قارقارالىدا پوليتسيا قىزمەتكەرى وق اتۋعا ءماجبۇر بولدى

قاراعاندى. 25 ءساۋىر. قاراعاندى وبلىسىنداعى قارقارالى اۋدانىندا بولعان كيكىلجىڭدە وق اتىلىپ, ءبىر ادام قازا تاپتى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. وقيعا قارقارالى قالاسىنداعى «تاماشا» رەستورانى ماڭىندا بولعان. پوليتسيا قىزمەتكەرلەرىنىڭ ايتۋىنشا, الكوگولدى ىشىمدىك ىشكەن ءبىر توپ ادام جول-پاترۋلدىك پوليتسياسىنىڭ اۆتوكولىگىن توقتاتىپ, ءتارتىپ ساقشىلارىن بالاعاتتاعان. ولار وسىدان ءبىراز بۇرىن پوليتسيا قىزمەتكەرىنىڭ ماس كۇيىندە ماشينا جۇرگىزگەن بىرەۋىنىڭ كۋالىگىن الىپ قويعانىن ەسكە سالىپ, كىنا ارتقان. بۇنىمەن دە قويماي, ولار ءتارتىپ ساقشىلارىنا كۇش كورسەتىپتى. وقيعا ۋشىعىپ بارا جاتقان سوڭ, پوليتسيا قىزمەتكەرلەرى اسپانعا جانە جەرگە قاراتا ەسكەرتۋ وعىن اتقان. «سول كەزدە جەرگە تيگەن وق تويتارىلىپ بارىپ, 28 جاستاعى جىگىتتىڭ ىشىنە تيگەن», دەگەن جورامال ايتىلۋدا. جاراقاتتىڭ سالدارىنان ول اۋرۋحانادا قايتىس بولدى. ال وسى وقيعاعا قاتىسى بار كۇدىكتىلەر پوليتسيا بولىمشەسىنە جەتكىزىلدى. قازىرگى ۋاقىتتا پروكۋراتۋرا ورگاندارى قارۋ قولدانعان پوليتسيا قىزمەتكەرىنىڭ ارەكەتى قانشالىقتى زاڭعا سايكەس كەلەتىنىن تەكسەرۋ ۇستىندە. سونىمەن قاتار, قاراعاندى ىشكى ىستەر دەپارتامەنتىنىڭ وزىندىك قاۋىپسىزدىك قىزمەتى قىزمەتتىك تەكسەرۋ جۇرگىزۋدە. قايرات ءابىلدينوۆ. دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى. فوتو: halyknews.kz.