استانا. 24 ءساۋىر. بۇگىن اقش-تىڭ كاليفورنيا شتاتىنىڭ ينگلۆۋد قالاسىندا وتانداسىمىز گەننادي گولوۆكين امەريكالىق دومينيك ۋەيدتى جەڭىپ, كاسىپقوي بوكستاعى 35-ءشى جەڭىسىنە جەتتى. بۇل تۋرالى egemen.kz ءتىلشىسى حابارلادى.
بۇل ايقاستى جانكۇيەرلەر اسىعا كۇتتى. ويتكەنى, گولوۆكين جەكپە-جەككە WBC (Interim), WBA, IBF, IBO بەلبەۋلەرىن تىككەن بولاتىن. كەزدەسۋدە گولوۆكين قارسىلاسىن ءبىرىنشى راۋندتا نوكداۋنعا جىبەرىپ, ەكىنشى راۋندتا سۇلاتىپ سالدى. ءسويتىپ, جەكپە-جەك ەكى راۋندقا عانا سوزىلىپ, وتانداسىمىز كاسىپقوي بوكستاعى 35 ايقاسىنىڭ بارلىعىن جەڭىسپەن اياقتادى. سونىڭ ىشىندە 32 كەزدەسۋدىڭ 22-سىندە ۋاقىتىنان بۇرىن جەڭىسكە جەتتى. ال ۋەيد العاش رەت قارسىلاسىنان جەڭىلدى. بۇعان دەيىن ول 18 رەت شارشى الاڭعا شىعىپ, سونىڭ بارلىعىن جەڭگەن بولاتىن. جەكپە-جەكتە قازاقستاندىق بوكسشى قاتارىنان 16-شى رەت WBA تۇجىرىمىنداعى چەمپيوندىق بەلدىكتى قورعاپ قالدى.ونىڭ ۇستىنە گولوۆكيننىڭ IBO اتاعىن 13 رەت, WBC (Interim) تۇجىرىمىنداعى چەمپيوندىق اتاقتى ءتورت رەت قورعاپ قالسا, IBF اتاعىن ءبىر رەت يەلەنگەن.
قازاقستاندىق بوكسشى دومينيك ۋەيدپەن ايقاسى ءۇشىن 2 ميلليون اقش دوللارىن الادى. ۋەيدكە 500 000 دوللار تابىس ەتىلەدى. ەندى گولوۆكين ساۋل الۆارەس پەن امير حان اراسىندا وتەتىن جەكپە-جەكتىڭ جەڭىمپازىمەن قولعاپ ءتۇيىستىرۋى ءتيىس. گولوۆكين IBF/IBO/WBA تۇجىرىمدارى بويىنشا الەم چەمپيونى ءارى WBC تۇجىرىمى بويىنشا الەمنىڭ ۋاقىتشا چەمپيونى. سوندىقتان ول الۆارەستىڭ WBC چەمپيوندىق تيتۋلىنا ءۇمىتتى. سول ءۇشىن گولوۆكين الۆارەستى شارشى الاڭعا شاقىرىپ جاتىر. الايدا, الۆارەستىڭ كومانداسى وتانداسىمىزعا ءالى ناقتى جاۋابىن ايتقان جوق.
داستان كەنجالين.
دەرەك: ەgemen.kz
فوتو: ەgemen.kz, facebook الەۋمەتتىك جەلىسى
