«قازاقستان بارىسى» – بابالار ءداستۇرى

قازاقستان حالقى اسسامبلەياسىنىڭ مۇشەسى, «احىسكا» تۇرىك ەتنومادەني ءبىر­لەس­­تىگىنىڭ توراعاسى, قالالىق ءماسلي­حات­­­تىڭ دەپۋتاتى زياتدين كاسانوۆتىڭ دەمەۋ­­شىلىگىمەن «نۇر وتان» پارتياسىنىڭ الا­­تاۋ اۋداندىق فيليالى جانە اۋدان اكىمدىگىنىڭ ۇيىمداستىرۋىمەن «قازاقستان بارىسىنا» ىرىكتەۋ ءتۋرنيرى ءوتتى. دودانى ۇيىمداستىرۋداعى باستى ماقسات: ۇلت دەنساۋلىعىن نىعايتا وتىرىپ, جاستاردى سپورتقا باۋلۋ. سونىمەن قاتار, كەشەگى تاۋ كوتەرگەن الىپ باتىر بابالارىمىزدىڭ رۋحىن دارىپتەپ, حالقىمىزدىڭ سالت-ءداستۇرىن وركەندەتۋ. الماتىداعى جاڭادان قۇرىلعان الاتاۋ اۋدانى «ۇلجان» شاعىن اۋدانىنداعى №152 مەكتەپ-گيمنازياسىندا تۇڭعىش پرەزيدەنت ن.ءا.نازارباەۆتىڭ جۇلدەسى ءۇشىن ۇلتتىق سپورت ءتۇرى – قازاق كۇرەسىنەن «قازاقستان بارى­سى» رەسپۋبليكالىق تۋرنيرىنە اۋدان بويىنشا ىرىكتەۋ جارىسى ءوتتى. جىل سايىن وتكىزىلىپ تۇراتىن بۇل دوداعا بيىل نيەت ءبىل­دىرۋشىلەردىڭ قاراسى كوپ بولدى. 1985-1995 جىلدار ارالىعىندا دۇنيەگە كەلگەن جىگىتتەر بىلەك سىبانا كىرىسكەن جارىستىڭ ءناتي­جە­سىندە ءبىرىنشى ورىنعا ءالىمجان جۇماحمەتوۆ يە بولسا, ەكىنشى ورىن ماعجان سەيىتحانعا بۇيىردى. ال ءۇشىنشى ورىنعا دانيار بەكتۇرسىنوۆ تابان تىرەدى. ىرىكتەۋدەن وتكەن سپورتشىلار 2 مامىر كۇنى «بالۋان شولاق» اتىنداعى سپورت سارايىندا وتەتىن قالالىق ىرىكتەۋگە جولداما الدى. بۇل بالۋاندارىمىزدى الدا ءالى تالاي ۇلكەن دودا كۇتىپ تۇر دەگەن سەنىمدەمىز. سونداي-اق, قايىرىمدىلىق جاساپ, كومەك قولىن سوزۋدى داستۇرگە اينالدىرعان زياتدين كاسانوۆتىڭ ۇيىمداستىرۋىمەن مەدەۋ اۋدانىنداعى «ريتم» مەيرامحاناسىندا مۇحاممەد پايعامباردىڭ تۋعان كۇنى – «ءماۋلىت» مەرەكەسىنە وراي وتكەن كونفەرەنتسيا سوڭىنان اس بەرىلدى. اتالعان ءىس-شاراعا تۇركيانىڭ الماتىداعى باس كونسۋلى رىزا كاگان يىلماز, الماتى قالاسىنىڭ يمامى نۇربەك ەسماعانبەت, قازاقستان حالقى اسسامبلەياسىنىڭ مۇشەلەرى, تۇركيادان كەلگەن قوناقتار جانە ز.كاسانوۆقا ءوز سەنىمدەرىن ءبىلدىرىپ, ءماسليحات دەپۋتاتتىعىنا سايلاعان الاتاۋ اۋدانى 26-وكرۋگىنىڭ تۇرعىندارى قاتىستى. ءىس-شارا سوڭىنان كەلگەن قوناقتارعا ەستەلىك سىيلىقتار, قۇران كىتاپتارى تابىس ەتىلدى. گۇلزەينەپ سادىرقىزى, «ەگەمەن قازاقستان» الماتى