استانا. 11 ءساۋىر. «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنا جاڭا باسشى تاعايىندالدى. ەلباسىنىڭ ۇيعارىمىمەن, قۇرىلتايشىنىڭ شەشىمىمەن «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى بولىپ ەركىن ساعىندىق ۇلى قىدىر بەكىتىلدى. بۇل تۋرالى egemen.kz ءتىلشىسى حابارلادى.
وسىعان ارنالعان جيىندا ينۆەستيتسيالار جانە دامۋ ۆيتسە-ءمينيسترى ساكەن سارسەنوۆ ءسوز الىپ, رەداكتسيانىڭ جاڭا باسشىسىنا قىزمەتتە ساتتىلىك تىلەپ, جىلى لەبىزىن ءبىلدىردى. ول سونداي-اق, وسى ۋاقىتقا دەيىن رەداكتسياعا باسشىلىق جاساپ كەلگەن, بۇگىندە پارلامەنت ءماجىلىسىنىڭ دەپۋتاتى بولىپ سايلانعان ساۋىتبەك ابدراحمانوۆقا گازەتتى ۇزاق جىلدار تابىستى باسقارعانى ءۇشىن راحمەت ايتتى.
ءوز كەزەگىندە ساۋىتبەك ابدراحمانوۆ ۇزاق جىلدار قىزمەتتەس بولعان ۇجىم مۇشەلەرىنە العىس سەزىمىن ءبىلدىردى.
ەركىن قىدىر 1962 جىلى 1 تامىزدا تۋعان. 1984 جىلى ءال-فارابي اتىنداعى قازاق ۇلتتىق ۋنيۆەرسيتەتىن – جۋرناليستيكا, 2007 جىلى قازاق جول قاتىناستارى ۋنيۆەرسيتەتىن ەكونوميكا جانە باسقارۋ ماماندىعى بويىنشا ءبىتىردى.
ەڭبەك جولىن 1984 جىلى شىمكەنت قالاسىنداعى قورعاسىن زاۋىتىندا سلەسار بولىپ باستادى. 1985-1990 جىلدارى سول كەزدەگى شىمكەنت وبلىستىق «وڭتۇستىك قازاقستان» گازەتىندە ءتىلشى بولىپ قىزمەت اتقاردى. 1990-1996 جىلدارى «سوتسياليستىك قازاقستان» گازەتىنىڭ وڭتۇستىك قازاقستان وبلىسىنداعى مەنشىكتى ءتىلشىسى بولدى. 1996-2006 جىلدارى «ەگەمەن قازاقستان» رەسپۋبليكالىق گازەتى باس رەداكتورىنىڭ ءبىرىنشى ورىنباسارى, 1997-1998 جىلدارى قازاقستان رەسپۋبليكاسىنىڭ پرەزيدەنتى جانىنداعى جوعارى تارتىپتىك كەڭەستىڭ مۇشەسى, 2007-2008 جىلدارى «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ ديرەكتورى جانە 2008 جىلدان 2009 جىلدىڭ 7 مامىرىنا دەيىن «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ ۆيتسە-پرەزيدەنتى بولىپ قىزمەت ەتتى. 2009 جىلدىڭ 7 مامىرىنان بۇگىنگە دەيىن «ەگەمەن قازاقستان» رەسپۋبليكالىق گازەتى» اكتسيونەرلىك قوعامى باسقارما توراعاسىنىڭ ورىنباسارى (ۆيتسە-پرەزيدەنت) قىزمەتىن ابىرويمەن اتقارىپ كەلدى.
بۇل ەڭبەكتەرى لايىقتى باعالانىپ, 1999 جىلى جۋرناليستيكا سالاسى بويىنشا پرەزيدەنت سىيلىعىنىڭ لاۋرەاتى, 2010 جىلى «قازاقستاننىڭ ەڭبەك سىڭىرگەن قايراتكەرى» اتاعىن الدى. ەركىن قىدىردىڭ قالامىنان تۋعان شىعارمالار «ۇساقتاما, ۇكىمەت» (2001 ج.), «وتىرار» (2009 ج.) كىتاپتارى بولىپ جارىققا شىقتى. وتباسىلى. ءۇش بالاسى بار.
ەلامان قوڭىر.
دەرەك: egemen.kz.
فوتو: ورىنباي بالمۇرات, ەرلان وماروۆ.
