الەم-جالەم الەم
امەريكالىق 46 جاستاعى ءانشى مەراي كەري جاقىندا ءوزىن 70 ملن. دوللارعا ساقتاندىردى. سونىڭ ىشىندە ول اياعىنىڭ قۇنىن مۇنىڭ تەڭ جارتىسىنا باعالاعان.
بۇعان ءانشىنىڭ قازىر داڭقى دۇرىلدەپ تۇرعانى ايرىقشا اسەر ەتسە كەرەك. وسى تۇستا ول ءبىراز ارتىق سالماعىن جوعالتىپ, الداعى تامىز ايىندا بولاتىن ۇيلەنۋ تويىنا قىزۋ دايىندالىپ جاتقان كورىنەدى.
پىسىق جىگىت پاتەرىنە سىرا اعاتىن قۇبىر كىرگىزگەن
رەسەيدىڭ چەليابى قالاسىنىڭ تۇرعىنى ءوزىنىڭ پاتەرىنە سىرا اعاتىن قۇبىر تارتىپ الىپتى. اس ءۇيدەگى كراننىڭ بىرىنەن سۋ اقسا, ەكىنشىسىنەن سالقىنداتىلعان كوبىكتى سۋسىن لەكىلدەي جونەلەدى.
جوعارى ءبىلىمدى مەحانيك اندرەي ەرماكوۆ وسىلاي ءوز ارمانىن جۇزەگە اسىرىپتى. ول تۇربانى پاتەرىنىڭ استىنداعى ماگازيننەن تارتىپتى. باسىندا يدەياعا تاڭعالعان ساۋدا جۇيەسىنىڭ باسشىلىعى جوبانى قايتا جاساپ, ونى تۇرعىن ءۇي ينسپەكتسياسىندا تىركەتىپ العان. قازىر ايتىلعان پاتەرگە مىنا «عاجايىپتى» كورمەكشى بولىپ كەلەتىندەر كوپ كورىنەدى.
فۋتبولشىنىڭ شاشىن الۋ ءۇشىن ماتچ توقتاتىلدى
ساۋد ارابياسىندا «ءال-شاباب» جانە «ءال-كاديسيا» فۋتبول كوماندالارى اراسىندا ءوتىپ جاتقان چەمپيونات ماتچى كەزىندە قاقپاشى ۆاليد ابدۋللانىڭ شاشىن تۋرا الاڭ ۇستىندە الۋعا تۋرا كەلگەن.
بۇل شارا كەزدەسۋ تورەشىسىنىڭ ۇيعارىمى بويىنشا جاسالعان. ول الاڭ يەلەرى گولكيپەرىنىڭ شاشى تىم ءوسىپ كەتكەنىن بايقاعان سوڭ, وسىنداي قادامعا بارعان. ال يسلامدا ەر ادامنىڭ شاشتى شامادان تىس ءوسىرىپ جىبەرۋى ءدىننىڭ ادەبىن قورلاعاندىق بولىپ تابىلادى.
جالاڭاش كونكۋرسقا قاتىسقان مۇعالىم قىزمەتىنەن كەتتى
مەكسيكانىڭ باستاۋىش سىنىپتارعا ساباق بەرەتىن 24 جاسار مۇعالىمى جاعاجايدا جارتىلاي جالاڭاش تۆەرك كورسەتكەنى ءۇشىن قىزمەتىمەن قوشتاسۋعا ءماجبۇر بولدى.
كلاريسسا ەسىمدى بويجەتكەن ءوز جۇمىس ورنىنان 400 ميل قاشىقتىقتا ورنالاسقان جەرگە دەمالۋعا بارعانىندا جاعاجايدا قان قىزدىراتىن مۋزىكانىڭ اۋەنىمەن وتكەن جارتىلاي جالاڭاش تۆەرك كونكۋرسىنا بيكيني «كاستومىمەن» قالاي قوسىلىپ كەتكەنىن ءوزى دە بايقاماي قالعان. سىمباتتى سۇلۋ سول سايىستا باس بايگەنى يەمدەنىپ, 260 دوللار اقشا العان. بىراق كابو-سان-لۋكاس كۋرورتىن دۇرىلدەتكەن بۇل جەڭىس وعان وتە قىمباتقا تۇسكەن. سول ساتتەر تۇسىرىلگەن ۆيدەو جەلىدەن كورىنگەن بويدا ءوزى دە قىزمەتتەن قۋىلىپ كەتكەن.
12 جاسار بالا ەكى كۇن اۆستراليا پرەمەرى بولدى
«ۆيكيپەديانىڭ» قايتا وڭدەلگەن بەتتەرى ارقاسىندا 12 جاسار بالا اۆستراليانىڭ 30-شى پرەمەرى بولىپ شىعا كەلدى.
مۇنى ورلي فەنەلون ەسىمدى بالاقايدىڭ ءوزى جاساپتى. ول سايتتا جوندەۋ جۇمىستارىنىڭ ءجۇرىپ جاتقانىن پايدالانىپ, ءوز اتىن اۆستراليا پرەمەر-مينيسترلەرى ونلاين-ەنتسيكلوپەدياسى تىزىمىنە كىرگىزىپ جىبەرگەن. وسىلايشا, فەنەلون وسىنشالىقتى جوعارى ورىنتاقتا وتىرعان ەڭ جاس لاۋازىم يەسى اتانىپ شىعا كەلگەن.
اقپارات اگەنتتىكتەرى ماتەريالدارى نەگىزىندە دايىندالدى
