ۇلتتىق ليگا چەمپيونى اتاعىن ششۋچينسك قالاسىندا «وقجەتپەس» پەن ەلوردانىڭ «استانا بارىستارى» باسكەتبولشى قىزدارى ساراپقا سالدى. تارتىستى وتكەن العاشقى ويىندا «وقجەتپەس» قارسىلاستارىنا 75:85 ەسەبىمەن ەسە جىبەردى. كەلەسى ويىندا كوكشەتاۋلىقتار 86:82 ەسەبىمەن باسىم ءتۇستى. ال سوڭعى كەزدەسۋدە «وقجەتپەستىڭ» قىزدارى شەبەر ويىن ورنەگىن كورسەتىپ, «استانا بارىستارىن» 92:72 ەسەبىمەن ويسىراتا ۇتتى. ءسويتىپ, ولار قازاقستان رەسپۋبليكاسى ۇلتتىق ليگاسىنىڭ چەمپيونى اتاندى. «وقجەتپەس» بۇدان بۇرىن, 2006 جىلى, العاش رەت التىن مەدالدى جەڭىپ العان بولاتىن. وسى جولى «وقجەتپەستىڭ» كاپيتانى ەۆگەنيا سپيتكوۆسكايا ماۋسىمنىڭ ۇزدىك شابۋىلشىسى, ونىڭ كوماندالاسى الينا ياگۋپوۆا ماۋسىمنىڭ ۇزدىك ويىنشىسى ارنايى جۇلدەسىمەن ماراپاتتالدى. سونداي-اق, اتالعان چەمپيوناتتا اقمولا وبلىسىنىڭ ەكىنشى قۇراما كومانداسى پاۆلوداردىڭ «ەرتىس» باسكەتبولشى قىزدارىمەن قولا مەدال ءۇشىن جارىستا جەڭىپ شىقتى. «وقجەتپەس» كومانداسىنىڭ باسكەتبولشى قىزدارى جارىس اياقتالىسىمەن قىزۋ جاتتىعۋعا كىرىسىپ كەتتى. ولار 8-10 ساۋىردە ماريامپول قالاسىندا وتەتىن «بالتىق ليگاسى» چەمپيوناتىنىڭ اقتىق باسەكەسىنە قاتىسادى.
باقبەرگەن امالبەك,
«ەگەمەن قازاقستان». اقمولا وبلىسى.
