تەررورلىق شابۋىلدان 20 ادام زارداپ شەكتى

استانا. 25 ءساۋىر. سيريانىڭ داماسك قالاسىنا تاياۋ ماڭايدا لاڭكەستەردىڭ شابۋىلىنان 5 ادام قازا تاۋىپ, 20 تۇرعىن ءتۇرلى دەڭگەيدە جاراقات الدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. پوليتسيا قىزمەتكەرلەرى ەلدىڭ وڭتۇستىگىندەگى اس-سەيدا زەيناب اۋدانىندا جارىلعىش زات ورناتىلعان كولىكتىڭ جارىلعانىن مالىمدەدى. وسىعان دەيىن Al-Wasat اقپارات پورتالى 8 ادامنىڭ وپات بولىپ, 4 ادامنىڭ زارداپ شەككەنىن حابارلاعان. قازىر وقيعا ورنىندا تەرگەۋ امالدارى ءجۇرىپ جاتىر. لاڭكەستىك ارەكەتتى قاي توپتىڭ جاساعانى بەلگىسىز. ازىرگە بۇل ءىستى ەشبىر توپ ءوز موينىنا العان جوق. الايدا, الدىن الا بولجام بويىنشا دايش ەكسترەميستەرى بولۋى مۇمكىن. ايتا كەتەيىك, وسى ايدىڭ باسىندا اتالعان توپتىڭ سودىرلارى داماسك قالاسىنداعى «باديا يسمينت» تسەمەنت زاۋىتىنا باسا-كوكتەپ كىرىپ, 340 قىزمەتكەردى تۇتقىنعا العان. كوپ ۇزاماي 100 ادامنىڭ امان-ەسەن قۇتىلىپ, قالعاندارىنىڭ قازا تاپقانى بەلگىلى بولدى. ايان ءابدۋالي. دەرەك: تاسس. فوتو: ria.ru.