باعدادتا بولعان قوس جارىلىستان 12 ادام قازا تاپتى

استانا. 24 ءساۋىر. يراك استاناسى باعدادتا بولعان قوس جارىلىستان 12 ادام قازا تاپتى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. العاشقى جارىلىس قالانىڭ سولتۇستىگىندەگى باقىلاۋ بەكەتتەرىنىڭ بىرىندە بولدى. بۇل ماڭايدا لاڭكەستىك ارەكەتتەن 9 ادام مەرت بولىپ, 28 ادام زارداپ شەكتى. ال ەكىنشىسى شاھاردىڭ وڭتۇستىگىندەگى اسكەري كولىكتەردىڭ جانىندا ورىن الدى. سالدارىنان 3 ادام وپات بولىپ, 11 تۇرعىن ءتۇرلى دەڭگەيدە جاراقات الدى. رەسمي مالىمەتتەر بويىنشا, جارىلعىش زاتتاردىڭ ءبارى اۆتوكولىكتەرگە ورناتىلعان. لاڭكەستىك شابۋىلدى قاي توپتىڭ جاساعانى بەلگىسىز. ازىرگە بۇل ءىستى ەشبىر ۇيىم ءوز موينىنا العان جوق. الايدا, بولجام بويىنشا بۇل ىسكە دە «يراك پەن لەۆانت ۇيىمىنىڭ» قاتىسى بولۋى مۇمكىن. ايتا كەتەيىك, اتالعان توپتىڭ جانكەشتىسى 22 ءساۋىر كۇنى قالاداعى مەشىتتەردىڭ بىرىندە ءوزىن ءوزى جارىپ جىبەرگەن. تەررورلىق شابۋىلدان 9 ادام كوز جۇمدى. سونداي-اق, وسى ارەكەتتى مەشىت سىرتىندا تاعى ءبىر ەكسترەميست جۇزەگە اسىرماق بولعان. بىراق ءتارتىپ ساقشىلارى دەر كەزىندە بايقاپ, الدىن الىپ ۇلگەردى. بىرىككەن ۇلتتار ۇيىمىنىڭ مالىمەتتەرى بويىنشا يراكتا وسى جىلدىڭ اقپان ايىنان بەرى بارلىعى 670 ادام قازا تاۋىپ, 1290 بەيبىت تۇرعىن جارالانعان. ايان ءابدۋالي. دەرەك, فوتو: 24.kz.