ەلباسى اۋعانستان پرەزيدەنتىمەن تەلەفون ارقىلى سويلەستى

استانا. 20 ناۋرىز. مەملەكەت باسشىسى اۋعانستان يسلام رەسپۋبليكاسىنىڭ پرەزيدەنتى موحامماد اشراف عانيمەن تەلەفون ارقىلى سويلەستى. بۇل تۋرالى akorda.kz حابارلادى. تەلەفون ارقىلى اڭگىمەلەسۋگە اۋعان جاعى باستاماشى بولدى. موحامماد اشراف عاني اڭگىمە بارىسىندا مەملەكەت باسشىسىن ناۋرىز مەرەكەسىمەن قۇتتىقتاپ, قازاقستان حالقىنىڭ ءوسىپ-وركەندەي بەرۋىنە تىلەكتەستىگىن ءبىلدىردى. سونداي-اق, اۋعانستان باسشىسى قازاقستان پرەزيدەنتىن پارلامەنت ءماجىلىسىنىڭ كەزەكتەن تىس سايلاۋىنىڭ تابىستى وتۋىمەن قۇتتىقتادى. مەملەكەت باسشىلارى اۋعانستان پرەزيدەنتىنىڭ قازاقستانعا 2015 جىلى قاراشاداعى العاشقى رەسمي ساپارىندا قول جەتكەن ۋاعدالاستىقتاردى جۇزەگە اسىرۋ قاجەتتىگىنە توقتالدى. سونىمەن قاتار, تاراپتار وڭىرلىك قاۋىپسىزدىكتى قامتاماسىز ەتۋ ماسەلەلەرىن تالقىلادى. نۇرسۇلتان نازارباەۆ قازاقستاننىڭ اۋعانستاندى قالپىنا كەلتىرۋ ءۇشىن كۇش-جىگەر جۇمساۋىن جالعاستىرا بەرەتىنىن ايتتى. بۇل رەتتە تاراپتار كوپجاقتى قۇرىلىمداردىڭ, سونىڭ ىشىندە شىۇ اياسىنداعى ءوزارا ءىس-قيمىلدىڭ دەڭگەيىنە قاناعاتتانۋشىلىق ءبىلدىردى. ەلامان قوڭىر. دەرەك, سۋرەت: akorda.kz.