قوستانايدا ءدىندار اجەگە قۇرمەت كورسەتىلدى

قوستاناي. 28 ءساۋىر. قوستاناي قالالىق مەشىتىندە ءاديبا فاحرۋتدينقىزى قارياعا قۇرمەت كورسەتىلدى. شارا ونىڭ 95 جاسقا تولۋ مەرەيتويىنا بايلانىستى ءوتتى. وعان جالپى جاماعات, زيالى قاۋىم وكىلدەرى, جاستار جينالدى. بۇل تۋرالى egemen.kz ءتىلشىسى حابارلادى. ءاديبا اجەيدى قوستانايدا تانىمايتىن كىسى از بولار بالكىم. ول ەڭ الدىمەن كوپ جىلدار بويى جاس ۇرپاقتى بىلىممەن سۋسىنداتقان ۇستاز بولاتىن. زەينەتكەرلىككە شىققاننان كەيىن دە ۇستازدىق قىزمەتىنەن الىس كەتكەن جوق. ول تاۋەلسىزدىك العان جىلداردان باستاپ ءوزىنىڭ ەڭبەگىن جۇرتشىلىققا ءدىني ءبىلىم بەرۋگە, يسلام قۇندىلىقتارىن ۋاعىزداۋعا, جاستاردى يماندىلىققا تاربيەلەۋگە ارنادى. قوستاناي وبلىستىق مارال يشان اتىنداعى ورتالىق مەشىتتە جاستارعا جانە نيەت بىلدىرگەن بارشا مۇسىلمان قاۋىمىنا اراب ءحارپىن, قۇران سۇرەلەرىن ۇيرەتتى. قاجىلىق پارىزىن وتەيمىن دەگەندەردى قاسيەتتى ساپاردا قانداي پارىزداردى اتقارۋ كەرەكتىگىن, قانداي سۇرەلەر مەن اياتتاردى ايتۋ كەرەكتىگىنە دەيىن دايىندايتىن. تاۋەلسىزدىكتىڭ ەلەڭ-الاڭىندا قوستانايدا كينوتەاتر, فيلارمونيا تاعى باسقا دا قاجەتتىلىكتەرگە اينالىپ كەلگەن مەشىتتتىڭ جاماعاتقا قايتارىلۋىنا اقساقالدارمەن بىردەي ءجۇرىپ, اتسالىسقان ءاديبا اجە ەدى. ول: «ماعان وسى جاسقا كەلگەنشە جۇرتىما يماندىلىق ساباقتارىن, ءدىني ءبىلىم بەرۋ ءۇشىن دەنساۋلىق بەرگەن اللا-تاعالاعا راحمەت, وسىنداي قىزمەت كورسەتۋىمە قولداۋ بىلدىرگەن, مەشىتتىڭ حاتيب-يمامدارىنا راحمەت», – دەدى. تەرەڭ ءدىني ءبىلىمدى اكەسى فاحرۋتدين مەن اناسى قافيادان السا كەرەك. ول كىسىنىڭ ناعاشى جۇرتى دا ءدىني ادامدار بولادى, اتاسى يشان ەكەن. اكەسى مولدا فاحرۋتدين 1931 جىلى ساياسي قۋعىن-سۇرگىن كەزىندە قامالىپ, 1933 جىلى تۇرمەدە قايتىس بولعان. ءاديبا اجەنىڭ اناسى دا سول 1933 جىلى ءدىني ساۋاتتىلىعى مەن يشاننىڭ قىزى, مولدانىڭ ايەلى بولعانى ءۇشىن جازىقسىز تۇرمەدە وتىرادى. اناسى دا تەك 1991 جىلى اقتالادى. وبلىستىق مارال يشان مەشىتىنىڭ يمامى باقىتبەك نۇرعابىل ۇلى مەن مەشىت قىزمەتكەرى جاقسىلىق ايسين قازاقى داستۇرمەن ءابيبا اجەنىڭ يىعىنا كامزول جاۋىپ, سىي-سياپات كورسەتتى. بەلگىلى كومپوزيتور قاليبەك دەربىسالدين مەن ونەرپاز تۇلكىبەك رىسماعانبەتوۆتەر كەشتى انمەن ورنەكتەپ وتىردى. كەشتە ءاديبا اجەنى قۇتتىقتاپ سويلەۋشىلەر, ونىڭ بيىك ادامگەرشىلىگىن, ءدىني ساۋاتتىلىعىن جاستارعا ۇلگى ەتكەندەر قاتارى كوپ بولدى. ءنازيرا جارىمبەتوۆا. دەرەك, فوتو: egemen.kz.