كورشىدەن كورىپ كەلگەنىمىز

ۇرىمشىگە جول ءتۇستى. جات جەر جاتىر­قات­تىر­مادى. تاريحى تارازىلاتتى. تار­پاڭ ۋاقىت­قا تاپتالىپ قالماعان ۇلتتىق سانا-سەزىمنىڭ الماستاي جارقىلىن باي­قاپ, رۋحىنا جەلپىندىك. ءبىلىم-ىلىمگە ىن­تى­زارلىعى ىقىلاس تۋعىز­دى. جۇرگىن­شى­لەرى كوشەدە جەلدىرتكەننىڭ ءوزىن­دە, كوكەي­لەرى­نە بىردەڭە ءتۇيىپ بارا جاتقانداي اسەر قال­دىرادى. ارينە, بىلمەككە, زەردەگە تو­قى­ماققا قۇلشىنىسىن ايتامىز دا. كۇ­بىر-كۇبى­رىنەن, سىبىرىنان, وقىپ-تۇيۋگە اۋەستى­گى­نەن اڭداپ قالعاندىقتان, وسىنداي بىرتوعا وي تۇيدىك. جاڭىلماپپىز. باستاپقى ويىمىز جاڭ­ساق شىقپاپتى. بۇقارالىق اقپارات قۇرالدارىنان قانىققانىمىزداي, ءۇرىم­شى­­لىكتەر (قازاعى, قى­تايى, ۇيعىرى, دۇن­عا­نى, ت.ب. بار) ەل بويىنشا كىتاپتى ەڭ كوپ وقيتىنداردىڭ ساناتىنا ىلىگىپتى. جاراعان! العاشىندا تاڭىرقاتقان بۇل دەرەك, كوشە قيىلىسىنداعى كوركەم كىتاپ دۇكەنىنە كىرگەنىمىزدە, سانامىزعا شىنايىلىعىمەن بەرىك ور­نى­عا ءتۇستى. كوپ وقيتىنىنا كۋالىك ەتتىك. جا­عالاي, جاپپاي, جامىراپ وقىپ جاتقاندار... ءبىرى كىتاپقا تۇرەگەپ ۇڭىلسە, ەكىنشىسى تەرەزە قاپ­تا­لىنا شارت جۇگىنىپ, جارماسىپ وقىپ جاتىر. ەدەنگە گازەت توسەپ تاستاپ, جايلاسىپ وتىرىپ قۇران كىتاپتى سۋدىراتىپ جاتقا سوعىپ جات­قاندار قانشاما؟ تىزەرلەي ءتۇسىپ, كىتاپقا تەلمىرىپ قالعاندار ءوز الدىنا... گۋ, گۋ, پاراق سىبدىرى... ءباتىر-اۋ, كىتاپ دۇكەنى دەپ ىزدەپ كەلگەنىمىز وسى, كىتاپحانا بولمادى ما ەكەن دەپ ابدىرادىق. ءبىر قازاقتان سۇراساق, كۇلەدى, كىتاپ دۇكەنى دەيدى. ارتىنان جەتەمىزگە جەتتى عوي... دۇكەندە ەركىندىك بار ەكەن. كىمدە-كىم كىتاپتى ساتىپ الۋدان بۇرىن, وقىپ تانىسا الادى. ءبىر بەتىن نەمەسە ون پاراعىن وقيدى. تارتپاسا, سورەگە قويا سالادى. تارتسا, ساتىپ الادى. اقشاعا زارۋلەر كەيدە كىتاپتى دۇكەنگە كۇندە كەلىپ ءجۇرىپ, ءتامامداپ تاستايدى. ءسويتىپ, جانى قالاعان كىتابىن بۇگىن-ەرتەڭ بولماعانىمەن, قارجى تاپقاندا ساتىپ الا قويادى. وسىلايشا كىتاپ يەلەنۋگە, وقۋعا كەڭ مۇمكىندىك بەرىپ قويىپتى. بىزدە شە؟ ءبىر بۇرىشتا كىتاپ قاراپ اينالىپ قالساڭ, قۇددى, ۇرلىققا بەكىنگەن سۋىق قول يەسىندەي كورىنىپ, ىزعارعا ىلىگەسىڭ عوي. بەتتەرىن كوپ پاراقتاسا, ءبۇلدىرىپ تاستايدى-مىس! ەندى كىتاپشىل, وقىعىش اتانۋىڭ ەكىتالاي-اۋ! ءتىپتى كىتاپ دۇكەنىنە كىرۋگە زاۋقىڭ سوعا بەرمەس. ۇرىمشىدەگى كىتاپ دۇكەندەرىنىڭ كادىمگى كىتاپحانالارداعىداي وقۋعا دەگەن ىقىلاستى وياتاتىندىعىنا وسىلايشا سۇيسىنگەنبىز. ونداي ەركىندىكتىڭ باستى ءمانىسى – كىتاپقا قۇمارلىقتى مازداتىپ, مولىنان ساتىپ الۋعا جاسالعان ىقپال ەكەنىن تۇسىندىك. ىقىلاس اۋسا, ىقتيارىڭ بىلەدى عوي. مۇنداي كىتاپ دۇكەندەرىنە باس سۇعۋدىڭ ءوزى, عانيبەت! وقۋعا پەيىل ارتادى. كورشىنىڭ كىتاپقۇمارلىعى قىزىق­تىردى... قايسار ءالىم.