ىرىسى تاسىعان ىنتىماقشىل اۋىل

اقتەرەكتىكتەر جاڭا كۇندى جاقسى نىشاندا قارسى الدى ءبىز ەس بىلگەلى قوڭىرتوبەنىڭ ەتەگىندەگى مايتوبە مامىر تۋىسىمەن-اق مارە-سارە بولىپ جاتۋشى ەدى. بىراق كەيىنگى جىلدارى مۇنداي شارالار كۇرت ازايىپ, مايتوبەگە جينالماعالى دا ءبىرشاما ۋاقىت بولعان ەكەن. «توي – قازىنا» دەپ باعالايتىن قازەكەڭ بيىلعى ناۋرىزدى دا ءوز دەڭگەيىندە اتاپ ءوتتى. اسىرەسە, الماتى-تاشكەنت كۇرە جولىنىڭ بويىندا ورنالاسقان قامباسى استىققا, اۋلاسى مالعا تولعان اقتەرەك اۋىلى بۇرىن-سوڭدى بولماعان جاعدايدا قارسى الدى. وعان مۇرىندىق بولعان – اۋىل ازاماتتارىنىڭ بەرەكە-بىرلىگى, ىنتىماعى, وسىندا تۋىپ-وسكەن جاستاردىڭ ۇيىمشىلدىعى, سونى سەرپىلىسى... بيىلعى قىستان امان-ەسەن شىققان اقتەرەكتىكتەر قاسيەتتى ءاز ناۋرىزعا جىل­­­دا­عىدان ەرەكشە دايىندالدى. اۋىل سىرتىنداعى مايتوبەنىڭ, ياعني, قاتار جاتقان قوس ءدوڭنىڭ بىرىنە شاعىن ساحنا ورناتىپ, ەكىنشىسىنە قاز-قاتار اق­شاڭقان كيىز ۇيلەر تىگىپ, التىباقان قۇرىپ, الامان بايگەنىڭ شەڭبەرىن سىزىپ, اۆتوتۇراق پەن ونىڭ كۇزەتىنە دەيىن ساقاداي-ساي ويلاستىرىلدى. ءسويتىپ, ۇلىستىڭ ۇلى كۇنگى ۇلان-اسىر دۋمانىنا اۋىلدىڭ ەڭكەيگەن كارىسىنەن باس­تاپ ەڭبەكتەگەن بالاسىنا دەيىن كوشىپ بارعانى ازداي, كورشى اۋىلدىڭ دا شابارماندارى, تولاعاي مىقتى كۇرەسكەر جىگىتتەرى, ءتىپتى الماتىدان ات ارىتىپ جەتكەن سىيلى قوناقتار مەن بەلگىلى ونەر جۇلدىزدارىنىڭ دا ءبىرازى وسىندا. ناۋرىز تويعا جينالعاندار ءبىر-ءبىرىن قۇتتىقتاپ, كوپتەن كورمەگەن اۋىلداستار ءوزارا قاۋقىلداسىپ مارە-سارە. جينالعان جۇرتشىلىق ناۋرىزدىڭ باستى تاعامى – ناۋرىزكوجەدەن ءدام تاتتى. ءبىر ايتا كەتەرلىگى, اۋىل اقساقالدارى مەن اقتەرەك شارۋا قوجالىعىنىڭ توراعاسى, اۋداندىق ءماسليحاتتىڭ دەپۋتاتى, ەلدىڭ كوركەيۋىنە ەلەۋلى ۇلەس قوسىپ جۇرگەن تەمىرلان ءشاينۇسىپوۆ جانە اۋىل اكىمى عابيت شورتانباەۆتىڭ باستاماسىن ازاماتتار اۋىزبىرشىلىك تانىتىپ قوستادى. ءتىپتى, وزدەرى دەمەۋشىلىك جاسادى. سوڭعى وتىز جىلدا اقتەرەكتەن تۇلەپ ۇشقان ازاماتتاردىڭ ءبىرى كولىك تىكسە, ەندى ءبىرى قارجىلاي كومەك كورسەتىپ, ەل بىرلىگى ءۇشىن ايانىپ قالمادى. ءۇش مىڭنان استام ادام جينالعان ءدۇبىرلى تويدا ءۇش شاقىرىمدىق جاياۋ بايگە, تاي, قۇنان, الامان بايگە, تەڭگە الۋ, قىز قۋ, قازاقشا كۇرەس, اۋدارىسپاق سياقتى ۇلتتىق ويىن تۇرلەرى ۇيىمداستىرىلدى. اسىرەسە, قوشقار كوتەرۋدەن سىنعا تۇسكەن جىگىتتەردىڭ سايىسى جينالعانداردىڭ دەلەبەسىن قوزدىردى. بۇل جارىستا 70 كيلولىق قوشقاردى 47 رەت كوتەرگەن كە­نەن ازىرباەۆ اۋىلىنىڭ جىگىتى مەي­رامبەك دالىباەۆ جەڭىمپاز دەپ تانىلدى. الامان بايگەگە تىگىلگەن اۆتو­كولىك تە كورشى اۋىلعا قاراي جول تارتتى. وسىلايشا, قازاقى قايماعى بۇزىل­ماعان اۋىلدا ىزعارلى قىستىڭ كەتىپ, سامارقاننىڭ كوك تاسى جىبىگەن, ءار جان يەسىنە ءۇمىت, جىلى شىراي, نۇرلى شۋاق اكەلىپ, ىرىستىڭ ىدىسىن تولتىراتىن جاڭا كۇن – اقتەرەكتىكتەردىڭ بەرەكە-بىرلىگىن ارتتىراتىنداي, كەيىنگى ۇرپاققا ونەگە بولاتىنداي دەڭگەيدە اتالىپ ءوتتى. گۇلزەينەپ سادىرقىزى, «ەگەمەن قازاقستان».