قازاقستان رەسپۋبليكاسى ۇكىمەتىنىڭ قاۋلىسى  №136

2016 جىلعى 11 ناۋرىز, استانا, ۇكىمەت ءۇيى ازاماتتىق اۆياتسيا سالاسىنداعى ۇشۋ قاۋىپسىزدىگى جونىندەگى  باعدارلامانى بەكىتۋ تۋرالى «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» 2010 جىلعى 15 شىلدەدەگى قازاقستان رەسپۋبليكاسىنىڭ زاڭى 13-بابىنىڭ 3-1) تارماقشاسىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى: 1. قوسا بەرىلىپ وتىرعان ازاماتتىق اۆياتسيا سالاسىنداعى ۇشۋ قاۋىپسىزدىگى جونىندەگى باعدارلاما بەكىتىلسىن. 2. وسى قاۋلى العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى. قازاقستان رەسپۋبليكاسىنىڭ پرەمەر-ءمينيسترى ك.ءماسىموۆ. قازاقستان رەسپۋبليكاسى ۇكىمەتىنىڭ 2016 جىلعى 11 ناۋرىزداعى №136 قاۋلىسىمەن بەكىتىلگەن ازاماتتىق اۆياتسيا سالاسىنداعى ۇشۋ قاۋىپسىزدىگى جونىندەگى باعدارلاما 1. جالپى ەرەجەلەر 1. وسى ازاماتتىق اۆياتسيا سالاسىنداعى ۇشۋ قاۋىپسىزدىگى جونىندەگى باعدارلاما (بۇدان ءارى – باعدارلاما) «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» 2010 جىلعى 15 شىلدەدەگى قازاقستان رەسپۋبليكاسى زاڭىنىڭ (بۇدان ءارى – زاڭ), حالىقارالىق ازاماتتىق اۆياتسيا تۋرالى كونۆەنتسياعا «ۇشۋ قاۋىپسىزدىگىن باسقارۋ» 19-قوسىمشاسىنىڭ (بۇدان ءارى – 19-قوسىمشا) جانە يكاو «ۇشۋ قاۋىپسىزدىگىن باسقارۋ جونىندەگى نۇسقاۋلىق» Doc 9859 (بۇدان ءارى – ۇقبن) تالاپتارىنا سايكەس ازىرلەندى جانە: 1) ازاماتتىق اۆياتسيا سالاسىنداعى ازاماتتىق اۆياتسياداعى ۇشۋ قاۋىپسىزدىگىن باسقارۋ جۇيەسىن (بۇدان ءارى – ۇقبج) بىلدىرەدى; 2) حالىقارالىق ستاندارتتاردى جانە ۇقبج-عا بايلانىستى ۇسىنىلاتىن پراكتيكانى ءتيىمدى ەنگىزۋدى بەلگىلەيدى; 3) ۇشۋ قاۋىپسىزدىگى تاۋەكەلدەرىن باسقارۋدىڭ جوعارى دەڭگەيىنە قول جەتكىزۋگە جانە اۆياتسيالىق وقيعالار مەن ينتسيدەنتتەردىڭ سانىن ۇدايى ازايتۋعا باعىتتالعان. 2. وسى باعدارلامانىڭ نەگىزگى ماقساتى قازاقستان رەسپۋبليكاسىنىڭ ازاماتتىق اۆياتسيا سالاسىنداعى ۇشۋ قاۋىپسىزدىگىنىڭ شەكتى دەڭگەيىنە قول جەتكىزۋ جانە قاۋىپتىلىك كوزدەرىن انىقتاۋ مەن تاۋەكەل فاكتورلارىن باقىلاۋدىڭ ۇزدىكسىز پروتسەسى ارقىلى وسىنداي نە بۇدان دا جوعارى دەڭگەيدە ساقتاۋ بولىپ تابىلادى. 3. وسى باعدارلامادا مىناداي نەگىزگى ۇعىمدار پايدالانىلادى: 1) اۆياتسيالىق ينتسيدەنت – اۋە كەمەسىنىڭ تۇتاستىعىنا جانە (نەمەسە) ونىڭ بورتىنداعى ادامداردىڭ ومىرىنە قاتەر تۋعىزۋى مۇمكىن نەمەسە قاتەر تۋعىزعان, بىراق اۆياتسيالىق وقيعامەن اياقتالماعان, اۋە كەمەسىن ۇشۋدا پايدالانۋمەن بايلانىستى جاعداي; 2) اۆياتسيالىق وقيعا – اۋە كەمەسىنىڭ بورتىنداعى ادامداردىڭ قازا تابۋىنا (دەنە جاراقاتىنىڭ ولىمگە اكەلۋىنە) جانە (نەمەسە) وسى اۋە كەمەسىنىڭ جويىلۋىنا اكەلىپ سوقتىرعان اۋە كەمەسىن ۇشۋدا پايدالانۋمەن بايلانىستى اۆياتسيالىق جاعداي; 3) قىزمەت كورسەتۋدى جەتكىزۋشىلەر – ازاماتتىق اۆياتسيا سالاسىنداعى ۋاكىلەتتى ورگان سەرتيفيكاتتاعان ازاماتتىق اۆياتسيا ۇيىمدارى (ازاماتتىق اۋە كەمەلەرىن پايدالانۋمەن اينالىساتىن نەمەسە وسى سالادا ءوز قىزمەتتەرىن ۇسىناتىن جەكە نەمەسە زاڭدى تۇلعا); 4) پايدالانۋشى پەرسونال – اۆياتسيالىق قىزمەتتى قامتاماسىز ەتۋگە بايلانىستى جانە ۇشۋ قاۋىپسىزدىگى تۋرالى اقپاراتتى بەرۋگە مۇمكىندىگى بار ازاماتتىق اۆياتسيا ۇيىمىنىڭ پەرسونالى; 5) ۇشۋ قاۋiپسiزدiگi – اۋە كەمەلەرىن پايدالانۋعا قاتىستى نەمەسە وسىنداي پايدالانۋدى تىكەلەي قامتاماسىز ەتەتىن اۆياتسيالىق قىزمەتكە بايلانىستى تاۋەكەلدەر قولدانۋعا بولاتىن دەڭگەيگە دەيىن تومەندەتىلگەن جانە باقىلاناتىن