مادەنيەت جانە سپورت ءمينيسترى گولوۆكيندى قۇتتىقتادى

استانا. 24 ءساۋىر. مادەنيەت جانە سپورت ءمينيسترى ارىستانبەك مۇحامەدي ۇلى بوكسشى گەننادي گولوۆكيندى بۇگىنگى تاماشا جەڭىسىمەن قۇتتىقتادى. بۇل تۋرالى egemen.kz ءتىلشىسى حابارلادى. «ءسىزدى كاسىپقوي بوكستاعى 35-ءشى جەڭىسىڭىزبەن قۇتتىقتاۋعا رۇقسات ەتىڭىز. ءسىز ەلىمىزدىڭ ماقتاناشىسىز. قازىرگى تاڭدا ءسىزدىڭ «GGG» اتىڭىز قازاقستاننىڭ ۇلتتىق برەندىنە, وتانعا دەگەن سۇيىسپەنشىلىك پەن ءپاتريوتيزمنىڭ بەلگىسىنە اينالىپ وتىر. جاس بوكسشىلار ءسىزدىڭ جەڭىستەرىڭىزگە قاراپ, سودان ۇلگى الىپ تاربيەلەنىپ جاتىر. ءسىزدىڭ جەڭىستەرىڭىزگە ەلىمىزدە عانا ەمەس, سونىمەن بىرگە شەتەلدەگى ميلليونداعان بوكس سۇيەر قاۋىم ءتانتى. ميلليونداعان جانكۇيەرلەر سىزدەن ارقاشان قىزىقتى تا تارتىستى جەكپە-جەكتەر كۇتەدى. مەن قازاقستاندىق سپورتشىلار جانە ءوزىمنىڭ اتىمنان ءسىزدى جەڭىسىڭىزبەن قۇتتىقتاي وتىرىپ, زور دەنساۋلىق, تابىس جانە جەڭىستەر تىلەگىم كەلەدى», دەلىنگەن حاتتا. داستان كەنجالين. دەرەك:  مادەنيەت جانە سپورت مينيسترلىگى. فوتو: Facebook الەۋمەتتىك جەلىسى.