الەۋمەتتىك جەلىدە ۇشقىشتاردى قولداپ جاتىر

استانا. 28 ناۋرىز.  الەۋمەتتىك جەلىدە اپاتتى جاعدايداعى ۇشاقتى جەرگە قوندىرىپ, تالاي ادامنىڭ ءومىرىن ساقتاپ قالعان Bek Air اۋە كومپانياسىنىڭ ۇشقىشتارىنا «حالىق قاھارمانى» اتاعىن بەرۋ تۋرالى ۇسىنىستار ايتىلىپ جاتىر. بۇل تۋرالى egemen.kz ءتىلشىسى حابارلادى. بۇل وقيعا كەشە تاڭەرتەڭ بولدى. BekAir اۋە كومپانياسىنىڭ «فوككەر-100» تيپتى ۇشاعى قىزىلوردا قالاسىنان باعىت الىپ, استانا اۋەجايىنا جاقىنداعاندا شاسسيدىڭ الدىڭعى تىرەۋ تاعانىنسىز اپاتتىق جاعدايدا جەرگە قوندى. ۇشاق استاناعا ساعات 9.45-تە قونۋعا ءتيىس بولاتىن. الايدا ءورتتىڭ شىعۋ قاۋپىن ازايتۋ قاجەت بولعان سوڭ, ۇشاق اۋەدە تاعى 50 مينۋتتەي ۇشىپ ءجۇردى. ءسويتىپ, ول ساعات 10.36-دا قوندى. ونىڭ بورتىندا 116 جولاۋشى مەن 5 ەكيپاج مۇشەسى بولدى. ۇشاق ەكيپاجىنىڭ ارقاسىندا 116 جولاۋشى امان قالدى. ەشكىم زارداپ شەككەن جوق. سونىمەن بىرگە استانا اۋەجايى مەن قالانىڭ شۇعىل قىزمەتتەرىنىڭ ۇيلەسىمدى جۇمىسىن دا اتاپ ءوتۋ كەرەك. ۇشاق جەرگە قونعاندا قوسىمشا 7 ءورت تەحنيكاسى مەن 4 جەدەل جاردەم ماشينەسى ازىرلەندى. «قازىرگى كەزدە ينۆەستيتسيالار جانە دامۋ مينيسترلىگىنىڭ ارنايى كوميسسياسى قۇرىلدى. زەرتتەۋ ناتيجەسى كەيىنىرەك حابارلاناتىن بولادى.  Bek Air اۋە كومپانياسى ۇشاعىنىڭ استانا اۋەجايىندا اپاتتى جاعدايدا قونۋىنىڭ سەبەبى انىقتالادى», دەدى مينيستر اسەت يسەكەشەۆ. داستان كەنجالين. دەرەك, فوتو: egemen.kz