كۇي; 6) ۇشۋ قاۋىپسىزدىگىن باسقارۋ جۇيەسى – قاجەتتى ۇيىمداستىرۋشىلىق قۇرىلىمدى, جاۋاپكەرشىلىك يەرارحياسىن, باسقارۋشىلىق قاعيداتتارى مەن راسىمدەرىن قوسا العاندا, ۇشۋ قاۋىپسىزدىگىن باسقارۋدىڭ جۇيەلى ءتاسىلى; 7) ۇشۋ قاۋىپسىزدىگى جونىندەگى باعدارلاما – ۇشۋ قاۋىپسىزدىگىنىڭ دەڭگەيىن ارتتىرۋعا باعىتتالعان قاعيدالار مەن ءىس – شارالار كەشەنى; 8) ۇشۋ قاۋىپسىزدىگىن قامتاماسىز ەتۋ تيىمدىلىگى – مەملەكەت نەمەسە قىزمەت كورسەتۋدى جەتكىزۋشى قول جەتكىزگەن, ولار بەلگىلەگەن ۇشۋ قاۋىپسىزدىگىن قامتاماسىز ەتۋ تيىمدىلىگىنىڭ نىسانالى دەڭگەيىمەن جانە ۇشۋ قاۋىپسىزدىگىن قامتاماسىز ەتۋ تيىمدىلىگىنىڭ كورسەتكىشتەرىمەن ايقىندالاتىن ۇشۋ قاۋىپسىزدىگىنىڭ دەڭگەيى; 9) ۇشۋ قاۋىپسىزدىگىن قامتاماسىز ەتۋ تيىمدىلىگىنىڭ كورسەتكىشتەرى – ۇشۋ قاۋىپسىزدىگىن قامتاماسىز ەتۋدىڭ تيىمدىلىگىن مونيتورينگتەۋ جانە باعالاۋ ءۇشىن پايدالانىلاتىن ناقتى دەرەكتەرگە نەگىزدەلگەن ۇشۋ قاۋىپسىزدىگىنىڭ پارامەترلەرى; 10) ۇشۋ قاۋىپسىزدىگىن قامتاماسىز ەتۋ تيىمدىلىگىنىڭ نىسانالى دەڭگەيى – بەرىلگەن كەزەڭدەگى ۇشۋ قاۋىپسىزدىگىن قاماتاسىز ەتۋ تيىمدىلىگى كورسەتكىشتەرى ءۇشىن جوسپارلاناتىن نەمەسە بولجاناتىن نىسانالى ۇستانىم; 11) ۇشۋ قاۋىپسىزدىگى ءۇشىن تاۋەكەل – قاۋىپتىلىك سالدارىنىڭ نەمەسە ناتيجەلەرىنىڭ بولجاناتىن ىقتيمالدىلىعى جانە كۇردەلىلىگى. 2. مەملەكەتتىك ساياسات جانە ۇشۋ قاۋىپسىزدىگىن قامتاماسىز ەتۋ ماقساتتارى مەملەكەتتىڭ ۇشۋ قاۋىپسىزدىگى سالاسىنداعى زاڭنامالىق نەگىزدەمەلەرى 4. قازاقستان رەسپۋبليكاسىنىڭ اۋە كەڭىستىگىن پايدالانۋ جانە قازاقستان رەسپۋبليكاسى ازاماتتىق اۆياتسياسىنىڭ قىزمەتى قازاقستان رەسپۋبليكاسىنىڭ كونستيتۋتسياسىمەن, زاڭمەن جانە قازاقستان رەسپۋبليكاسىنىڭ ازاماتتىق اۆياتسيا سالاسىنداعى وزگە دە نورماتيۆتىك قۇقىقتىق اكتىلەرمەن, سونداي-اق قازاقستان رەسپۋبليكاسىنىڭ اۋماعىندا قولدانىلاتىن حالىقارالىق ازاماتتىق اۆياتسيا ۇيىمىنىڭ (بۇدان ءارى – يكاو) ستاندارتتارىمەن جانە ۇسىنىلاتىن پراكتيكاسىمەن رەگلامەنتتەلەدى. 5. ازاماتتىق اۆياتسيا سالاسىنداعى ۋاكىلەتتى ورگان (بۇدان ءارى – ۋاكىلەتتى ورگان) ءوز قۇزىرەتى شەگىندە ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەردى ازىرلەيدى, بەكىتەدى, جاريالايدى جانە جەتىلدىرەدى. ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەردى جەتىلدىرۋ قازاقستان رەسپۋبليكاسىنىڭ ازاماتتىق اۆياتسياسى سالاسىندا ۇشۋ قاۋىپسىزدىگىنىڭ شەكتى دەڭگەيىنە قول جەتكىزۋ ءۇشىن مەملەكەتتىك دەڭگەيدە قابىلداناتىن ءىس-شارالاردىڭ قۇرامداس بولىگى بولىپ تابىلادى. 6. قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى قازاقستان رەسپۋبليكاسىنىڭ زاڭناماسى قازاقستان رەسپۋبليكاسىنىڭ كونستيتۋتسياسىنا نەگىزدەلەدى جانە يكاو-نىڭ ستاندارتتارى مەن ۇسىنىلاتىن پراكتيكاسىنىڭ تالاپتارىنا ساي بولۋى ءتيىس. 7. ۋاكىلەتتى ورگان تۇراقتى نەگىزدە قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى سالاسىنداعى قازاقستان رەسپۋبليكاسى زاڭناماسىنىڭ يكاو-نىڭ ستاندارتتارى مەن ۇسىنىلاتىن پراكتيكاسىنا سايكەستىگىنىڭ مونيتورينگىن جۇزەگە اسىرادى جانە يكاو-نىڭ ستاندارتتارى مەن ۇسىنىلاتىن پراكتيكاسىنداعى بار وزگەشەلىكتەر تۋرالى يكاو-عا ۋاقتىلى حابارلاۋدى جانە ولاردى اەروناۆيگاتسيالىق اقپارات قۇجاتتارىندا جاريالاۋدى قامتاماسىز ەتەدى. 8. ۋاكىلەتتى ورگان ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەردىڭ قازاقستان رەسپۋبليكاسىنىڭ زاڭناماسىنا, يكاو-نىڭ ستاندارتتارى مەن ۇسىنىلاتىن پراكتيكاسىنا سايكەس بولۋىن قامتاماسىز ەتۋ ماقساتىندا ولارعا ۋاقتىلى وزگەرىستەر مەن تولىقتىرۋلار ەنگىزەدى. 