ەكپا-نىڭ سەسسياسىنا قاتىستى

سەنات توراعاسىنىڭ ورىنباسارى اسقار بەيسەنباەۆ باستاعان قازاقستاننىڭ پارلامەنتتىك دەلەگاتسياسى ەۋروپا كەڭەسى پارلامەنتتىك اسسامبلەياسىنىڭ كوكتەمگى سەسسياسىنا قاتىستى. دەلەگاتسيا قۇرامىنا سەناتور گەورگي كيم ەنگەن بولاتىن, دەپ حابارلادى سەناتتىڭ ءباسپاسوز قىزمەتى. سەناتورلار پارلامەنتتىك اسسامبلەيانىڭ توراعاسى پەدرو اگرامۋنتپەن, گفر بۋندەس­تاگى­نىڭ دەپۋتاتى اكسەل فيشەرمەن, يسپاندىق دەپۋتات جوردي چۋكلامەن, سونداي-اق, بولگاريا حالىق جينالىسىنىڭ دەپۋتاتى حاميد حاميدپەن ەكىجاقتى كەزدەسۋلەر وتكىزدى. ەكپا ساياسي ماسەلەلەر جانە دەموكراتيا جونىندەگى كوميتەتىنىڭ وتىرىسىندا كۇن تارتىبىندەگى «ەۋروپالىق كەڭەستىڭ قازاقستانمەن قاتىناستارى» تارماعىن تالقىلاۋ اياسىندا اسسامبلەيا دەپۋتاتتارى ا.فيشەر جانە ج.چۋكلا ءسوز الىپ, ءبىزدىڭ ەلىمىزدە وتكەن پارلامەنت ءماجىلىسىنىڭ سايلاۋى تۋرالى وڭ پىكىر ءبىلدىردى جانە قازاقستاندى ەۋروپالىق كەڭەستىڭ سەنىمدى ارىپتەسى جانە ايماقتاعى تۇراقتىلىق تىرەگى رەتىندە اتاپ ءوتتى. ەكپا دەپۋتاتتارى دەموكراتيالىق قوعام­نىڭ ودان ءارى دامۋى جولىندا ەلەۋلى تابىستارعا قول جەتكىزگەن قازاقستان مەن ەۋروپالىق كەڭەستىڭ ىنتىماقتاستىعىن نى­عاي­تۋدىڭ ماڭىز­دىلىعى جونىندە ورتاق پىكىر­دە بولدى. سەنات توراعاسىنىڭ ورىنباسارى ەۋروپالىق كەڭەستىڭ قىلمىستىق سوت تورەلىگى سالاسىنداعى كونۆەنتسيالارىنا قازاقستاننىڭ قوسىلۋى باسىم مىندەت ەكەنىن اتاپ ءوتتى. ول ەۋروپالىق ارىپتەستەردى بەس ينستيتۋتتىق رەفورما – ۇلت جوسپارى مازمۇنىمەن, «نۇرلى جول» ينفرا­قۇرىلىمدىق دامۋ باعدارلاماسىمەن, سونداي-اق, دەموكراتيالىق رەفورمالاردى ودان ءارى ىسكە اسىرۋ جونىندەگى قابىلدانعان شارالارمەن تانىستىردى.