الماتى وبلىسى, پانفيلوۆ اۋدانى, ايدارلى اۋىلىنىڭ تۇرعىنى ءابىلحان وسپانوۆ بىلاي دەپ جازىپتى: ء«وز باسىم ەلباسىنىڭ پرەزيدەنتتىك وكىلەتتىگىن 2020 جىلعا دەيىن ۇزارتۋدى قالىڭ جۇرتشىلىق قىزۋ قولداپ جاتقان تۇستا ءۇنسىز قالۋدى ءجون كورمەدىم. دانا قازاقتا «جاقسىنىڭ جاقسىلىعىن ايت – نۇرى تاسىسىن» دەگەن اتالى ءسوز بار. مەن ەل ىشىندەگى اداممىن. حالىقتىڭ تۇرمىس-تىرشىلىگىنىڭ بۇرىن قانداي بولعانى, قازىر قانداي دەڭگەيگە كوتەرىلگەنى كوز الدىمدا. بۇگىنگى كۇنگى بارشىلىققا, بەيبىتشىلىككە شۇكىر ەتۋىمىز ءۇشىن ءبىز وتكەندى ۇمىتپاۋىمىز كەرەك. ارادا وتكەن جيىرما جىلدا حالىقتىڭ تۇرمىسى اسا ءبىر جىلدامدىقپەن جاقساردى. وسى كۇنى ەلىمىزدى الەم تانيدى. سوندىقتان, مەنىڭ پايىمداۋىمشا, ەلباسى نۇرسۇلتان نازارباەۆتىڭ پرەزيدەنتتىك وكىلەتتىگىنىڭ 2020 جىلعا دەيىن ۇزارتىلۋى وتە ورىندى دەپ بىلەمىن».
ال شىمكەنت قالاسىنىڭ تۇرعىنى ق. ايساەۆ ەلباسىنىڭ اتىنا جولداعان حاتىندا: «اسا قادىرلى نۇرسۇلتان ءابىش ۇلى! مەنىڭ اتى-ءجونىم قوجاحمەت ايساەۆ. ۇيعىر ازاماتىمىن. مەن 1945 جىلى 15 جەلتوقساندا قحر-دىڭ قۇلجا قالاسىندا شارۋا وتباسىندا دۇنيەگە كەلدىم. ءبىزدىڭ وتباسىمىز 1962 جىلى ارىس اۋدانىنا قونىس اۋداردى. اسكەري بورىشىمدى وتەگەن سوڭ, شىمكەنت قالاسىندا شارۋاشىلىق سالاسىندا ۇزاق جىل ەڭبەك ەتتىم. بۇگىندە جەكە كاسىپكەرلىكپەن اينالىسامىن. ۇيلەنىپ, بىرنەشە ۇل-قىز جانە ولاردان نەمەرە ءسۇيىپ, تاربيەلەپ وتىرمىن. ەڭ باستىسى, قازاقتارمەن تۋىستاي بولىپ كەتتىم. بۇگىندە ولارمەن زايىبىم ەكەۋمىز قۇدا, قۇداعي بولىپ, تاتۋ-ءتاتتى ءومىر ءسۇرىپ جاتىرمىز. «وتان – وتباسىنان باستالادى» دەگەندەي, ءسىزدىڭ ەلىمىزدە ۇستانىپ وتىرعان بايسالدى باسشىلىعىڭىز بەن كورەگەن ساياساتكەرلىگىڭىزدىڭ ارقاسىندا وتباسىندا وسىنداي مامىراجاي, بەيبىت ءارى باقىتتى عۇمىر كەشۋدەمىز», دەپ اعىنان جارىلادى.
ودان ءارى حاتتا: «قازاق باۋىرلارىمىزدا «ىرىس الدى – ىنتىماق» دەگەن ءسوز بار. ءسىز ەلىمىز تاۋەلسىزدىك العالى بەرى بارشا حالىقتى ىنتىماق پەن بىرلىككە شاقىرىپ, بۇل باعىتتا جۇيەلى ءارى جوسپارلى تۇردە جۇمىس ىستەپ كەلەسىز. بۇل ماقساتتاعى قول جەتكىزگەن جەتىستىكتەرىڭىز ءبارىمىزدىڭ كوز الدىمىزدا. قازاقستان حالقى اسسامبلەياسىنىڭ دۇنيەگە كەلۋى – ءسىزدىڭ ەسەلى ەڭبەگىڭىزدىڭ جەمىسى», دەلىنگەن. حات اۆتورى ەلباسىنىڭ پرەزيدەنتتىك وكىلەتتىگىن 2020 جىلعا دەيىن ۇزارتۋ جونىندەگى باستاماشى توپتىڭ باستاماسىن شىنايى پەيىلمەن قولدايتىنىن ايتىپ, پرەزيدەنتتىڭ ەل مۇددەسى جولىنداعى اسا جاۋاپتى قىزمەتىنە تولايىم تابىستار تىلەيدى.