9. قازاقستان رەسپۋبليكاسىنىڭ اۋماعىندا يكاو-نىڭ ستاندارتتارى مەن ۇسىنىلاتىن پراكتيكاسىن قولدانۋ ازاماتتىق اۆياتسيا سالاسىندا ءتيىستى نورماتيۆتىك قۇقىقتىق اكتىلەردى قابىلداۋ, يكاو-نىڭ ناقتى ستاندارتتارى مەن ۇسىنىلاتىن پراكتيكاسىن قولدانۋ جونىندەگى سىلتەمەلەردى كورسەتە وتىرىپ, ولارعا قاجەتتى وزگەرىستەر مەن تولىقتىرۋلار ەنگىزۋ جولىمەن جۇزەگە اسىرىلادى. 10. ۇشۋ قاۋىپسىزدىگىن قامتاماسىز ەتۋگە جەدەل باقىلاۋدى جۇزەگە اسىرۋ ماقساتىندا ۋاكىلەتتى ورگان قىزمەت كورسەتۋدى جەتكىزۋشىلەردىڭ ورىنداۋى ءۇشىن مىندەتتى بۇيرىقتاردى, نۇسقاۋلار مەن نۇسقامالاردى شىعارادى. 11. قىزمەت كورسەتۋدى جەتكىزۋشىلەر تالاپتار دەڭگەيى قازاقستان رەسپۋبليكاسىنىڭ ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەرىنىڭ تالاپتارىنان تومەن بولماۋى ءتيىس ىشكى قۇجاتتاردى ازىرلەيدى جانە قولدانىسقا ەنگىزەدى. 12. قازاقستان رەسپۋبليكاسىنىڭ ازاماتتىق اۆياتسيا سالاسىنداعى نورماتيۆتىك قۇقىقتىق اكتىلەرىنىڭ تالاپتارىن ورىنداۋ ۇشۋ قاۋىپسىزدىگىنىڭ دەڭگەيىن قامتاماسىز ەتۋدىڭ نەگىزگى شارتى بولىپ تابىلادى. ۋاكىلەتتى ورگانمەن كەلىسۋ بويىنشا سەرتيفيكاتتىق تالاپتار مەن اۋەايلاقتاردىڭ (تىكۇشاق ايلاقتارىنىڭ) پايدالانۋعا جارامدىلىعى نورمالارىنان ۋاقىتشا اۋىتقۋعا, ەگەر مۇنداي اۋىتقۋلار بەلگىلەنگەن ۇشۋ قاۋىپسىزدىگى دەڭگەيىنە بالامالى دەڭگەيدى قامتاماسىز ەتەتىن قوسىمشا شارالاردى ەنگىزۋمەن وتەلەتىن بولسا, جول بەرىلەدى. 13. ۋاكىلەتتى ورگان قازاقستان رەسپۋبليكاسىنىڭ ازاماتتىق اۆياتسيا سالاسىنداعى نورماتيۆتىك قۇقىق­تىق اكتىلەر تىزبەسىن جاسايدى جانە ونى ۋاكىلەتتى ورگاننىڭ رەسمي ينتەرنەت-رەسۋرسىندا جاريالايدى. مەملەكەتتىڭ قاۋىپسىزدىگى سالاسىنداعى ۇشۋ مىندەتتەمەلەرى 14. ۋاكىلەتتى ورگاننىڭ ۇشۋ قاۋىپسىزدىگىن قامتاماسىز ەتۋدى ۇيىمداستىرۋ ساياساتى ۇشۋ قاۋىپسىزدىگىن قامتاماسىز ەتۋدىڭ قاجەتتى ماقساتتارىنا قول جەتكىزۋ ءۇشىن پايدالانىلاتىن ۇقبج-نىڭ قاعيداتتارىن, راسىمدەرى مەن ادىستەرىن مازمۇنداۋدى بىلدىرەدى جانە ءوز قىزمەتىنىڭ بارلىق اسپەكتىلەرىندە ۇشۋ قاۋىپسىزدىگىنىڭ قاعيداتتارىن ەنگىزۋ جانە تۇراقتى جەتىلدىرۋ مىندەتتەرىن بەلگىلەيدى. ۋاكىلەتتى ورگان ازاماتتىق اۆياتسيا سالاسى اۋقىمىندا بارلىق ۇيىمداردا ىسكە اسىرىلۋى ءتيىس ۇشۋ قاۋىپسىزدىگىن قامتاماسىز ەتۋدىڭ ولشەمدى جانە قول جەتكىزىلەتىن ماقساتتارىن ازىرلەيدى. 15. ۋاكىلەتتى ورگان حالىقارالىق جانە ۇلتتىق تالاپتارعا سايكەس اۋە كەڭىستىگىن پايدالانۋ سالاسىنداعى, ازاماتتىق جانە ەكسپەريمەنتتىك اۆياتسيا قىزمەتىندەگى مەملەكەتتىك ساياساتتىڭ نەگىزگى باعىتتارىن جۇزەگە اسىرادى, ول ۇشۋ قاۋىپسىزدىگىن باسقارۋعا قاتىستى ءتورت نەگىزگى بولىمنەن تۇرادى: 1) ۇشۋ قاۋىپسىزدىگىن قامتاماسىز ەتۋ سالاسىنداعى ساياسات جانە ماقساتتار; بارلىق باسقارۋ جۇيەلەرىندە قويىلعان ماقساتتارعا قول جەتكىزۋ ءۇشىن قاعيدالار مەن ۇيىمدىق قۇرىلىمدار بولۋى ءتيىس. وسى ەلەمەنتتەردىڭ بولۋىنا قويىلاتىن تالاپتار ۇقبج فۋنكتسيونالدىق ەلەمەنتتەرىنە نەگىز بولادى; ۇشۋ قاۋىپسىزدىگىن قامتاماسىز ەتۋ سالاسىنداعى ساياسات جانە ماقساتتار ۇقبج-عا ارنالعان كوورديناتالار جۇيەسىن قۇرادى, ۇقبن-گە سايكەس مىناداي ەلەمەنتتەردەن تۇرادى: باسشىلىقتىڭ مىندەتتەمەلەرى جانە جاۋاپكەرشىلىگى; ۇشۋ قاۋىپسىزدىگى ءۇشىن جاۋاپكەرشىلىك; ۇشۋ قاۋىپسىزدىگى ءۇشىن جاۋاپتى قىزمەتكەرلەردى تاعايىنداۋ; اۆاريالىق وقيعا جاعدايىندا ءىس-شارالاردى جوسپارلاۋدى ۇيلەستىرۋ; ۇقبج