قازاق سالتىمەن قىز ۇزاتۋ

وزگە ۇلت وكىلدەرى تويىنىڭ ءسانى بولدى اقتوبە قالاسىنداعى «انالار ۇيىندە» قىز ۇزاتۋ تويى ءوتتى. وسى ءۇيدىڭ 18 جاس­تاعى ەۆگەنيا ارسەنەۆا ەسىمدى قىزى تۇرمىسقا شىعىپ, ۇزاتىلدى. تويدىڭ ءوزىن «انالار ءۇيىنىڭ» ديرەكتورى تاڭسۇلۋ لاقوۆا ۇيىمداستىردى. بۇل ۇيدەن تالاي قىز ۇزاتىلىپ, تۇرمىسقا شىققان. ال وسى جولعى تويدىڭ ءبىر ەرەكشەلىگى, جاڭا ومىرگە اياق باسقان جاستار وزگە ۇلت وكىلدەرى بولعانىمەن, قۇدا ءتۇسۋ, كەلىن الۋ ءراسىمى قازاقى سالت-ءداستۇر­مەن ءوتتى. ەۆگەنيا ارسەنەۆا «انالار ۇيىندە» 8 ايدان بەرى تۇرىپ كەلىپتى. ونىڭ دانيل ەسىمدى 3 ايلىق ۇلى بار. وسى ۋاقىتتا ەۆگەنيا بولاشاق جارى ميحايل ماسلوۆپەن كەزدەسىپ, ەكەۋى ءبىر-بىرىنە عاشىق بولىپتى. كۇيەۋ جىگىت ەۆگەنيانى ءبىر كورگەننەن ۇناتىپتى. كەيىن ميحايل ەۆگەنيامەن ءجيى كەزدەسكەن سايىن عاشىق بولعانىن جاسىرمايدى. «جەنيا ماعان بىردەن ۇنادى. ۇناعان ادامدى ۇمىتۋ وڭاي ما, ەكەۋمىز ءجيى كەزدەسەتىن بولدىق. ءسويتىپ, عاشىق بولىپ قالدىم. ول ماعان بالاسىنىڭ بار ەكەنىن ايتتى. بىراق مەن وعان كوز جۇما قارادىم. ەڭ باستىسى, ەكەۋمىزدىڭ ماحابباتىمىز ماڭىزدى. ال بالا ءبىزدىڭ بولاشاعىمىز. ونى تۋعان ۇلىم­داي تاربيەلەيمىن», – دەيدى ميحايل. جەنيا بولسا, دانيلدەن باسقا دا بالا سۇيگىسى كەلەتىنىن ايتادى. «مەن ميحايلگە ادال جار, بالالارىمىزدىڭ سۇيىكتى اناسى بولامىن. ماعان ودان باسقا باقىت جوق», – دەيدى. قازىر ەرلى-زايىپتىلار بولاشاققا جوسپارلارىن قۇرىپ قويعان. ميحايل اقتوبەنىڭ  شەتىنەن جەر الىپ, ءۇي سالۋدى ماقسات ەتىپ وتىر. «انالار ءۇيىنىڭ» ديرەكتورى تاڭسۇلۋ لاقوۆانىڭ ايتۋىنشا, جاس وتباسى ازىرگە ءۇي جالداپ تۇرادى. كەيىن ميحايل جەر الىپ, ءۇي سالىپ جاتسا, سوندا كوشەدى. ال جالپى, تاڭسۇلۋ لاقوۆا «انالار ۇيىنەن» ءوز تەڭىن تاۋىپ, تۇرمىس قۇرىپ جاتقان قىزدار كوپ», – دەيدى. «انالار ءۇيى» اشىلعاننان بەرى وسى جەردە 10 توي بولىپتى.  ال قازىر مۇندا 13 جاس انا سابيلەرىمەن تۇرىپ جاتىر. ءبارى دە تۇرمىس قۇرۋدى ماقسات ەتىپ وتىر. داستان كەنجالين, «ەگەمەن قازاقستان»