قاراعاندى وبلىسىندا جىل باسىنان بەرى 8143 قىلمىس تىركەلدى

قاراعاندى. 27 ءساۋىر. قاراعاندى وبلىسى ەلىمىزدە قىلمىس سانى بويىنشا بەسىنشى ورىندا تۇر. بۇل تۋرالى قاراعاندى وبلىسى بويىنشا  قۇقىقتىق ستاتيستيكا جانە ارنايى ەسەپ جونىندەگى دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. قاراعاندى وبلىسىندا وسى جىلدىڭ قاڭتار, اقپان جانە ناۋرىز ايلارىندا 8143 قىلمىس تىركەلگەن. مۇنىڭ باسىم بولىگى, ياعني  4921-ءى ورتا اۋىرلىقتاعى قىلمىس تۇرلەرىنە جاتادى. ال اۋىر قىلمىس تۇرلەرىنىڭ سانى – 734. اسا اۋىر قىلمىس 74 رەت جاسالىپتى. قالعان 1199-ى جەڭىل-جەلپى قىلمىس تۇرلەرىنە جاتادى. «وڭىردەگى قىلمىستىق احۋال تۇراقتى. بۇل ماسەلەدە بىلتىردان باستاپ پوليتسيانىڭ ارىز-شاعىمدى تىركەۋدىڭ جاڭا فورماتىنا كوشكەنىن ايتا كەتۋ كەرەك. قازىر ولاردىڭ بارلىعى بىرىڭعاي رەەسترگە تىركەلەدى. بۇل قىلمىستى جاسىرىپ قالۋ فاكتىسىن جوققا شىعارادى», – دەدى قۇقىقتىق ستاتيستيكا جانە ارنايى ەسەپ جونىندەگى دەپارتامەنتتىڭ ءبولىم باسشىسى مەيىرجان وماروۆ. ايتا كەتەيىك, قىلمىس سانى جاعىنان قاراعاندى وبلىسىنىڭ الدىندا الماتى (19026 قىلمىس), استانا (11582 قىلمىس) قالالارى, وڭتۇستىك قازاقستان (11050 قىلمىس) جانە الماتى وبلىستارى (8436 قىلمىس) تۇر. قايرات ءابىلدينوۆ. دەرەك: قاراعاندى وبلىسى بويىنشا  قۇقىقتىق ستاتيستيكا جانە ارنايى ەسەپ جونىندەگى دەپارتامەنتىنىڭ ءباسپاسوز قىزمەتى. فوتو: kaz.tengrinews.kz.