قۇجاتتاماسى; 2) ۇشۋ قاۋىپسىزدىگى ءۇشىن تاۋەكەل فاكتورىن باسقارۋ. ۇقبج-دا بولاتىن ۇشۋ قاۋىپسىزدىگىنە بايلانىستى تاۋەكەلدەردى باسقارۋ ەلەمەنتى جۇيەلى ۇشۋ قاۋىپسىزدىگىن قامتاماسىز ەتۋ پروتسەسىنىڭ ۇلگىسىنە نەگىزدەلگەن; ۇشۋ قاۋىپسىزدىگى ءۇشىن تاۋەكەل فاكتورلارىن باسقارۋدىڭ ماقساتى قاۋىپتى فاكتورلاردى انىقتاۋ, ءتيىستى تاۋەكەلدەر فاكتورلارىن باعالاۋ جانە ولاردى جويۋ نەمەسە ۇيىم قىزمەتتەردى كورسەتۋ كەزىندە ىقپال ەتۋ دارەجەسىن ازايتۋ بويىنشا ءتيىستى شارالار ازىرلەۋ بولىپ تابىلادى; 3) ۇشۋ قاۋىپسىزدىگىن قامتاماسىز ەتۋ; قىزمەت كورسەتۋدى جەتكىزۋشى اۋىتقۋلاردى انىقتاعان جاعدايدا ۋاقتىلى شارالار قابىلداۋ ءۇشىن ۇشۋ قاۋىپسىزدىگىن قامتاماسىز ەتۋ تيىمدىلىگى كورسەتكىشتەرىنىڭ تۇراقتى مونيتورينگىن قامتاماسىز ەتەدى; 4) ۇشۋ قاۋىپسىزدىگىن قامتاماسىز ەتۋ پروتسەسىنە جاردەمدەسۋ; قىزمەت كورسەتۋدى جەتكىزۋشى ۇشۋ قاۋىپسىزدىگىن نەگىزگى قۇندىلىق رەتىندە ناسيحاتتايدى, ۇشۋ قاۋىپ­سىزدىگى مادەنيەتىن ءىس جۇزىندە ەنگىزۋگە جاردەمدەسەدى. ۇشۋ قاۋىپسىزدىگىن قامتاماسىز ەتۋ پروتسەسىنە ءجار­دەمدەسۋ قاجەتتى ءپاندى ءبىلۋدى جانە قىزمەتكەرلەردى دايارلاۋدى قامتاماسىز ەتەدى. وسى پروتسەستى ىسكە اسىرۋ پەرسونالدى دايارلاۋ, وقىتۋ جانە ۇشۋ قاۋىپسىزدىگى تۋرالى اقپارات الماسۋ جولىمەن جۇزەگە اسىرىلادى. اۆياتسيالىق وقيعانى نەمەسە ينتسيدەنتتەردى تەكسەرۋ 16. قازاقستان رەسپۋبليكاسىنىڭ اۋە كەمەسىمەن نەمەسە قازاقستان رەسپۋبليكاسىنىڭ اۋماعىندا شەت مەملەكەتىڭ اۋە كەمەسىمەن بولعان اۆياتسيالىق وقيعا نەمەسە ينتسيدەنت قازاقستان رەسپۋبليكاسى ۇكىمەتىنىڭ 2011 جىلعى 18 شىلدەدەگى №828 قاۋلىسىمەن بەكىتىلگەن اۆياتسيالىق وقيعالار مەن ينتسيدەنتتەردى تەكسەرۋ قاعيداسىنا سايكەس مىندەتتى تۇردە تەكسەرىلۋگە ءتيىس. 17. اۆياتسيالىق وقيعانى نەمەسە ينتسيدەنتتى تەكسەرۋدىڭ ماقساتى وقيعانىڭ سەبەپتەرىن جانە (نەمەسە) ىلەسپە فاكتورلاردى انىقتاۋ, بولاشاقتا اۆياتسيالىق وقيعالاردى بولعىزباۋ جانە قاۋىپسىزدىك تيىمدىلىگىن قامتاماسىز ەتۋ جونىندە ۇسىنىمدار ازىرلەۋ بولىپ تابىلادى. 18. اۆياتسيالىق وقيعانى نەمەسە ينتسيدەنتتى تەكسەرۋدى مۇددەلى تاراپتاردىڭ ۋاكىلەتتى وكىلدەرىنىڭ مىندەتتى قاتىسۋىمەن كوميسسيا جۇزەگە اسىرادى. ازاماتتىق جانە ەكسپەريمەنتالدىق اۆياتسيادا كوميسسيانى ۋاكىلەتتى ورگان قۇرادى. 19. قىزمەت كورسەتۋدى جەتكىزۋشىنىڭ ۇقبج-دە ۇيىمنىڭ ينتسيدەنتتەردى تەكسەرۋ تەتىگى كوزدەلەدى. باعدارلامانى ىسكە اسىرۋ جولدارى 20. باعدارلاما: 1) تۇراقتى قاداعالاۋ جانە ۋاكىلەتتى ورگاننىڭ مەملەكەتتىك اۆياتسيالىق ينسپەكتورلارىنىڭ قاداعالاۋ ماسەلەلەرى جونىندەگى لاۋازىمدى ادامدارمەن ءوزارا ءىس-قيمىلى نەگىزىندە پايدالانۋداعى سايكەسسىزدىكتەردى انىقتاۋ; 2) قىزمەت كورسەتۋدى جەتكىزۋشى قىزمەتىنىڭ ۇشۋ قاۋىپسىزدىگىنە الەۋەتتى قاتىسى بار بارلىق سالالارىن قامتۋ; 3) تۇراقتى قاداعالاۋ ناتيجەسىندە پروبلەمالار انىقتالعان بارلىق سالالارعا نازاردى شوعىرلاندىرۋ; 4) قىزمەت كورسەتۋدى جەتكىزۋشىنىڭ قارجىلىق-ەكونوميكالىق جاعدايىن باعالاۋ; 5) قىزمەت كورسەتۋدى جەتكىزۋشىنىڭ تاۋەكەل دارەجەسىن باعالاۋدى ەسەپكە الۋ; 6) جۇرگىزىلگەن تەكسەرۋلەر ناتيجەلەرىن ەسەپكە الۋ; 7) الدىڭعى تەكسەرۋلەر بارىسىندا انىقتالعان سايكەسسىزدىكتەردى جويۋعا باعىتتالعان تۇزەتۋ ءىس-قيمىلدارىنىڭ ورىندالۋىن باقىلاۋ ارقىلى جۇزەگە اسىرىلادى. 21. قىزمەت كورسەتۋدى جەتكىزۋشىنىڭ قىزمەتىن تۇراقتى قاداعالاۋ سەرتيفيكاتتاۋ جۇيەسىنىڭ اجىراماس قۇرامداس بولىگى جانە حالىققا قاۋىپسىز ءارى سەنىمدى كوممەرتسيالىق اۆياكولىك تاسىمالىن ۇسىنۋ ماقساتىندا تالاپ ەتىلەتىن پايدالانۋ نورمالارىنىڭ ساقتالۋىنا ۋاكىلەتتى ورگان جاۋاپكەرشىلىگىنىڭ ماڭىزدى ەلەمەنتى بولىپ تابىلادى. 