قۇراما ماۋسىمدى جەڭىسپەن باستادى

فۋتبولدان قازاقستان قۇراماسى 26 ناۋرىز كۇنى ازەربايجانمەن جولداستىق كەزدەسۋ وتكىزىپ, 1:0 ەسەبىمەن جەڭىسكە جەتتى. ۇلتتىق قۇرامانىڭ بيىلعى ءبىرىنشى رەسمي ويىنى بولعان بۇل ماتچ تۇركيانىڭ انتاليا قالاسىندا ءوتتى. ويىندى ءبىزدىڭ جىگىتتەر وتە شيراق باستادى. بىردەن دوپقا يەلىك ەتىپ, العا ۇمتىلعان قازاق­ستاندىقتار بار بولعانى 8-مينۋتتا ەسەپ اشىپ ۇلگەردى. اتاپ ايتقاندا, سەرىك­جان مۇجىقوۆ پەن باۋىرجان يسلام­حاننىڭ ۇيىم­داستىرعان شابۋىلىنا ماقسات بايجانوۆ ناتيجەلى نۇكتە قويىپ, گولدىڭ اۆتورى اتاندى. گولدان قاناتتانعان جەرلەس­تەرىمىز بۇدان كەيىن دە بىرنەشە شابۋىل ۇيىمداستىردى. الايدا, ولار شەشۋشى ساتتەردە ءمۇلت كەتىپ, ەسەپتى ەسەلەۋ مۇمكىندىگىن پايدالانا المادى. ازەربايجان ويىنشىلارىنىڭ تارازى باسىن تەڭەستىرۋ ءۇشىن جاسا­عان ارەكەتتەرى دە ەشقانداي ناتيجە اكەلمەدى. ەكىنشى تايمدى قوس كوماندا دا وتە بەلسەندى باستادى. ءتىپتى, 56-مينۋتتا سەرگەي حيجنيچەنكودا ەسەپتى ەسەلەيتىن تاماشا مۇمكىندىك تە بولدى. بىراق ونىڭ قاقپاعا باعىت­ت­اعان دوبى نىسانادان قيىس كەتتى. ارتىنشا ماقسات باي­جا­نوۆ دۋبل اتانۋ مۇمكىندىگىن ءمۇلت جىبەردى. ونىڭ جولىنا ازەربايجان قاقپاشىسى كيامران اگاەۆ توسقاۋىل بولدى. ويىن سوڭىنا دەيىن قار­سىلاستار الما-كەزەك شابۋىل­داعا­نىمەن, گول سوعىلمادى. جات­تىقتىرۋشىلاردىڭ تىڭنان قوسقان ويىنشىلارى دا ويىن ورنەگىن ايتارلىقتاي وزگەرتە المادى. ناتيجەسىندە قازاقستان قۇراماسى جەڭىسكە جەتىپ, فۋتبولشىلارىمىز وتاندىق جانكۇيەرلەردى ءبىر قۋانتتى. ايتا كەتەيىك, وتكەن جىلدىڭ جەلتوقسان ايىندا يۋري كراسنو­جان قىزمەتىنەن كەتكەلى بەرى فۋتبولدان ۇلتتىق قۇرامامىزدىڭ باس جاتتىقتىرۋشىسى ءالى تا­عايىن­دالعان جوق. سول سەبەپتى, اتال­عان ويىنعا باس كوماندامىزدى ۇلت­تىق قۇرامانىڭ اعا جاتتىق­تىرۋشىسى نۇركەن مازباەۆ پەن «اقجايىق» كومانداسىنىڭ باس جاتتىقتىرۋشىسى تالعات بايسۋفينوۆ باستاپ شىقتى. سون­­داي-اق, جاتتىقتىرۋشىلار قۇرامىندا اندرەي فەراپونتوۆ پەن يۋري نوۆيكوۆ بار. بۇل مامانداردىڭ جەتەكشىلىگىمەن قا­زاقستان تاعى ءبىر جولداستىق كەز­دەسۋ وتكىزەدى. اتاپ ايتقاندا, بۇگىن تبيليسيدە فۋتبولشىلارىمىز گرۋزيا قۇراماسىمەن سىنعا تۇسەدى. ەلامان قوڭىر, «ەگەمەن قازاقستان».