ۇلتتىڭ ءتىنى – ءتىلى

استانانىڭ جاستار تەاترىندا تاۋەل­سىزدىگىمىزدىڭ 25 جىلدىعىنا ارنالعان «ءتىل تۇعىرى – ەل تۇعىرى» اتتى مەرەكەلىك سازدى كەش ءوتتى.  قازاقستان حالقىنىڭ بىرلىگى كۇنى قارساڭىندا ۇيىمداستىرىلعان ءىس-شارانىڭ ۇيىتقىسى قالالىق ءتىل باسقارماسىنىڭ باسشىسى تىلەۋعالي قىشقاشباەۆ كوپشىلىك الدىندا سويلەگەن سوزىندە بۇل باعدارلامانىڭ باستى ماقساتى اتا-بابالارىمىز عاسىرلار بويى اڭساپ, بۇگىنگى ۇرپاق قول جەتكىزگەن ازاتتىعىمىزدى, ەگەمەن ەلىمىزدىڭ باعا جەتپەس بايلىعى – ۇلتارالىق تاتۋلىقتى ۇلىقتاۋ ەكەندىگىن, وسى ورايدا مەملەكەتتىك ءتىلىمىزدىڭ مارتەبەسىن وسىرۋگە ايرىقشا ءمان بەرىلىپ وتىرعاندىعىن, ويتكەنى, تۋعان ءتىلىمىزدىڭ تۇعىرىن بيىكتەتۋ ەلدىگىمىزدىڭ اجىراماس بولىگىنە اينالعانىن اتاپ كورسەتتى. كورەرمەن كوڭىلىنەن شىققان كونتسەرتتە ارداق بالاجانوۆا, تامارا اسار, انار مۇزداحانوۆا, يبراگيم ەسكەندىر سەكىلدى ساحنا ساڭلاقتارى ءان شىرقاپ, كۇي كۇمبىرلەتتى. جينالعان جۇرت, اسىرەسە, شاھريزات سەيداحمەت, ەلدانا گابەرمان جانە تاتيانا كيم ءۇش تىلدە ورىنداعان كورنەكتى كومپوزيتورىمىز ءشامشى قالداياقوۆتىڭ اندەرىن وتە جىلى قابىلدادى. تالعات باتىرحان, «ەگەمەن قازاقستان»