قاراعاندى. 24 ءساۋىر. قاراعاندىلىقتار گولوۆكيننىڭ امەريكالىق دومينيك ۋەيدپەن بولعان جەكپە-جەگىن كەنشىلەردىڭ مادەنيەت سارايى الدىنداعى الاڭدا ورناتىلعان تەلەەكراننان تاماشالادى. بۇل تۋرالى egemen.kz ءتىلشىسى حابارلادى.
بۇل شاراعا وبلىستىق دەنە شىنىقتىرۋ جانە سپورت باسقارماسى مۇرىندىق بولعان ەدى. تاڭەرتەڭگى مەزگىلگە جانە دە كۇن رايىنىڭ قولايسىزدىعىنا قاراماستان, جەرلەس بوكسشىعا جانكۇيەرلىك ەتكەن قالا تۇرعىندارى الاڭعا مولىنان جيىلدى. ولار ايگىلى بوكسشىنىڭ كەزەكتى جەڭىسىنە بالاشا قۋانىپ, ايدىك قۇرمەت كورسەتتى.
«ءبىرىنشى راۋند ءبىرىن-ءبىرى باعىپ, بارلاۋمەن ءوتتى. بىراق راۋندتىڭ اياعىنا تامان وزىنە سەنىمدىلىك پايدا بولعان گەنا قاتتى سوققى جاسادى. نوكداۋن بولدى. ەكىنشى راۋند كىمنىڭ كىم ەكەنىن كورسەتتى. گەننادي كۇمانسىز جەڭدى. مايقۇدىقتان شىققان بوكسشى ءوزىنىڭ وسى جەڭىسىمەن قاراعاندى بوكس مەكتەبىنىڭ مىقتىلىعىن تاعى ءبىر مارتە دالەلدەدى», – دەپ ءوز ويىمەن ءبولىستى گولوۆكيننىڭ العاشقى جاتتىقتىرۋشىسى ۆيكتور دميتريەۆ. سونداي-اق, ول ءوزىنىڭ شاكىرتى مەن بارشا قازاقستاندىق جانكۇيەرلەردى تاماشا تابىسپەن – ورتاق جەڭىسپەن قۇتتىقتادى.
قايرات ءابىلدينوۆ.
دەرەك: egemen.kz.
فوتو: ۆ. ەليزاروۆا.
