ارالداعى ارا شارۋاشىلىعى

ايماق ءۇشىن جاڭالىق بولىپ تۇر ارال دەسەك, كوز الدىمىزعا اق باستى توبەلەر مەن شاعىل قۇمدار, ودان قالدى, سۋى تارتىلىپ, تابانى قۇرعاپ جاتقان تەڭىز كوز الدىمىزعا كەلەدى. دەگەنمەن, قازىرگى ارال تاپ ونداي ەمەس. بۇگىندە ارال تەڭىزى قايتا قالپىنا كەلە باستادى. اۋداننىڭ تۇرمىس-تىرشىلىگى تۇزەلىپ, بالىق شارۋاشىلىعى دامي ءتۇستى. سونداي-اق, مال ءوسىرۋ – ارالدىقتاردىڭ اتا كاسىبى. سوڭعى جىلدارى اۋدان حالقى مەملەكەتتىڭ قولداۋى مەن قامقورلىعىن سەزىنىپ, باسقا سالاعا دا دەن قويىپ كەلەدى. سونىڭ ءبىرى ارا شارۋاشىلىعى بولىپ وتىر. تاياۋدا جاڭا كاسىپتىڭ تىزگىنىن ۇستاعىسى كەلگەن نۇربەك سەكسەنباەۆ «بيزنەستىڭ جول كارتاسى-2020» باعدارلاماسى نەگىزىندە قايتارىمسىز 1 ملن. تەڭگەلىك نەسيە ۇتىپ الدى. – اتالعان باعدارلاما اياسىندا ارال­دىقتار باستاۋىش كاسىپكەر رەتىندە 300 مىڭ تەڭگەدەن 3 ميلليون تەڭگەگە دەيىن قايتارىمسىز نەسيەگە قول جەتكىزۋدە. ارينە, بۇل جاقسى. ەندى اۋدانىمىزدا ءتۇرلى باعىتتاعى ءوندىرىس سالاسى تۇلەپ, حالىقتىڭ تۇرمىسى تۇزەلەدى. ەكونو­ميكامىز دا ىلگەرىلەي تۇسەدى, – دەدى قىزىلوردا وبلىستىق كاسىپكەرلەر پالاتاسى ارال اۋداندىق فيليالىنىڭ ديرەكتورى قادىرحان ەڭسەپوۆ. سونداي-اق, ول: «بىزگە نۇرلىبەك سەك­سەنباەۆتىڭ ارا شارۋاشىلىعىن دامىتۋ ماقساتىنداعى جوباسى ۇنادى. ەندى باستاۋىش كاسىپكەر العان نەسيەسى بويىنشا جاڭا ىسكە كىرىسىپ, 2 ادامدى تۇراقتى جۇمىسپەن قامتيدى», – دەدى. ايتا كەتەيىك, يننوۆاتسيالىق جوبانىڭ يەسىنە كاسىپكەرلەر پالاتاسىنىڭ ماماندارى بيزنەس-جوسپاردى تەگىن ازىرلەپ بەرگەن. مۇنىڭ ءوزى كاسىپكەر ءۇشىن ۇلكەن كومەك ەكەنى ءسوزسىز. تالعات رايىمبەك, «ەگەمەن قازاقستان».