«اتلەتيكو» چەمپيوندار ليگاسىنىڭ فينالىنا شىقتى

استانا. 4 مامىر.  بۇگىن ءمادريدتىڭ «اتلەتيكو» كلۋبى جانكۇيەرلەرىنە تاماشا سىي جاسادى. كوماندا ۋەفا چەمپيوندار ليگاسىنىڭ جارتىلاي فينالىندا ميۋنحەننىڭ «باۆاريا» كلۋبىنان 2:1 ەسەبىمەن جەڭىلسە دە ەكى ويىننىڭ ناتيجەسى بويىنشا فينالعا شىقتى. بۇل تۋرالى egemen.kz ءتىلشىسى حابارلادى. بۇل – يسپانيا كلۋبىنىڭ ءۇشىنشى رەت چەمپيوندار ليگاسىنىڭ فينالىنا شىعۋى. بۇعان دەيىن «اتلەتيكو» 1974 جىلى ەۋروپا چەمپيوندارى كۋبوگىنىڭ فينالىنا شىعىپ, «باۆاريادان» 4:0 ەسەبىمەن ۇتىلسا, 2014 جىلى جەرلەستەرى «رەال» كومانداسىنان 4:1 ەسەبىمەن جەڭىلگەن  بولاتىن. دەگەنمەن كوماندا ەكى رەت ەۋروپا ليگاسىنىڭ فينالىندا ويناپ, ەكەۋىندە دە جەڭىمپاز اتانعان. ودان قالدى ۋەفا سۋپەركۋبوگىن دا ەكى رەت ۇتقان. راسىن ايتۋ كەرەك, «اتلەتيكونىڭ» بيىلعى فينالدا ويناۋعا ەڭبەگى ءسىڭدى. ارگەنتينالىق جاتتىقتىرۋشى ديەگو سيمەونەنىڭ كومانداسى توپتىق تۋرنير باستالىسىمەن جاقسى ويىن ورنەگىن كورسەتىپ, الەمنىڭ تۇكپىر-تۇكپىرىندەگى ميلليونداعان جانكۇيەرلەردىڭ ىستىق ىقىلاسىنا بولەنىپ كەلەدى. چەمپيوندار ليگاسىنىڭ جارتىلاي فينالى دا وسىنى تاعى ءبىر رەت كورسەتتى. بۇگىنگى ماتچتا «اتلەتيكو» سىرت الاڭدا «باۆاريادان» 2:1 ەسەبىمەن جەڭىلگەنىمەن, مادريدتە بولعان ماتچتا ءوز الاڭىندا سوققان جالعىز گولدىڭ ەسەبىنەن فينالعا شىقتى. ەكىنشى كەزدەسۋدە «باۆاريا» فينالعا شىعۋعا جانتالاسىپ, ەكى دوپ ايىرماشىلىعىمەن جەڭۋگە تىرىستى. الاڭ يەلەرىنىڭ لەۆاندوۆسكي, ريبەري, ميۋللەر, ۆيدال سىندى ويىنشىلارى قانشاما رەت قارسىلاستار قاقپاسىنا قاۋىپتى جاعداي جاساعانىمەن ونىسىنان ەشتەڭە شىقپادى. 74 مينۋتتا لەۆاندوۆسكيدىڭ سوققان گولى دا الاڭ يەلەرىن قۇتقارا المادى. «اتلەتيكو» ماتچ سوڭىنا دەيىن قورعانىستا جاتىپ الىپ, ەسەپتى ۇستاپ تۇرا الدى. ەندى بۇگىن مادريدتە ەكىنشى فيناليست انىقتالادى. «رەال» «مانچەستەر سيتي» كومانداسىمەن كەزدەسەدى. ەگەر الاڭ يەلەرى جەڭسە, چەمپيوندار ليگاسىنىڭ فينالىندا ءبىر ەلدىڭ عانا ەمەس, ءبىر قالانىڭ كوماندالارى كۇش سىناسادى. ۋەفا چەمپيوندار ليگاسى 1/2 فينالىنداعى قارسىلاستاردىڭ ەكىنشى ماتچى. 3 مامىر. ميۋنحەن. «الليانتس ارەنا» ستاديونى.   تورەشى: چاكىر دجيۋنەيت. «باۆاريا»:نويەر, لام (كاپيتان), بواتەنگ, مارتينەس, الابا, الونسو, ۆيدال, كوستا (كومان 73’), ميۋللەر, ريبەري, لەۆاندوۆسكي «اتلەتيكو»(مادريد): وبلاك, حۋانفران, حيمەنەس, گودين, لۋيس, نيگەس, گابي (كاپيتان), اۋگۋستو (فەررەيرا-كارراسكو 46’), كوكە, توررەس, گريزمانن گولدار: الونسو 31’, لەۆاندوۆسكي 74’– گريزمانن 54’, ەسكەرتۋ الدى: حيمەنەس 34’ داستان كەنجالين. دەرەك, فوتو: eurosport, euro-football.ru, EPA/URG ۆيدەو: vkontakte الەۋمەتتىك جەلىسى.