22. تالاپ ەتىلەتىن قاداعالاۋ شارالارى جانە ولارعا بايلانىستى ينسپەكتسيالىق تەكسەرۋلەردى ۋاكىلەتتى ورگاننىڭ مەملەكەتتىك اۆياتسيالىق ينسپەكتورلارى جۇرگىزەدى. 3. مەملەكەتتىك دەڭگەيدە ۇشۋ قاۋىپسىزدىگىمەن بايلانىستى قاۋىپتەردى باسقارۋ ۇشۋ قاۋىپسىزدىگى ءۇشىن قاۋىپ فاكتورلارىن باسقارۋ 23. ۋاكىلەتتى ورگان وسى باعدارلامانىڭ نەگىزىندە ۇشۋ قاۋىپسىزدىگىن قامتاماسىز ەتۋ تيىمدىلىگىنىڭ نىسانالى كورسەتكىشتەرىنە قول جەتكىزۋ ماقساتىندا اۆياتسيالىق قىزمەتتە كەزدەسەتىن ۇشۋ قاۋىپسىزدىگىنىڭ قاۋىپ فاكتورلارىن باقىلاۋ ءۇشىن قىزمەت كورسەتۋدى جەتكىزۋشىلەردى رەتتەۋ, قاداعالاۋ جانە باقىلاۋ بويىنشا جۇمىستار جۇرگىزەدى. ۇشۋ قاۋىپسىزدىگى ءۇشىن تاۋەكەل فاكتورلارىن باسقارۋ قاۋىپتى فاكتورلاردى انىقتاۋدى, ۇشۋ قاۋىپسىزدىگى ءۇشىن تاۋەكەلدى باعالاۋدى جانە ولاردى ازايتۋ بويىنشا ءتيىستى شارالاردى جۇزەگە اسىرۋدى قامتيدى. 24. ۇشۋ قاۋىپسىزدىگى ءۇشىن قاۋىپ فاكتورلارىن باسقارۋ كومپونەنتىنىڭ شەڭبەرىندە ءونىمدى جانە كورسەتىلەتىن قىزمەتتى ۇسىنۋ پروتسەسىندە بار قاۋىپتى فاكتورلار جۇيەلى تۇردە انىقتالادى. قاۋىپتىلىك فاكتورلارى ءۇش نەگىزگى كومپونەنت بويىنشا قارالادى: 1) نورماتيۆتىك قۇقىقتىق اكتىلەردى ساقتاۋ (ورىنداۋ); 2) پەرسونالدى دايارلاۋ; 3) ينفراقۇرىلىم جانە ءونىم مەن كورسەتىلەتىن قىزمەتتەردى ۇسىنۋ ءۇشىن ونىڭ سايكەستىگى. 25. قاۋىپتى فاكتورلاردى انىقتاۋ. قىزمەت كورسەتۋدى جەتكىزۋشىلەر اۆياتسيالىق ءونىم مەن كورسەتىلەتىن قىزمەتتەرگە بايلانىستى قاۋىپتى فاكتورلاردىڭ انىقتالۋىنا كەپىلدىك بەرەتىن رەسمي ءتارتىپتى ازىرلەيدى جانە قولدانادى. قاۋىپتى فاكتورلاردى انىقتاۋ ۇشۋ قاۋىپسىزدىگى تۋرالى دەرەكتەردى جيناۋدىڭ دەن قوياتىن, الدىن الا بەلسەندى جانە بولجامدى ادىستەرىن ۇشتاستىرۋعا نەگىزدەلگەن. 26. قاۋىپتى فاكتورلاردى انىقتاۋ ۇشۋ قاۋىپسىزدىگى ءۇشىن تاۋەكەل فاكتورلارىن باسقارۋ پروتسەسىندەگى العاشقى قادام بولىپ تابىلادى. ودان ءارى ۇشۋ قاۋىپسىزدىگى ءۇشىن ءتيىستى تاۋەكەل فاكتورلارى ولاردىڭ پايدالانىلاتىن ورتاداعى قولايلىلىعى تۇرعىسىنان باعالانادى. ۇشۋ قاۋىپسىزدىگى ءۇشىن تاۋەكەل فاكتورلارى قولايسىز بولىپ باعالاناتىن بولسا, ولاردى جويۋ نەمەسە ولاردىڭ ۇشۋ قاۋىپسىزدىگىنە اسەر ەتۋ دارەجەسىن تومەندەتۋ بويىنشا شارالار قابىلدانۋى, سونداي-اق ولاردىڭ كەيىنگى مونيتورينگى ۇيىمداستىرىلۋى ءتيىس. قىزمەت كورسەتۋدى جەتكىزۋشىنىڭ ۇقبج-سىنا ۇشۋ قاۋىپسىزدىگىن قامتاماسىز ەتۋگە قاتىستى قويىلاتىن تالاپتار 27. ۇقبج قىزمەت كورسەتۋدى جەتكىزۋشىلەردىڭ وسى باعدارلامادا ايقىندالعان ءتيىستى نىسانالى دەڭگەيلىك كورسەتكىشتەرگە قول جەتكىزۋ ماقساتىندا ۇشۋ قاۋىپسىزدىگىن باسقارۋدىڭ ۇيىمداستىرۋشىلىق جانە رەتتەلگەن ءتاسىلىن جۇزەگە اسىرۋى ءۇشىن ارنالعان. 28. قىزمەت كورسەتۋدى جەتكىزۋشىلەر: 1) ۇشۋ قاۋىپسىزدىگىن قامتاماسىز ەتۋ كەزىندە تاۋەكەل فاكتورلارىن ايقىنداۋ جونىندەگى پروتسەستىك تاسىلدەردى قامتاماسىز ەتەتىن; 2) ۇشۋ قاۋىپسىزدىگىنە بايلانىستى كەمشىلىكتەردى جويۋ جونىندەگى جانە ۇشۋ قاۋىپسىزدىگىنىڭ شەكتى دەڭگەيىن قولداۋعا باعىتتالعان قاجەتتى ءىس-قيمىلداردى ىسكە اسىرۋدى قامتاماسىز ەتەتىن; 3) ۇشۋ قاۋىپسىزدىگى تيىمدىلىگىن جانە ونىڭ بەلگىلەنگەن دەڭگەيلىك كورسەتكىشتەرگە سايكەستىگىن تۇراقتى باقىلاۋدى كوزدەيتىن; 4) ۇشۋ قاۋىپسىزدىگى دەڭگەيىن جەتىلدىرۋدىڭ تۇراقتى پروتسەسىن ماقساتى رەتىندە كوزدەيتىن ۇقبج ەنگىزەدى. قىزمەت كورسەتۋدى جەتكىزۋشىنىڭ ۇشۋ قاۋىپسىزدىگىن قامتاماسىز ەتۋ تيىمدىلىگىنىڭ كورسەتكىشتەرىن كەلىسۋ 29. قىزمەت كورسەتۋدى جەتكىزۋشىلەر ازىرلەنگەن ۇقبج-نى ۋاكىلەتتى ورگانمەن كەلىسەدى. 