجان, ءۋاليحان قاينازاروۆ, مانسۇرحان ماحامبەتوۆتەر وڭتۇستىك وڭىرىنە جاساعان جۇمىس ساپارىنىڭ قورىتىندىسى بويىنشا ءباسپاسوز ءماسليحاتىن وتكىزدى. بۇل تۋرالى egemen.kz ءتىلشىسى حابارلادى. جۇزدەسۋلەردە حالىق نەگىزىنەن جەر كودەكسىندەگى وزگەرىستەر جانە جالعا بەرۋ ماسەلەسىندە سۇراقتاردى قويعان. وڭتۇستىك قازاقستان وبلىسىنا «نۇر وتان» پارتياسى فراكتسياسى مەن قازاقستان حالقى اسسامبلەياسى اتىنان سايلانعان 8 ءماجىلىس دەپۋتاتى كەلسە, ولاردىڭ قاتىسۋىمەن وبلىستا 33 كەزدەسۋ ۇيىمداستىرىلىپ, وعان 6 مىڭنان استام تۇرعىن قامتىلعان. «بۇگىندە پارلامەنت ماجىلىسىندە جايىلىمدىق جەرلەر بويىنشا ارنايى زاڭ ازىرلەنىپ, وسىعان قاتىستى ۇسىنىستار جيناقتالۋدا. ەلىمىزدە جالپى كولەمى 188 ملن. گەكتار بولاتىن جايىلىمدىق جەر بولسا, ونىڭ 80 ملن. گەكتارى ءتيىمدى يگەرىلىپ وتىر. ال 27 ملن. گەكتار جەردىڭ توزىعى جەتكەن», دەدى پارلامەنت ءماجىلىسىنىڭ دەپۋتاتى ءۋاليحان قاينازاروۆ. بارىمىزگە بەلگىلى, ەلباسى جەر كودەكسىندەگى وزگەرىستەرگە بايلانىستى موراتوري جاريالاعان. «حالىق قالاسا حان تۇيەسىن سويادى» دەگەندەي مەملەكەت باسشىسى «حالىق قالاماعان زاڭ بىزگە كەرەگى جوق» دەگەن. ايتسە دە پايدالانىلماۋدان قۇنارى توزىپ بارا جاتقان بوس جەرلەر حالىق پايداسىنا جۇمىس جاساسىن. جەر-حالىقتىڭ قازىناسى. ونى مەملەكەتتىڭ ءال-اۋقاتىن كوتەرۋگە پايدالانۋ كەرەك. دەپۋتاتتار توقتامى وسى. باقتيار تايجان. دەرەك, فوتو: egemen.kz