استانا. 19 ناۋرىز. بۇگىن استانادا مانەرلەپ سىرعاناۋدان كەڭەس وداعىنىڭ ءۇش دۇركىن وليمپيادا چەمپيونى يرينا رودنينا جاس سپورتشىلارمەن كەزدەستى.
كەزدەسۋ «الاۋ» مۇز سارايىندا ءوتتى. وندا قالانىڭ جاس مانەرلەپ سىرعاناۋشىلارى الەمنىڭ ون دۇركىن چەمپيونى كەلەدى دەگەندە اتاقتى سپورتشىنى كورۋگە اسىعا جەتتى. وسى كۇنى يرينا رودنينانىڭ ۋاقىتى تىعىز بولعانىمەن جاستارمەن ەمىن-ەركىن اڭگىمەلەسىپ, سۇراقتارىنا جاۋاپ بەردى. سودان كەيىن ول بالالاردىڭ جاتتىقتىرۋشىلارى مەن وزدەرىنە 1,5 ساعات بويى شەبەرلىك ساباعىن وتكىزدى.
«ماعان كەزدەسۋ وتە ۇنادى. مۇز سارايى دا جاقسى سالىنعان ەكەن. ال بالالاردىڭ وزدەرى قانداي ادەمى, تالاپتى. مەن ولاردىڭ اراسىنان وليمپيادا چەمپيونى شىعاتىنىنا سەنەمىن. ەڭ باستىسى بالالاردى جاقسى دايىنداۋ كەرەك. مەن قازاقستانعا سايلاۋدىڭ بايقاۋشىسى رەتىندە كەلدىم. قازاقستاننىڭ بولاشاعى جارقىن بولادى دەپ ويلايمىن. كەلەسى جولى تاعى كەلەمىن. سول كەزدە سپورتشىلارمەن جانە سپورت مينيسترلىگى باسشىلىعىمەن كەزدەسەمىن», دەدى ول.
يرينا رودنينا 1972 جىلى الەكسەي ۋلانوۆپەن, 1976, 1980 جىلدارى الەكساندر زايتسەۆپەن بىرگە ەكەۋىلەپ مانەرلەپ سىرعاناۋدا وليمپيادا چەمپيونى اتانعان. رەسەيدىڭ مەملەكەتتىك دۋماسىنىڭ «ەدينايا روسسيا» پارتياسىنىڭ اتىنان سايلانعان V-VI شاقىرىلىمىنىڭ دەپۋتاتى. قوعام قايراتكەرى. «ەدينايا روسسيا» پارتياسى باس كەڭەسىنىڭ مۇشەسى.
داستان كەنجالين.
دەرەك, سۋرەت: مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتى.
[caption id="attachment_30370" align="aligncenter" width="448"]
[/caption]