30. قازاقستان رەسپۋبليكاسىنىڭ ازاماتتىق اۆياتسياسىندا ۇشۋ قاۋىپسىزدىگىنىڭ نىسانالى (ەڭ تومەن) دەڭگەيى بەلگىلەنەدى ول كۇنتىزبەلىك جىل ءۇشىن مىناداي كورسەتكىشتەردەن كورىنەدى; 1) اۋە كەمەلەرىن پايدالانۋشىلار ءۇشىن: ۇشۋ ۋاقىتىنىڭ 100 000 ساعاتىنا ەسەپتەگەندە: ادام ءولىمى بار 0,00155 اۆياتسيالىق وقيعادان اسپايدى, ادام ءولىمى جوق 0,5 اۆياتسيالىق وقيعادان اسپايدى, اۋە كەمەلەرىندەگى 50 اۆياتسيالىق ينتسيدەنتتەن اسپايدى; 2) اۋە كەمەلەرىنە تەحنيكالىق قىزمەت كورسەتەتىن ۇيىمدار ءۇشىن: اۋە كەمەلەرىندە ۇشۋ ۋاقىتىنىڭ 100 000 ساعاتىنا 50 اۆياتسيالىق ينتسيدەنتتەن اسپايدى; 3) اۋە ايلاقتارىن پايدالانۋشىلار ءۇشىن: اۋە كەمەلەرىنىڭ 1000 وپەراتسياسىنا قۇستارمەن سوقتىعىسۋ 1-دەن (بىردەن) اسپايدى; اۋە كەمەلەرىنىڭ 40000 وپەراتسياسىنا ۇشۋ-قونۋ جولاعىنا رۇقساتسىز شىعۋ جاعدايى 1-دەن (بىردەن) اسپايدى; 4) اۋە قوزعالىسىنا قىزمەت كورسەتەتىن ۇيىمدار ءۇشىن: كۇردەلىلىك سىنىبى ۇق ەڭ تومەن دەڭگەيى A 2,31ح10-8 ۇقۇ جۇيەسىنىڭ تىكەلەي ىقپالى بار او B 2,31ح10-5 ۇقۇ جۇيەسىنىڭ تىكەلەي ىقپالى بار كۇردەلى ينتسيدەنتتەر C 2,31ح10-4 ۇقۇ جۇيەسىنىڭ تىكەلەي ىقپالى بار ماڭىزدى ينتسيدەنتتەر D 2,31ح10-2 ۇقۇ جۇيەسىنىڭ تىكەلەي ىقپالى بار ەلەۋلى ينتسيدەنتتەر 4. مەملەكەتتىك دەڭگەيدە ازاماتتىق اۆياتسيا قاۋىپسىزدىگىن قامتاماسىز ەتۋ ۇشۋ قاۋىپسىزدىگىنىڭ جاي-كۇيىن باقىلاۋ 31. اۋە كەڭىستىگىن پايدالانۋ سالاسىنداعى مەملەكەتتىك باقىلاۋ مەن قاداعالاۋ قازاقستان رەسپۋبليكاسىنىڭ اۋە كەڭىستىگىن پايدالانۋ ءتارتىبىن بۇزۋشىلىقتىڭ الدىن الۋ جانە (نەمەسە) جويۋ, جانە (نەمەسە) جولىن كەسۋ ماقساتىندا جۇزەگە اسىرىلادى. 32. اۋە كەڭىستىگىن پايدالانۋ سالاسىنداعى مەملەكەتتىك باقىلاۋ مەن قاداعالاۋ قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن جۇزەگە اسىرىلادى. 33. ۇشۋ قاۋىپسىزدىگىنىڭ جاي-كۇيىن باقىلاۋدىڭ ءتيىمدى باعدارلاماسىن ەنگىزۋدىڭ جانە جۇزەگە اسىرۋدىڭ ۇزدىك ادىستەرىن تاڭداۋ كەزىندەگى ايقىنداۋشى فاكتورلار ۇيىم قۇرىلىمىنىڭ كولەمى مەن كۇردەلىلىگى بولىپ تابىلادى. 34. قىزمەت كورسەتۋدى جەتكىزۋشىلەر ۇشۋ قاۋىپسىزدىگىنە قاتىستى راسىمدەرگە قىزمەتتىڭ سايكەستىگى ماقساتىندا پروتسەستى باقىلاۋ ادىستەرىن بەلگىلەيدى جانە قولدايدى. ۇشۋ قاۋىپسىزدىگىن قامتاماسىز ەتۋدى قاداعالاۋ 35. قىزمەت كورسەتۋدى جەتكىزۋشىلەر قىزمەتىنىڭ ءتيىستى اسپەكتىلەرىنە تۇراقتى باقىلاۋ جۇرگىزۋدى كوزدەيتىن ۇشۋ قاۋىپسىزدىگىن قامتاماسىز ەتۋدى قاداعالاۋ جۇيەسى ونى باسقارۋ تيىمدىلىگىنىڭ نەگىزگى ەلەمەنتى بولىپ تابىلادى. 36. ۇشۋ قاۋىپسىزدىگىن قامتاماسىز ەتۋدى قاداعالاۋ قىزمەت كورسەتۋدى جەتكىزۋشىلەردىڭ مەملەكەت بەلگىلەگەن قاعيدالاردى, نورماتيۆتىك ەرەجەلەردى, ستاندارتتار مەن راسىمدەردى ساقتاۋىن كورسەتەدى. 37. ازاماتتىق, ەكسپەريمەنتالدىق اۆياتسيانىڭ قىزمەتىن مەملەكەتتىك باقىلاۋ مەن قاداعالاۋدى ۋاكىلەتتى ورگان مىناداي ءىس-شارالاردى ورىنداۋ ارقىلى جۇزەگە اسىرادى: 1) وسى تارماقتىڭ 2) تارماقشاسىندا كوزدەلگەن تەكسەرۋلەردى قوسپاعاندا, جۇرگىزىلۋ ءتارتىبى قازاقستان رەسپۋبليكاسىنىڭ كاسىپكەرلىك كودەكسىمەن ايقىندالاتىن ازاماتتىق اۆياتسيا ۇيىمدارىن تەكسەرۋ; 2) جۇرگىزىلۋ ءتارتىبى زاڭمەن ايقىندالاتىن اۋە كەمەلەرىنىڭ ۇشۋ قاۋىپسىزدىگى جانە اۆياتسيالىق قاۋىپسىزدىك تالاپتارىن جەكە جانە زاڭدى تۇلعالاردىڭ ساقتاۋىن تەكسەرۋ; 3) ۇشۋ قاۋىپسىزدىگى جانە اۆياتسيالىق قاۋىپسىزدىكتى قامتاماسىز ەتۋ جونىندەگى جەكە جانە زاڭدى تۇل­عا­لاردىڭ قىزمەتىن باقىلاۋ مەن تالداۋدى قامتيتىن باقىلاۋ مەن قاداعالاۋدىڭ وزگە نىساندارى. 