الماتىعا ىڭكار اعىلشىن جۋرنالى

بۇل شاھاردى جىبەك جولى بويىنداعى ەڭ ادەمى قالاعا بالاپ وتىر ءوزىنىڭ 1000 جىلدىق تاريحىن اتاپ وتۋگە قىزۋ دايىندالىپ جاتقان الماتى شاھارىنا كۇنى كەشە ەۋروپا اۋماعىنان تاعى ءبىر جاعىمدى جاڭالىق جەلدەي ەسىپ جەتتى... ۇلىبريتانيادا كوپ دانامەن شىعاتىن Wanderlust جۋرنالى الماتىنى ۇلى جىبەك جولى بويىنداعى ەڭ شىرايلى اسەم شاھارلاردىڭ قاتارىنا كىرگىزىپتى. وسى ارادا بۇل جول تارماعىنىڭ بويىندا قىتاي, موڭعوليا, يران, اۋعانستان, تۇركيا, وزبەكستان جانە تۇرىكمەنستان ەلدەرى جاتقا­نىن قايتالاي ەسكە سالا كەتكەندى ءجون كورىپ وتىرمىز. تۋريستىك-تانىمدىق شولۋلارعا بەيىلدى باسىلىم تىلشىلەرى ۇلى جىبەك جولىمەن 23 كۇندىك ساياحاتتاۋ بارىسىندا Top-8 تالابى بويىنشا قالتقىسىز ساراپتاما جاساعان. سول تالداۋدىڭ قورىتىندىسىنا سايكەس, ولار قازاقستاننىڭ ەڭ كورىكتى مەكەنى رەتىندە الماتى مەن شارىن شاتقالىن اتاعان ەكەن. جۋرنال ساراپشىلارى: «ۇزىن­دىعى 90 شاقىرىمعا سوزىلىپ جاتقان ايرىقشا شاتقالعا قاراي بىردەن اتتانباس بۇرىن مىندەتتى تۇردە الدىمەن الماتى شاھارىنا ات شالدىرىپ الىڭىز. سۇلۋ قالانىڭ كوز تويماس كوركىنە تامسانباي ءوتۋ ەش مۇمكىن ەمەس, شاتقالعا ساپاردى شاھاردان باستاۋ كەرەك», – دەپ قىزىقتى وي تۇيىندەيدى. بۇل كۇندەرى تور-8 ساراپ­تاماشىلارىنىڭ ايتقانى ايداي كەلىپ تۇر. نەشە كۇن, نەشە ءتۇن ۇزدىك-سوزدىق تاۋسىلماي مايدالاپ جاۋعان كوكتەمنىڭ اق جاۋىنى الماتىنى جاڭا تۋعان سابيدەي شومىلدىرىپ, تاپ-تازا ەتىپ الدى. قاۋ ەتىپ شىققان كوك مايسا ونسىز دا ءان قاناتىندا جۇرگەن الما­تىنى, ءتىپتى, قۇلپىرتىپ جىبەردى-اي... تالعات ءسۇيىنباي, «ەگەمەن قازاقستان». الماتى.