الماتى. 24 ءساۋىر. بۇگىن تاڭەرتەڭ ساعات 08:30-دا تۇڭعىش پرەزيدەنت ساياباعىندا قالا اكىمى باۋىرجان بايبەك ءسوز سويلەپ اشىپ, ءوزى جۇگىرۋدى باستاپ بەرگەن مارافون مارەگە جەتۋگە جاقىن. جارىس ۇيىمداستىرۋشىلاردىڭ مالىمەتىنە قاراعاندا مارافونعا 13 مىڭعا جۋىق ادام قاتىسۋدا. قالا اكىمى اتاپ كورسەتكەندەي, حالىقارالىق دارەجەگە جەتكەن مارافونعا اتسالىسۋشىلاردىڭ سانى قالادا وتكەن سوڭعى جارىسپەن سالىستىرعاندا 2 ەسەگە وسكەن. بۇل تۋرالى egemen.kz ءتىلشىسى حابارلادى.
ءال-فارابي داڭعىلىنداعى جاياۋ جارىسقا قالا تۇرعىندارى, حالىققا تانىمال تۇلعالار, سپورت جانە ونەر جۇلدىزدارى دا قاتىستى. ولاردىڭ قاتارىنان الەمدىك اتاعى بار تانىمال ۆەلوسپورتشى الەكساندر ۆينوكۋروۆتى, ءانشى قايرات نۇرتاستى, رەجيسسەر نۇرتاس ادامباەۆتى, بانكير بولات جامىشەۆتى كورۋگە بولادى.
ماڭىزدى دا اۋماقتى شارانىڭ جوسپارلانعانداي وتۋىنە ادەتتەگىدەي الماتى قالاسىنىڭ ىشكى ىستەر دەپارتامەنتىنىڭ قىزمەتكەرلەرى تياناقتى قىزمەت كورسەتىپ, اتسالىستى.
«بيىل قالامىزدا مەرەيتويلىق بەسىنشى رەت ءوتىپ وتىرعان شاراعا دەپارتامەنت باسشىلىعى دا قايىرىمدىلىق نيەتپەن قاتىسۋعا نيەت ءبىلدىردى. سپورتتىق شاراداعى قاۋىپسىزدىك پەن جول قوزعالىسىن قاداعالاۋ قىزمەتى پوليتسەيلەردىڭ موينىندا بولعاندىقتان دا, ءبىر بولىمشەنىڭ قىزمەتكەرلەرى ءوز مىندەتتەرىن اتقارۋمەن بىرگە جارىسقا قاتىسۋدا. جالپى, الماتى گورنيزونى سپورتتىق مادەني بۇقارالىق شارالاردان ەشۋاقىتتا شەت قالعان ەمەس. الماتى پوليتسەيلەرى وسىمەن ەكىنشى رەت مارافونعا سپورتتىق ۇلگىدە قاتىسىپ وتىر», – دەيدى قالالىق ىشكى ىستەر دەپارتامەنتىنىڭ رەسمي وكىلى پوليتسيا مايورى سالتانات ازىربەك.
جارىستىڭ العى شارتى قايىرىمدىلىق شاراسىن جاساۋ بولعاندىقتان, مارافونعا قاتىسۋشىلار 2 مىڭ مەن 4 مىڭ تەڭگە ارالىعىندا جارنالىق اقشا تولەدى. جينالعان قاراجات قالاداعى اردي بالالاردى ساۋىقتىرۋ ورتالىعىنىڭ شوتىنا تۇسەدى.
مارافون ورتالىق ستاديوندا اياقتالادى.
تالعات ءسۇيىنباي.
دەرەك, سۋرەت: egemen.kz.