38. ۋاكىلەتتى ورگان بارلىق فۋنكتسيونالدىق سالالاردا ۇشۋ قاۋىپسىزدىگىن قامتاماسىز ەتۋ كەزىندە ولاردىڭ ۇلتتىق قاعيدالاردى, راسىمدەر مەن پراكتيكانى ساقتاۋىن باقىلاۋ ماقساتىندا قىزمەت كورسەتۋدى جەتكىزۋشىلەردى قاداعالاۋ باعدارلاماسىن جانە ينسپەكتورلىق قۇرام ءۇشىن تەحنيكالىق نۇسقاۋلىقتاردى ازىرلەيدى. 39. ۇشۋ قاۋىپسىزدىگىن قامتاماسىز ەتۋدى قاداعالاۋدى ءتيىمدى جۇزەگە اسىرۋ ءۇشىن ۋاكىلەتتى ورگان ءبىلىمى مەن ارنايى (تەحنيكالىق) دايارلىعىنىڭ (بىلىكتىلىگىنىڭ) دەڭگەيى بويىنشا قىزمەت كورسەتۋدى جەتكىزۋشىنىڭ ينسپەكتسيالاناتىن پەرسونالىنان تومەن بولماۋى ءتيىس دايارلىقتان وتكەن پەرسونالمەن جاساقتالادى. 40. ۇشۋ قاۋىپسىزدىگىن قامتاماسىز ەتۋدى قاداعالاۋدى جۇزەگە اسىرۋ كەزىندە ۋاكىلەتتى ورگاننىڭ ينسپەكتورلىق قۇرامىنىڭ وكىلەتتىگى قازاقستان رەسپۋبليكاسىنىڭ زاڭنامالىق اكتىلەرىنىڭ جانە يكاو ستاندارتتارىنىڭ ەرەجەلەرىمەن جانە تالاپتارىمەن قامتاماسىز ەتىلەدى. 41. ۇشۋ قاۋىپسىزدىگىنە قاتەر توندىرەتىن بۇزۋشىلىقتار انىقتالعان كەزدە ۋاكىلەتتى ورگان پايدالانۋشى نەمەسە ازاماتتىق اۆياتسيا ۇيىمى انىقتالعان بۇزۋشىلىقتاردى جويعان كەزگە دەيىن سەرتيفيكاتتى (اۆياتسيالىق جۇمىستاردى ورىنداۋعا ارنالعان كۋالىكتى) قايتارىپ الۋ نەمەسە ونى تولىق نەمەسە ءىشىنارا شەكتەۋ نەمەسە قولدانىسىن توقتاتا تۇرۋ جونىندە شارالار قابىلدايدى. 42. قىزمەت كورسەتۋدى جەتكىزۋشىلەر ينسپەكتورلىق تەكسەرۋ كەزىندە ۋاكىلەتتى ورگاننىڭ ينسپەكتورلىق قۇرامىنىڭ قىزمەتكەرلەردىڭ جەكە ىستەرىنە, اۋە كەمەلەرىنە, قۇرالدار مەن قىزمەتتەرگە, سونداي-اق ءتيىستى ەسەپكە الۋ قۇجاتتامالارىنا قول جەتكىزۋى ءۇشىن قاجەتتى جاعدايلاردى قامتاماسىز ەتەدى جانە ولاردىڭ مىندەتتەرىن ورىنداۋىنا جاردەمدەسەدى. 43. ۇشۋ قاۋىپسىزدىگىن قامتاماسىز ەتۋدەگى ناقتى نەمەسە الەۋەتتى كەمشىلىكتەر تۋرالى اقپاراتتى جيناۋعا جاردەمدەسۋ ماقساتىندا ۋاكىلەتتى ورگان قازاقستان رەسپۋبليكاسىندا ازاماتتىق اۆياتسيانىڭ اۋە كەمەلەرىمەن بولعان اۆياتسيالىق وقيعالار مەن ينتسيدەنتتەر تۋرالى دەرەكتەردى (حابارلامالاردى) ۇسىنۋدىڭ مىندەتتى جۇيەسىن ازىرلەيدى. اۆياتسيالىق وقيعانى نەمەسە ينتسيدەنتتى, ول تۋرالى مالىمەتتى قاساقانا جاسىرعانى, سونداي-اق اقپاراتتى بۇرمالاعانى ءۇشىن كىنالى ادامدار قازاقستان رەسپۋبليكاسىنىڭ زاڭناماسىندا كوزدەلگەن جاۋاپتىلىققا تارتىلادى. 44. ۇشۋ قاۋىپسىزدىگىن قامتاماسىز ەتۋدەگى ناقتى نەمەسە الەۋەتتى كەمشىلىكتەر تۋرالى اقپاراتتى جيناۋعا جاردەمدەسۋ ماقساتىندا ۋاكىلەتتى ورگان ينتسيدەنتتەر تۋرالى دەرەكتەردى (حابارلامالاردى) ەرىكتى ۇسىنۋ جۇيەسىن قۇرادى, ولار ينتسيدەنتتەر تۋرالى دەرەكتەردى مىندەتتى ۇسىنۋ جۇيەسى شەڭبەرىندە تىركەلمەۋى مۇمكىن. ينتسيدەنتتەر تۋرالى دەرەكتەردى ەرىكتى حابارلاۋ جۇيەسى اۆياتسيالىق ينتسيدەنتتەر تۋرالى اقپاراتپەن عانا شەكتەلمەۋى ءتيىس, سونىمەن قاتار قاۋىپتى فاكتورلار, ياعني ينتسيدەنتكە اكەپ سوقتىرۋى مۇمكىن قاۋىپتى جاعدايلار تۋرالى مالىمەتتەردى جيناۋدى دا كوزدەۋى ءتيىس. ينتسيدەنتتەر تۋرالى دەرەكتەردى (حابارلامالاردى) ەرىكتى ۇسىنۋ جۇيەسى جازا قولدانۋعا باعدارلانباعان جانە اقپارات كوزدەرىن قورعاۋدى كوزدەۋى ءتيىس. ەرىكتى حابارلاۋ كەزىندە جازا قولدانۋدان باس تارتۋ ينتسيدەنتتەر جانە قاۋىپتى فاكتورلار تۋرالى دەرەكتەردى ەرىكتى حابارلاۋ جۇيەسىنىڭ نەگىز قالاۋشى قاعيداتى بولىپ تابىلادى. 