ەلباسى قوعام قايراتكەرى ساعيدوللا قۇباشەۆتىڭ تۋىستارىنا كوڭىل ايتتى

استانا. 20 ءساۋىر. قازاقستان پرەزيدەنتى نۇرسۇلتان نازارباەۆ مەملەكەت جانە قوعام قايراتكەرى ساعيدوللا قۇباشەۆتىڭ قايتىس بولۋىنا بايلانىستى تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى. ەلباسى قايعىعا ورتاقتاسىپ, كوڭىل ايتتى. نۇرسۇلتان نازارباەۆ ساعيدوللا قۇباشەۆتىڭ ۇزاق جىل ءتۇرلى مەملەكەتتىك ورگانداردا قىزمەت ىستەپ, ەلىمىزدىڭ الەۋمەتتىك-ەكونوميكالىق دامۋىنا ايرىقشا ۇلەس قوسقانىنا توقتالىپ ءوتتى. اتاپ ايتقاندا, ول بىرنەشە وبلىستىق اتقارۋ كوميتەتتەرىنىڭ توراعاسى, گۋرەۆ جانە سەمەي وبلىستىق پارتيا كوميتەتتەرىنىڭ ءبىرىنشى حاتشىسى, مينيسترلەر كەڭەسى توراعاسىنىڭ ورىنباسارى, قازاقستان كومپارتياسى ورتالىق كوميتەتىنىڭ ەكىنشى حاتشىسى قىزمەتتەرىن اتقارىپ, باسقارۋ جۇمىستارىندا شىڭدالدى. «ول قازاقستاننىڭ ءوسىپ-وركەندەۋىنە, جاس بۋىندى تاربيەلەۋگە كوپ ەڭبەك ءسىڭىردى. ساعيدوللا قۇباشەۆتىڭ جەمىستى قىزمەتى جوعارى ماراپاتتارمەن اتاپ ءوتىلدى», – دەلىنگەن جەدەلحاتتا. نۇرسۇلتان نازارباەۆ ساعيدوللا قۇباشەۆتىڭ جارقىن بەينەسى ءاردايىم قازاقستاندىقتاردىڭ جۇرەگىندە ساقتالاتىنىن ايتتى. تالعات رايىمبەك. دەرەك, فوتو: akorda.kz.