سان سوقتىرعان سالعىرتتىق

باسقا-باسقا ەمەس,  قاقاعان قاڭ­تاردا شاعىن شاھارلاردىڭ قا­پەلىمدە جىلۋسىز قالۋى قا­راعاندى ايماعىندا ءبىرىنشى  رەت ۇشىراسىپ جۇرگەن جاي ەمەس. ماسەلەن, بۇدان ءتورت-بەس جىل بۇ­رىن شاحتينسك قالاسى باستان كەشكەن توسىن جاعداي ۇمىتىلا قويعان جوق. سونىڭ ساباعى تيەر­لىكتەي-اق بولسا دا,  وكى­نىش­كە قاراي, ءالى ولاي بولا قوي­ما­عان ەكەن. ەندى, مىنەكي, پريوزەرسكدە دالمە-ءدال سول قالپىندا قاي­تالانعان وقيعا 13 مىڭ تۇرعىنى بار قالاعا  جاڭا جىلدان بەرى  ەكى اياقتى ءبىر ەتىككە تىقتىرىپ كەلدى. راس, شۇعىل شارالار  قول­دانۋدىڭ ارقاسىندا  كەنەتتەن كي­لىككەن قيىندىقتىڭ باستاپقى كۇندەرىندەگى مۇلدەم مۇشكىل كۇيدىڭ قازىر بەتى قايتقان. الاي­دا, جىلۋمەن قامتاماسىز ەتۋ تولىق قالپىنا كەلدى دەۋ دە قيىن. وسى ايدىڭ اياعىنا دەيىن جاعدايدى تۇزەۋگە كۇش سالىنىپ جاتىر. بۇگىندە انىقتالىپ وتىر­عان­داي,   قىس ورتاسىندا ۇيلەردىڭ ادام تۇرعىسىز بولىپ قالۋى  بۇل ىسكە جاۋاپتىلاردىڭ ءوز مىندەتتەرىنە سالدىر-سالاق, نەمقۇرايدى قاراۋى سالدارىنان ورىن العان. قىسقا دايىندىق كەزىندە قالالىق اكىمدىك ءبارىن  ويداعىداي  ساناپ, بىتپەگەن جۇمىستاردىڭ بەتىن جاۋ­ىپ, ماسەلەلەردىڭ ءبىرازىنا جەتە ءمان بەرمەگەن. باسقاسىن بىلاي قويعاندا, وتكەن جىلدىڭ سوڭعى كۇندەرىندە, دالىرەك ايتقاندا, 29 جەلتوقساندا جىلۋ تاراتۋ قون­دىر­عىلارىندا اپاتتى اقاۋ  پايدا بولىپ, ەرتەڭىندە ونداعان تۇر­عىن ءۇي جىلۋسىز قالعاننىڭ ءوزىن­دە دە 4 قاڭتارعا دەيىن وبلىسقا الاڭدارلىق  ەشتەڭە جوقتاي حابارلار جونەلتىلىپ تۇرعان.  سو­نىڭ سالدارىنان وبلىستىق اكىم­دىكتەگىلەر پريوزەرسك قالاسىنداعى قازاندىقتىڭ «شىقپا, جانىم, شىق­پامەن» جۇمىس ىستەپ تۇر­عا­نىنان  حابارسىز  بولعان. كەيىن جاعداي ودان سايىن كۇردەلەنىپ, ونى تۇزەۋگە جەرگىلىكتى كۇش جەتىمسىز بولعاندا عانا وقيعانىڭ انىعى امالسىزدان ءمالىم ەتىلەدى. ال بۇل ارالىقتا جىلۋ قازان­دىق­تارى بىرىنەن سوڭ ءبىرى توقتاپ, بار­لىق دەرلىك ۇيلەردى ازىناعان سۋىق جايلاپ شىعا كەلگەن ەدى. قازاندىقتاردىڭ اياق اس­تى­نان قاۋقارسىز قالاتىن رەتى بو­لىپ­تى. الدىن الا جەتكىلىكتى ءجون­دەۋدەن ءوتىپ, قالىپتى جۇ­مىس ىستەۋگە دايىندالماعان. مۇ­نىڭ اقىرى ىستەن شىعۋ­لارىنا اكەلىپ سوققان. پريوزەرسكدەگى جاعدايعا باي­لانىستى پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى ءا.يسەكەشەۆ باستاعان ۇكىمەتتىك كوميسسيا اپاتتىڭ سەبەپتەرىن تو­لىق انىقتادى. ۇكىمەت باس­شى­سىنىڭ تاپسىرماسىنا وراي اپاتقا  جول بەرگەن  ادامدارعا وبلىستىق اكىمدىك تاراپىنان  جا­زالاۋ شارالارى  قولدانىلدى.  جىلۋمەن قامتاماسىز ەتۋ ماۋ­سىمىنا جاۋاپسىز قاراعانى ءۇشىن قالا اكىمى قايرات سما­عۇلوۆ قىزمەتىنەن بوساتىلىپ, وبلىس اكىمىنىڭ ورىنباسارى باۋ­ىر­جان سماعۇلوۆ پەن ەنەر­گەتيكا جانە كوممۋنالدىق شارۋاشىلىق باس­قار­ماسىنىڭ باستىعى مارات ماديەۆكە قاتاڭ سوگىس جاريالاندى. سونىمەن بىرگە, ەكونو­مي­كالىق قىلمىسقا جانە سى­باي­لاس جەمقورلىققا قارسى  كۇرەس جونىندەگى وبلىستىق دەپارتامەنت پريوزەرسك قالالىق اكىمدىگى اپ­پاراتى مەن قالالىق تۇرعىن ءۇي-كوممۋنالدىق شارۋاشىلىق  ءبو­لى­مى  لاۋازىمدى قىزمەتكەر­لە­رىنە قاتىستى قىلمىستىق ءىس قوزعادى. قارجى پوليتسەيلەرى بىلتىر قازاندىقتار مەن جىلۋ جۇيەلەرىن جوندەۋ ءۇشىن بيۋد­جەتتەن بولىنگەن 400 ميلليون تەڭگەنىڭ  قالايشا  جۇمسالعا­نىن تەكسەرەدى. مۇنىڭ سىر­تىن­دا تەكسەرۋ ىستەرىن قوسا قولعا  العان وبلىستىق پروكۋرا­تۋ­را­نىڭ دا انىقتايتىن جايلارى بار ءتارىزدى. بۇگىندە قالانى جىلۋمەن قامتۋ ماسەلەسى بىرتىندەپ جولعا قويىلىپ كەلەدى. ايقىن نەسىپباي. قاراعاندى وبلىسى.