اقتوبەدە ماجارستاننىڭ كونسۋلدىعى اشىلدى

اقتوبە. 25 ءساۋىر. وبلىس اكىمى بەردىبەك ساپارباەۆ ماجارستاننىڭ (ۆەنگريا) قازاقستانداعى توتەنشە جانە وكىلەتتى ەلشىسى اندراش بارانيمەن كەزدەستى. بۇل تۋرالى egemen.kz ءتىلشىسى حابارلادى. كەزدەسۋ بارىسىندا ەكى جاقتى ءوزارا ءتيىمدى ىنتىماقتاستىق پەن بىرلەسكەن جوبالاردى جۇزەگە اسىرۋ تۋرالى اڭگىمە بولدى. ءوڭىر باسشىسى ازىرگە ەكى اراداعى  ساۋدا-ەكونوميكالىق بايلانىستاردىڭ كەمشىندىگىن,  وبلىس پەن ماجارستان اراسىنداعى تاۋار اينالىمى نەبارى 10 ميلليون دوللاردى عانا قۇرايتىنىن اتاپ ءوتتى. بولاشاققا جوسپارلانعان ىزدەنىستى قادامدار جۇزەگە اسسا, بۇل باعىتتا اناعۇرلىم ىلگەرىلەۋ بولاتىنىن جەتكىزدى. وعان اقتوبەدە اشىلعان ماجارستاننىڭ كونسۋلدىعىنىڭ ىقپالى زور بولاتىنىن تىلگە تيەك ەتتى. ايماق باسشىسى قازاقتار مەن ماجارلاردىڭ اراسىندا ەجەلدەن تاريحي جانە مادەني بايلانىستىڭ قالىپتاسقانىن دا جينالعاندار جادىندا جاڭعىرتتى. جيىن بارىسىندا جىلىجاي قۇرىلىسى, اۋىز سۋدى تازارتۋ, كوكونىس وڭدەۋ ءوندىرىسى, ءسۇت جانە ءسۇت ونىمدەرىن جانە بيدايدى قايتا وڭدەۋ باعىتىنداعى جوبالاردى جۇزەگە اسىرۋدىڭ مۇمكىندىگى مول ەكەنى ايتىلدى. كەزدەسۋدە ءسوز العان ۆەنگريانىڭ قازاقستانداعى توتەنشە جانە وكىلەتتى ەلشىسى اندراش باراني ەكى ەلدىڭ اراسىندا ساياسي, ەكونوميكالىق, الەۋمەتتىك, مادەني سالادا بىرقاتار جوبالار قولعا الىنىپ جاتقانىن اتاپ ءوتتى. سونىڭ شىنايى كورىنىسى رەتىندە قازاقستاننىڭ اۋىل شارۋاشىلىعى سالاسىنا تىكەلەي ينۆەستيتسيا تارتۋمەن شۇعىلداناتىن بىرلەسكەن قوردىڭ قۇرىلۋىن اتاپ ءوتتى. اتالعان قورعا «قازاگرو» ۇلتتىق كومپانياسى مەن ۆەنگريانىڭ «ەكسيمبانكى» 20 ميلليون دوللاردان, جالپى 40 ميلليون دوللار سالعانىن جەتكىزدى. ۆەنگريا – وبلىستا ءوز كونسۋلدىعىن اشقان ەكىنشى ەۋروپالىق ەل.  قاڭتار ايىندا ءبىزدىڭ وڭىرگە وسىنداي ميسسيامەن چەحتار كەلگەن بولاتىن. سونداي-اق اقتوبەدە تۇركيا جانە وڭتۇستىك كورەيا ءوز وكىلدىكتەرىن اشۋدى جوسپارلاپ وتىر. «داستان» قوناق ءۇي كەشەنىندە ۆەنگريانىڭ قالامىزداعى وكىلدىگىنىڭ اشىلۋ سالتاناتى ءوتتى. ۆەنگريانىڭ قازاقستان رەسپۋبليكاسىنداعى قۇرمەتتى كونسۋلى بولىپ KAZENERGY قاۋىمداستىعى توراعاسىنىڭ ورىنباسارى جانبولات سارسەنوۆ تاعايىندالدى. شەتەلدىك ديپلوماتيالىق وكىلدىكتىڭ تۇساۋكەسەرىنە وبلىس اكىمىنىڭ ورىنباسارى عالي ەسقاليەۆ, ۆەنگريانىڭ سىرتقى ەكونوميكالىق بايلانىستار جانە سىرتقى ىستەر مەملەكەتتىك حاتشىسىنىڭ ورىنباسارى جولت چۋتورا جانە وسى ەلدىڭ قازاقستان رەسپۋبليكاسىنداعى ەلشىسى اندراش باراني قاتىستى. ساتىبالدى ءساۋىرباي. دەرەك: egemen.kz فوتو: aktobegazeti.kz