45. ۋاكىلەتتى ورگان اۆياتسيالىق وقيعالار مەن ينتسيدەنتتەردى مونيتورينگتەۋ, باقىلاۋ جانە ولاردىڭ الدىن الۋ ماقساتىندا ۇقبج بويىنشا دەرەكتەردى جيناۋ مەن تالداۋدىڭ اۆتوماتتاندىرىلعان جۇيەسىن ازىرلەيدى جانە ەنگىزەدى. ۇشۋ قاۋىپسىزدىگى تۋرالى دەرەكتەردى جيناۋ, تالداۋ جانە ولارمەن الماسۋ 46. ۋاكىلەتتى ورگان اۆياتسيالىق وقيعالار مەن ينتسيدەنتتەر تۋرالى ۇسىنىلعان مىندەتتى جانە ەرىكتى حابارلامالاردى جيناۋدى, ەسەپكە الۋدى جانە تالداۋدى جۇزەگە اسىرادى, سونداي-اق قاۋىپتى فاكتورلاردى ەسەپكە الۋدى جۇرگىزەدى. مىندەتتى تەكسەرۋگە جاتاتىن وقيعالار تىزبەسىنە كىرەتىن اۆياتسيالىق وقيعالارعا قاتىستى ۋاكىلەتتى ورگان ولاردى تەكسەرۋدى ۇيىمداستىرادى, ال قاۋىپتى فاكتورلارعا قاتىستى ولاردى جويۋ نەمەسە ولاردىڭ ىقپال ەتۋ دارەجەسىن ازايتۋ جونىندەگى پروفيلاكتيكالىق ءىس-شارالاردى ازىرلەيدى. 47. ۇشۋ قاۋىپسىزدىگىنىڭ جاي-كۇيىن تالداۋ اۆياتسيالىق وقيعالار مەن ينتسيدەنتتەردى تەكسەرۋ ءناتي­جەلەرى مەن ولاردىڭ دەرەكتەر بازاسىنا, قاۋىپتى فاكتورلاردى انىقتاۋ جونىندەگى ءارتۇرلى باعدار­لامالاردى جۇزەگە اسىرۋعا, قىزمەت كورسەتۋدى جەتكىزۋشىلەردىڭ قىزمەتتەرىن قاداعالاۋعا نەگىزدەلەدى جانە ۇشۋ قاۋىپسىزدىگىنىڭ جاي-كۇيىن باعالاۋ مەن الدىن الۋ شارالارىن ازىرلەۋگە ارنالعان. 48. ۋاكىلەتتى ورگان قازاقستان رەسپۋبليكاسىنىڭ ازاماتتىق اۆياتسياسى اۋە كەمەلەرىنىڭ ۇشۋ قاۋىپ­سىزدىگى جاي-كۇيىنىڭ اي سايىنعى, توقسان سايىنعى, جارتىجىلدىق جانە جىلدىق تالداۋىن دايىنداي­دى جانە شىعارادى. ۇشۋ قاۋىپسىزدىگى جاي-كۇيىنىڭ تالداۋلارى قىزمەت كورسەتۋدى جەتكىزۋشىلەرگە جىبە­رىلەدى. 49. قىزمەت كورسەتۋدى جەتكىزۋشىلەر ۇشۋ قاۋىپسىزدىگى جاي-كۇيىنىڭ جارتىجىلدىق جانە جىلدىق تالداۋلارىن جاسايدى. قىزمەت كورسەتۋدى جەتكىزۋشىلەر جاسايتىن ۇشۋ قاۋىپسىزدىگى جاي-كۇيىنىڭ تالداۋلارى جيناقتاۋ جانە تۇتاستاي ازاماتتىق اۆياتسيا بويىنشا ۇشۋ قاۋىپسىزدىگىنىڭ دەڭگەيىن ارتتىرۋ جونىندەگى پروفيلاكتيكالىق شارالاردى قابىلداۋ ءۇشىن ۋاكىلەتتى ورگانعا جىبەرىلەدى. باقىلاۋدى ۇشۋ قاۋىپسىزدىگى تۋرالى دەرەكتەردىڭ نەگىزىندە نەعۇرلىم پروبلەمالىق نەمەسە قوسىمشا تەكسەرۋدى تالاپ ەتەتىن سالالارعا باعىتتاۋ 50. قىزمەت كورسەتۋدى جەتكىزۋشىلەردىڭ, ونىڭ ىشىندە شەت مەملەكەتتەردىڭ اۋە كەمەلەرىن پايدالانۋشىلاردىڭ ۇقبج-سىندا سايكەسسىزدىكتەر انىقتاعان كەزدە ۋاكىلەتتى ورگان ۇشۋ قاۋىپسىزدىگى تۇرعىسىنان نەعۇرلىم پروبلەمالىق نەمەسە قاۋىپتەر, وندىرىستىك قىزمەتتەر ءۇشىن ولاردىڭ سالدارى تۋرالى دەرەكتەردى جانە ۇشۋ قاۋىپسىزدىگى ءۇشىن قاۋىپتەردى باعالاۋ ناتيجەلەرىن تالداۋ ارقىلى انىقتالعان قىزمەت كورسەتۋدى جەتكىزۋشىلەردىڭ قوسىمشا تەكسەرۋدى تالاپ ەتەتىن قىزمەت سالالارىندا كەزەكتەن تىس ينسپەكتسيالىق تەكسەرۋلەر مەن زەرتتەپ تەكسەرۋلەر جۇرگىزەدى. 5. مەملەكەتتىك دەڭگەيدە ازاماتتىق اۆياتسيا قاۋىپسىزدىگىن دامىتۋعا جاردەمدەسۋ 51. ۋاكىلەتتى ورگان «مەملەكەتتىك اۆياتسيا ينسپەكتورلارىن كاسىپتىك دايارلاۋ جانە ولاردىڭ بىلىكتىلىگىن ۇستاۋ قاعيدالارىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2013 جىلعى 12 قاراشاداعى №1212 قاۋلىسىنىڭ نەگىزىندە مەملەكەتتىك اۆياتسيا ينسپەكتورلارىن كاسىپتىك دايارلاۋ جانە بىلىكتىلىگىن قولداۋدى قامتاماسىز ەتەدى. 52. ۋاكىلەتتى ورگان ۇشۋ قاۋىپسىزدىگىن قاداعالاۋعا قاتىساتىن ءوزىنىڭ پەرسونالىن ۋاكىلەتتى ورگان سەرتيفيكاتتاعان اۆياتسيالىق وقۋ ورىندارىندا, سونداي-اق يكاو-نىڭ وقۋ ورتالىقتارىندا وقۋدان وتكىزەدى.