اتىراۋ سوتى شەنەۋنىككە 8 ملن. 820 مىڭ تەڭگە ايىپپۇل سالدى

اتىراۋ. 26 ءساۋىر. اتىراۋ قالالىق №2 سوتى وبلىستىق مەملەكەتتىك ەڭبەك ينسپەكتسياسىنىڭ بۇرىنعى باسشىسى سالاۆات يشايدى قىلمىستىق كودەكستىڭ 366-بابىنىڭ 2-ءبولىمى بويىنشا قىلمىس جاسادى دەپ تانىدى. وعان اتالعان كودەكستەگى 55-باپتى قولدانۋ ارقىلى 8 ملن. 820 مىڭ تەڭگە ايىپپۇل سالىندى, سونىمەن بىرگە, مۇلكى تاركىلەنىپ, ءومىر بويىنا مەملەكەتتىك قىزمەتتەگى لاۋازىمدى يەلەنۋ قۇقىعىنان ايرىلدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «قىلمىستىق ءىس ماتەريالدارىنان بەلگىلى بولعانداي, سالاۆات يشاي Unicorn CCC جانە «ميستەر دوورس-اتىراۋ» جاۋاپكەرشىلىگى شەكتەلگەن سەرىكتەستىكتەرىنىڭ جاۋاپتى تۇلعالارىنىڭ تەحنيكا قاۋىپسىزدىگى جونىندەگى ءبىلىمىن تەكسەرۋ جونىندەگى كوميسسياسىنىڭ جەتەكشىسى بولىپ تاعايىندالعان. كومپانيا قۇرىلتايشىسى ا.كيمنەن كومپانيانىڭ تەحنيكا قاۋىپسىزدىگى بويىنشا وقىتۋدان وتكەن ءار تۇلعاسى ءۇشىن سەرتيفيكاتتار مەن كۋالىكتەرگە قولعا قويۋعا 3000 تەڭگەدەن سىياقى تالاپ ەتكەن. كەيىن ا.كيم بۇل تالاپپەن كەلىسىپ, اراداعى دەلدال, ياعني, كومپانيا قىزمەتكەرى ارقىلى 294 000 تەڭگە بەرىپ جىبەرگەن. سول كۇنى سالاۆات يشاي ءوزىنىڭ قىزمەتتىك كابينەتىندە جەمقورلىققا قارسى كۇرەس قىزمەتىنىڭ قىزمەتكەرلەرىمەن پارانى العاننان كەيىن ۇستالعان» – دەدى وبلىستىق سوتتىڭ ءباسپاسوز قىزمەتى. ايتا كەتەيىك, سوتقا دەيىنگى تەرگەۋ بارىسىندا پروتسەسسۋالدىق كەلىسىم تالاپتارىن ساقتالدى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. فوتو: راحىم قويلىباەۆ.