استانا. 4 مامىر. پورتۋگاليانىڭ فۋندشال قالاسىندا پاراليمپيالىق ءجۇزۋ سپورتىنان ەۋروپا اشىق چەمپيوناتى ءوتىپ جاتىر. بۇل تۋرالى شتاتتاعى ۇلتتىق كوماندالار جانە سپورت رەزەرۆى ديرەكتسياسىنىڭ ءباسپاسوز حاتشىسى ارداق توعىموۆتىڭ اقپارى بويىنشا egemen.kz ءتىلشىسى حابارلادى.
وعان 52 مەملەكەتتەن 453 سپورتشى قاتىسۋدا. جارىستىڭ ەكىنشى كۇنىندە ءزۇلفيا عابيدۋللينا 50 مەترگە ەركىن جۇزۋدە تاعى دا الەم رەكوردىن جاڭارتتى. ول اتالعان قاشىقتىقتى 43,22 سەكۋندتا ءجۇزىپ ءوتتى. وسىدان ءبىر اي بۇرىن, 6-10 ءساۋىر ارالىعىندا نيدەرلاندىنىڭ ەيندحوۆەن قالاسىندا وتكەن كۋبوك جارىسىندا ءزۇلفيا عابيدۋللينا 50 مەترگە ەركىن جۇزۋدە ءۇش رەت الەم رەكوردىن جاڭارتقان ەدى. ەندى, مىنە ول تاعى دا الەمدىك رەكورد جاساپ وتىر.
قازاقستاندىق سپورتشى العاش رەت 2013 جىلى كانادانىڭ مونرەال قالاسىندا وتكەن الەم چەمپيوناتىندا الەمدىك رەكورد جاساعان بولاتىن. ودان كەيىن ەۋروپا اشىق چەمپيوناتىندا بەس رەت الەم رەكوردىن جاڭارتتى.
بيىلعى ەۋروپا اشىق چەمپيوناتىنا ءزۇلفيا عابيدۋللينادان باسقا انۋار احمەتوۆ, سيازبەك داليەۆ, اندرەي افاناسەۆ, ناتاليا زۆياگينتسەۆا, قۋانىش اسقار, رومان اگالاكوۆ, مارينا دۋبينينا, مانسۇربەك يبراشەۆ, دميتري لي, جاتتىقتىرۋشىلار ۆلاديمير زاگورودني, ناتاليا مانوحينا مەن ءسانيا اسۋلوۆا قاتىسىپ جاتىر. ولاردى جارىسقا قازاقستان قۇراماسىنىڭ مەملەكەتتىك جاتتىقتىرۋشى ەرنازار بەكسۇلتانوۆ پەن جۇزۋدەن اعا جاتتىقتىرۋشى ساتتار بەيسەمباەۆ باستاعان باردى.
داستان كەنجالين.
دەرەك, فوتو: شتاتتاعى ۇلتتىق كوماندالار جانە سپورت رەزەرۆى ديرەكتسياسى.
