استانا. 25 ناۋرىز. قازاقستان پرەزيدەنتى نۇرسۇلتان نازارباەۆ VI شاقىرىلىمداعى پارلامەنتتىڭ ءبىرىنشى سەسسياسىنا قاتىستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى.
مەملەكەت باسشىسى دەپۋتاتتاردى ءماجىلىس جۇمىسىنىڭ باستالۋىمەن قۇتتىقتاپ, وتكەن سايلاۋدىڭ ەلىمىز ءۇشىن تاريحي ءمانى بار ەكەنىن ايتتى.
«سايلاۋدىڭ ناتيجەسى قازاقستاندىقتاردىڭ قازىرگى جانە بولاشاق ءبىرتۇتاس ۇلت رەتىندەگى تۇتاستىق دەڭگەيى جوعارى ەكەنىن ناقتى كورسەتىپ بەردى. سايلاۋ قازاقستاندىق بىرلىكتى نىعايتقان تاريحي اكتىگە اينالدى. داۋىس بەرۋ ۇلت جوسپارىن بۇكىلحالىقتىق قولداۋدىڭ كورىنىسى بولدى. مەن تاۋەلسىزدىكتىڭ 25 جىلدىق مەرەيتويى جىلىندا وتكەن سايلاۋدىڭ تاريحي ناتيجەسىمەن قازاقستاندىقتاردى تاعى دا قۇتتىقتايمىن. سونداي-اق, ءماجىلىستىڭ جاڭا قۇرامىنداعى بارلىق دەپۋتاتتاردى پارلامەنتشى مارتەبەسىن الۋىمەن قۇتتىقتايمىن», – دەدى قازاقستان پرەزيدەنتى.
نۇرسۇلتان نازارباەۆ قازاقستاندىقتار ءۇشىن قوعام تىرشىلىگىنىڭ بىرقاتار ماڭىزدى سالالارىندا جاڭا مۇمكىندىكتەرگە جول اشقان ۇلت جوسپارىن جۇزەگە اسىرۋدىڭ ارالىق ناتيجەلەرىنە دە ەگجەي-تەگجەيلى توقتالدى.
قازاقستان پرەزيدەنتى التىنشى شاقىرىلىمداعى پارلامەنتتىڭ زاڭ شىعارۋ جۇمىسىنا قاتىستى بىرقاتار ماڭىزدى مىندەتتەردى اتادى.
«بىرىنشىدەن, بارلىق قارجى ۇدەرىستەرىنىڭ جاريالىلىعىن قامتاماسىز ەتەتىن بىرىڭعاي سالىق جانە كەدەن كودەكسىن قابىلداۋ كەرەك. ەكىنشىدەن, «جەر قويناۋى جانە جەر قويناۋىن پايدالانۋ تۋرالى» كودەكستى قابىلداۋ ارقىلى وسى سالاداعى قاتىناستاردى رەتتەيتىن بارلىق نورمالار ءبىر زاڭدا شوعىرلاندىرىلادى. ۇشىنشىدەن, قولدانىستاعى ەلەكتر ەنەرگەتيكاسى ماسەلەلەرى جونىندەگى زاڭناماعا وزگەرىستەر ەنگىزۋ قاجەت. بۇل ەنەرگيا تاراتۋشى ۇيىمداردى ىرىلەندىرۋ ۇدەرىسى ءۇشىن كەرەك. تورتىنشىدەن, مونوپولياعا قارسى سالانى رەفورمالاۋدىڭ ەكىنشى كەزەڭى اياسىندا باسەكەلەستىك ماسەلەلەرى جونىندەگى زاڭنامالىق اكتىلەرگە وزگەرىستەر مەن تولىقتىرۋلار ەنگىزگەن ءجون. بەسىنشىدەن, مەملەكەتتىك قىزمەتتەردى باسەكەلى ورتاعا بەرۋ سالاسىنداعى زاڭنامانى جاڭعىرتۋ كەرەك», – دەدى نۇرسۇلتان نازارباەۆ.
سونىمەن قاتار مەملەكەت باسشىسى ءماجىلىس دەپۋتاتتارى زاڭ شىعارۋ ۇدەرىسىندە پارلامەنت سەناتىمەن اراداعى سىندارلى ءوزارا ءىس-قيمىل ءداستۇرىن جالعاستىراتىنىنا سەنىم ءبىلدىردى.
«ءماجىلىستىڭ جالپى وكىلەتتىك مەرزىمىنە ارنالعان زاڭنامالىق جۇمىستاردىڭ پەرسپەكتيۆالىق جوسپارىن ازىرلەۋ ماڭىزدى مىندەت بولىپ سانالادى. جاڭا احۋال جاعدايىندا پارلامەنتتىڭ جانە ونىڭ پالاتالارىنىڭ قوعامدىق ساياسي ءرولى مەن جاۋاپكەرشىلىگى ارتىپ وتىرعانىن ايرىقشا ايتقىم كەلەدى. پارلامەنتشىلەردىڭ پارتياارالىق ءوزارا ءىس-قيمىلىن كۇشەيتىپ, بارلىق فراكتسيالار مەن دەپۋتاتتىق توپتاردىڭ ۇيلەسىمدى جۇمىسىنا قول جەتكىزۋ كەرەك. قازاقستان دەپۋتاتتارىنىڭ حالىقارالىق پارلامەنتارالىق قوعامداستىققا بەلسەنە قاتىسۋى دا ماڭىزدى مىندەت. جاڭا دەپۋتاتتار جۇمىسقا جەدەل قوسىلاتىنىنا, ال بۇرىنعى قۇرام دەپۋتاتتارى ساباقتاستىقتى قامتاماسىز ەتىپ, «جاڭا ارناعا» جەدەل كوشەتىنىنە سەنىمدىمىن», – دەدى قازاقستان پرەزيدەنتى.
ءىس-شارا بارىسىندا پارلامەنتتىڭ جاڭادان سايلانعان دەپۋتاتتارى انت بەردى.
تالعات رايىمبەك.
دەرەك, سۋرەت: akorda.kz.
