«ۇلت جارشىسى» جۋرنالى

قازاقستاندا 50 مىڭ دانامەن تاراتىلعان ءۇش تىلدەگى تۇڭعىش باسىلىم جۋرنالدىڭ اتى ايتىپ تۇرعانىنداي, باسىلىمنىڭ العاشقى سانىنىڭ قازاق­تىڭ بەلگىلى دە اسا تانىمال تۇلعالى ازا­ماتتارىنىڭ لەبىزىمەن جارىققا شىعۋى تەكتەن-تەك ەمەس ەكەندىگى بىردەن اڭعارىلادى. اكادەميك تورەگەلدى شارمانوۆ «باسى­لىمنىڭ قۇرىلتايشىلارى مەن شىعا­رۋشىلارى بۇل ىسكە ۇلكەن دايىندىقپەن كەلگەنىن بايقاتتى. ءۇش تىلدە جارىق كورىپ وتىرعان ۇلكەن جوبا قازاققا كوپتىك ەتپەيدى», دەسە, قوعام قايراتكەرى مۇرات اۋەزوۆ «مۇنداي جوبا قازاق باسىلىمدارىندا بۇرىن-سوڭدى بولماعان ءۇردىس», بەلگىلى شىعىستانۋشى عالىم ءابساتتار دەربىسالى «مەديانارىقتاعى بۇل جاس باسىلىم قازاق تىلىندەگى ماتەريالدارعا قاتىستى بۇعان دەيىنگى بولىپ كەلگەن ولقىلىقتاردىڭ ورنىن تولتىرار دەگەن ۇمىتتەمىن», دەپ وي تۇيىندەيدى. كوركەمدەلۋى مەن بەتتەلۋى ايرىقشا «ۇلت جارشىسى» مۇقاباسىنا حالىق قاھارمانى ايدىن ايىمبەتوۆتىڭ سۋرەتى سالىنىپ, ىشتەگى ءبىرىنشى بەتى بەلگىلى جۋرناليست گۇلبارشىن ساباەۆانىڭ عارىشكەرمەن جاساعان قىزىقتى سۇحباتىمەن اشىلىپتى. ۇلتتىق جەڭسىك تاعامىمىز تۇشپارانىڭ – نەلىكتەن «تۇيمەش» اتالعانى تۋرالى قىزىقتى ماقالا جۋرنال وقىرمانىن بەي-جاي قالدىرماسى دا انىق. جۋرنال بەتتەرىنەن كەڭ كولەمدە ورىن العان قازاقستاننىڭ ونەركاسىپ سالاسىنداعى ينۆەس­تيتسيا ادىمى, حالىقارالىق ديپلوماتيالىق قاتىناستار, ەلدەگى ورتا جانە شاعىن بيزنەس بولاشاعى مەن وزگە دە رۋحاني, مادەني, تا­نىمدىق ماتەريالدار قىزىقتى دا تارتىمدى. سونداي-اق, ءتۇرلى-ءتۇستى كوركەم جۋرنال اتىنا زاتى ساي – قازاقستاننىڭ بۇگىنگى «ونەر جۇلدىزدارى» تۋرالى ماقالالارعا دا ويىپ تۇرىپ ورىن بەرگەن جانە اشەكەيلى سۋرەتتەرمەن بەزەندىرىلگەن. «بولاشاقتان كەلگەن روبوت» – الەم تانىعان تانىمال بوكسشى, «قازاقتىڭ گە­ناسى», گەننادي گولوۆكين تۋرالى قىزىقتى ماتەريالدى سپورت ءبولىمىنىڭ باستى ماقالاسى رەتىندە وقيتىن بولاسىزدار. كوپشىلىك وقىرمانعا ارنالعان ءتۇرلى-ءتۇستى اشەكەيلى – قازاق, ورىس, اعىلشىن تىلىندە جارىق كورەتىن كوركەم جۋرنالدىڭ قۇرىلتايشىسى – «SAPA MEDIA GROUP» جشس ەنشىلەس كومپانيا­سى بولىپ تابىلاتىنى تۋرالى دا جالپى وقىرمان قاۋىمدى حاباردار ەتكەندى ءجون دەپ تاپتىق. قازىر بۇگىنگى قازاق باسپاسوزىندەگى ەرەكشە قۇبىلىس – ءۇش ءتىلدى «ۇلت جارشىسى» كوركەم بەزەندىرىلگەن جۋرنالىنىڭ ەكىنشى سانى جارىققا شىعۋعا دايىندالۋدا. تالعات ءسۇيىنباي, «ەگەمەن قازاقستان» الماتى