ىستامبۇلدا وتانداستارىمىز داۋىس بەرۋدە بەلسەندىلىك تانىتتى

استانا. 20 ناۋرىز. تۇركياداعى سايلاۋ ۋچاسكەلەرىندە داۋىس بەرۋشىلەردىڭ 70 پايىزى داۋىس بەردى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. ىستامبۇلداعى №205-ءشى سايلاۋ بوىمشەسىنە 575 ازامات تىركەلگەن. ولاردىڭ باسىم بولىگى جوعارى وقۋ ورنىنىڭ ستۋدەنتتەرى. سونداي-اق, تۇركيادا ساپارمەن جۇرگەن وتانداستارىمىز بەن كونسۋلدىق قىزمەتكەرلەرى جانە ولاردىڭ وتباسى مۇشەلەرى اتا زاڭدا بەلگىلەنگەن قۇقىقتارىن پايدالانىپ, ءوز داۋىستارىن بەردى. تۇركياداعى قازاقستاندىقتار ءۇشىن انكارا, ىستامبۇل مەن انتاليا قالالارىندا 3 سايلاۋ ۋچاسكەسى جۇمىس ىستەيدى. قازاقستاننىڭ تۇركياداعى ەلشىلىگى تاراتقان مالىمەتكە سايكەس, بيىلعى پارلامەنت ءماجىلىسى دەپۋتاتتارىنىڭ سايلاۋىنا داۋىس بەرۋگە 1 مىڭ 313 وتانداسىمىز تىركەلگەن. بۇل كۇندەرى ىستامبۇلدا سايلاۋشىلاردىڭ ءجۇرىپ-تۇرۋى ءۇشىن ارنايى اۆتوبۋس جۇمىلدىرىلدى. سونداي-اق انكارا مەن ىستامبۇلداعى سوڭعى لاڭكەستىك وقيعالارعا بايلانىستى سايلاۋ بولىمشەلەرىندە قاۋىپسىزدىك شارالارى ەرەكشە قاداعالانۋدا. «سايلاۋعا ىستامبۇلدا ەكىنشى رەت قاتىسىپ تۇرمىن. قازاقستانىمىزدىڭ بولاشاعى ادىلەتتى ءارى تۇراقتىلىعى ءۇشىن داۋىس بەرۋدەمىز. سەبەبى, بۇل سايلاۋ جاستارعا دا وتە ماڭىزدى. كەلەشەگىمىزدى ءوزىمىز بەلگىلەۋ ءۇشىن بارلىعىمىز تۇگەلدەي قاتىسۋدامىز», – دەدى تۇركياداعى قازاقستاندىق ستۋدەنتتەر قاۋىمداستىعىنىڭ توراعاسى ەركەعالي ەلتاي. «ىستامبۇل قالاسىنداعى №205 سايلاۋ ۋچاسكەسىندە بەلسەندىلىك وتە جوعارى دەپ ايتۋعا بولادى. قازىرگى تاڭدا تىزىمدەگى سايلاۋشىلاردىڭ 70%-ى كەلىپ ءوز داۋىستارىن بەردى. جالپى باس كونسۋلدىق تاراپىنان سايلاۋشىلار ءۇشىن بارلىق جاعداي جاسالىندى», – دەيدى ىستامبۇل قالاسىنداعى №205 سايلاۋ ۋچاسكەسى كوميسسياسىنىڭ حاتشىسى ماقسات وتەنوۆ. ايان ءابدۋالي. دەرەك, سۋرەت: 24.kz.